¹ Inhlakanipho itakhele indlu yayo; wabata tindvonga ngematje letisikhombisa. ² Wahlaba imfuyo yakhe, wenta liwayini, phindze wadeka litafula. ³ Utfumele tisebenti takhe; umemete endzaweni lephakeme kutotonkhe edolobheni, ⁴ ''Ngubani lote kwati? Akete ngalana kimi!'' Ukhuluma nalabo labete ingcondvo. ⁵ Wotani, netewukudla kudla kwami, phindze ninatse liwayini lengilentile. ⁶ Yekela tento takho tekulibala uphile; uhambe endleleni yekucodza. ⁷ Loyo locondzisa umuntfu lodzelelako utotfola kuhlukubeteka, naloyo loweluleka umuntfu lokhohlakele utfola tinhlamba. ⁸ Ungamcondzisi umuntfu lodzelelako, utokunyanya; condzisa sihlakaniphi, sitokutsandza. ⁹ Luleka sihlakaniphi, sitobese sihlakanipha kakhudlwana; fundzisa umuntfu lolungile, utobese ungeta kulakufundzile. ¹⁰ Kwesaba Simakadze kukucala kwekuhlakanipha, phindze lwati ngalongcwele kukucondza. ¹¹ Ngami emalanga akho atokwandza, phindze neminyaka yakho yekuphila itongetwa. ¹² Uma uhlakaniphile, utihlanaiphele wena, phindze uma udzelela, utokhala wedvwa.'' ¹³ Umfati lolibele ute lwati; akafundziswa phindze akati lutfo. ¹⁴ Lomfati uhlala ngaphandle emnyango wendlu yakhe, nobe endzaweni lephakeme kutotonkhe tindzawo telidolobha. ¹⁵ Ubita labo labengcako etitaladini, labo labatihambela tindlela tabo. ¹⁶ ''Labo labalibele abete ngalana,'' lomfati usho kulawo madvodzalete imicondvo lekahle. ¹⁷ ''Emanti ekwebiwa amnandzi, nesinkhwa losidlela emasitselweni simnandzi.'' ¹⁸ Kepha indvodza ayati kutsi labafile bakalomfati, kutsi tivakashi takhe tisekhatsi eSheyoli.