¹ Simakadze wakhuluma ku Moses, atsi, ² ''Khuluma ku Aaron kanye nemadvodzana akhe, kanye nakubo bonkhe bantfu baka Israel. Batjele ngaloku Simakadze lakuyalele: ³ 'Noma ngangumuphi umuntfu waka Israel lobulala inkhabi, imvana, noma imbuti enkambu, noma loyibulala ngephandle kwenkambu, kute atowenta umhlatjelo ngayo - ⁴ uma angayiletsi ekungeneni kwelithende lekuhlangana kuyinikela njenge mhlatjelo ku Simakadze phambi kwe lithabanekheli lakhe, loyo muntfu unelicala lekucitsa ingati. Ucitse ingati, loyo muntfu kumele asuswe emkhatsini webantfu bakhe. ⁵ Lenhloso yalomyalo lona kungu kutsi labantfu baka Israel batowuletsa imihlatjelo yabo ku Simakadze ekungeneni kwelithende lekuhlangana, kumphristi kute kutewentiwa ngako umhlatjelo njenge mnikelo wekuhlanganyela ku Simakadze, esikhundleni sekunikela imihlatjelo endzaweni levulekile. ⁶ Lomphristi utawunyenyeta lengati elathini la Simakadze; utawushisa lamafutsa kute itawenta lusu lelimnandzi ku Simakadze. ⁷ Labantfu kumele bangasanikeli imihlatjelo yabo etithicweni tembuti, letentisa kwetingwababane. Loku kutoba ngumtsetfo lobhaliwe lomile kutotonkhe letitukulwane tebantfu babo.' ⁸ Kumele utsi kubo, 'Nnanoma ngumuphi umuntfu waka Israel, noma nanoma ngumuphi umuntfu wekuhamba lohlala emkhatsini wabo, lonikela umnikelo loshisiwe noma umhlatjelo ⁹ futsi angawuletsi ekungeneni kwelithende lekuhlangana kute atewenta umhlatjelo ku Simakadze, loyo muntfu kumele asuswe emkhatsini webantfu bakhe. ¹⁰ Uma nanoma ngumuphi umuntfu wendlu yaka Israel, noma ngumuphi umuntfu wekuhamba lohlala emkhatsini wabo adla ingati noma nguyiphi, ngitawutfukutsela ngimelene naloyo muntfu lodla ingati futsi ngitamususa emkhatsini webantfu bakhe. ¹¹ Ngoba imphilo yesilwane isengatini yaso. Nginikete ingati yaso kini kwenta kubuyisana elathini ngetimphilo tenu, ngoba yingati leyenta kubuyisana, ngoba yingati lebuyisa ngemphilo. ¹² Ngako ke ngatsi kulabantfu baka Israel kutsi kute namunye emkhatsini wenu lokumele adle ingati, futsi ngeke ngisho namunye umuntfu wekuhamba lohlala emkhatsini wenu adle ingati. ¹³ Noma ngangubani kubantfu baka Israel, noma ngangubani webantfu bekuhamba lohlala emkhatsini wabo, lotingelako futsi abulale silwane noma inyoni lokungadliwa, loyo muntfu kumele acitse ingati yaso ambonye lengati ngemhlabatsi. ¹⁴ Ngoba imphilo yaleso naleso sidalwa yingati yaso. Ngiko ngatsi kubantfu baka Israel, ''Akukameli nidle ingati yanoma ngusiphi sidalwa, ngoba imphilo yaso sonkhe sidalwa lesiphilako yingati yaso. Loyidlako kumele asuswe.'' ¹⁵ Wonkhe umuntfu lodla silwane lesifile noma lesidzatjulwe tilwane tasendle, noma ngabe loyo muntfu wekutalwa kulelo live noma ungu wekuhamba lohlala emkhatsini wenu, kumele awashe timphahla takhe atigeze emantini, futsi utawungcola kute kube kusentsambama. Utobese uyahloba. ¹⁶ Kepha uma angawashi timphahla takhe noma ageze umtimba wakhe, kutomele bese wetfwala licala lakhe.''