¹ Simakadze wakhuluma ku Moses - loku bekuku ngemuva kwekufa kwemadvodzana a Aaron lamabili, uma sebayile dvute na Simakadze base bayafa. ² Simakadze watsi ku Moses, ''Khuluma ku Aaron umnakenu umtjele kutsi angeti nome ngusiphi sikhatsi endzaweni lengcwele kakhulu ngekhatsi kwelikhethini, phambi kwesimbhonyo sekubuyisana lesisemphongolweni. Uma enta, utokufa, ngoba ngivela emafini ngetulu kwesimbhonyo sekubuyisana. ³ Loku yindlela lekumele Aaron angene ngayo endzaweni lengcwele kakhulu. Kumele angene nenkunzana njenge mnikelo wesono, nemvu lendvuna njenge mnikelo loshisiwe. ⁴ Kumele agcoke lengubo lengcwele yelineni, kutomele agcoke kwekucalela kwe lineni, futsi kumele agcoke lucotfo lwe lineni kanye neliduku le lineni. Leti tembatfo letingcwele. Kumele ageze umtimba wakhe emantini abese utigcokisa letimphahla leti. ⁵ Kumele atsatse enhlanganweni yebantfu baka Israel tiphongo letimbili njenge mnikelo wesono kanye nemvu lendvuna njenge mnikelo loshisiwe. ⁶ Aaron kumele aletse lenkunzi njenge mnikelo wesono, leyitawuba yakhe, kwenta kubiyisana kwakhe nemndeni wakhe. ⁷ Abese utsatsa timbuti letimbili atibeke phambi kwa Simakadze ekungeneni kwelithende lekuhlanganyela. ⁸ Aaron kumele ajike lidayisi letimbuti letimbili, linye lidayisi la Simakadze, lele linye lidayisi lembuti lengcoliswe tono tebantfu. ⁹ Aaron kumele aletse imbuti lapho khona lidayisi liwele Simakadze, bese unikela leyo mbuti njenge mnikelo wesono. ¹⁰ Kepha lembuti lapho lelidayisi liwele imbuti lengcoliswe tono tebantfu kumele iletfwe iphila phambi kwa Simakadze, kwenta kubuyisana ngekumutfumela njenge mbuti lengcoliswe tono tebantfu ehlane. ¹¹ Aaron kumele aletse inkunzi yemnikelo wesono, lotaba wakhe. Kumele ente kubuyisana kwakhe nemndeni wakhe, ngako kumele abulale lenkunzi njenge mnikelo wakhe wesono. ¹² Aaron kumele atsatse sitja semlilo lesigcwele emalahle lasuka elathini phambi kwa Simakadze, netandla takhe tigcwele imphepho yaphansi lecolisakele, uletse letintfo letingekhatsi kwendvwangu yaselubondzeni. ¹³ Lapho kutomele abeke lemphepho emlilweni phambi kwa Simakadze kute kutsi lelifu lelisuka kulemphepho litovimba lesimbonyo sekubuyisana ngetulu kwemitsetfo yesivumelano. Kumele ente loku kute angatokufa. ¹⁴ Kumele atsatse incenye yengati yalenkunzi ayinyenyete ngemuno wakhe ngembili kwesimbonyo sesivumelwano. Kumele anyenyete incenye yalengati ngemuno wakhe emahlandla lasikhombisa phambi kwale simbonyo sesivumelwano. ¹⁵ Kutomele bese ubulala lembuti yemnikelo wesono leyiyebantfu aletse ingati yayo ngekhatsi kwalendvwangu yasebondzeni. Lapho kumele ente ngalengati njengoba entile ngengati yenkunzi: Aboyinyenyeta kule simbonyo sesivumelwano naphambi kwesimbonyo sekubuyisana. ¹⁶ Kumele ente kubuyisana kwalendzawo lengcwele ngenca yetento letingcolile tebantfu baka Israel, nangekungalaleli kwabo nato tonkhe tono tabo. Kumle entele loku lithende lekuhlangana, lapho Simakadze ahlala emkhatsini wabo, ebukhoneni betento tabo letingcolile. ¹⁷ Kute lekumele abe sethendeni lekuhlangana uma Aaron angena kutowenta kubuyisana endzaweni lengcwele kakhulu, kute kube kulapho aphuma khona futsi sekacedzile kwenta kubuyisana kwakhe nekwemndeni wakhe, nayo yonkhe inhlangano yaka Israel. ¹⁸ Kumele aphume kuya kulelilathi leliphambi kwa Simakadze alentele kubuyisana, futsi kumele atsatse incenye yengati yalenkunzi, kanye nencenye yengati yembuti ayifake etimphondvweni telilathi ndzawo tonkhe. ¹⁹ Kumele anyenyete incenye yalengati kulo ngemuno wakhe emahlandla lasikhombisa kulihlambulula alihlukanisele Simakadze, khashane naletento letingcolile talabantfu baka Israel. ²⁰ Uma asacedzile kubuyiselana kwendzawo lengcwele kakhulu, lithende lekuhlangana, nelilathi, kumele anikele lembuti lephilako. ²¹ Aaron kumele abeke tandla takhe totimbili enhloko yalembuti lephilako avume kuyo bonkhe lobubi balabantfu baka Israel, konkhe kungalaleli kwabo, nato tonkhe tono tabo. Kumele abese ufaka loko kona enhloko yalembuti atfumele lembuti kumuntfu lolungele kuholela lembuti ehlane. ²² Lembuti kumele yetfwale bonkhe lobubi balabantfu kuya endzaweni lelihlane. Lapho ehlane, lomuntfu kumele akhulule lembuti. ²³ Aaron kumele abuyele emuva ethendeni lekuhlanganyela akhiphe tembatfo telineni letatigcokwe phambilini endzaweni lengcwele kakhulu, futsi kutomele atishiye khona lapho letembatfo. ²⁴ Abogeza umtimba wakhe emantini lasendzaweni lengcwele, bese ufaka tembatfo takhe letetayelekile; kutomele aphume ankele umnikelo wakhe loshisiwe kanye nemnikelo webantfu loshile, ngalenandlela wenta kubiyisana kwakhe nekwalabantfu. ²⁵ Kutomele ashise linoni lemnikelo wesono elathini. ²⁶ Lendvodza lekhulule lembuti lengcoliswe tono tebantfu kumele awashe timphahla takhe ageze umtimba wakhe emantini; emvakwaloko, angabuya enkambu. ²⁷ Lenkunzi yemnikelo wesono nembuti yemnikelo wesono, lo ingati yato yaletfwa kutowenta kubuyisana endzaweni lengcwele, kumele kwentiwe ngephandle kwenkambu. Lapho kumele bashise tikhumba tato, inyama, nebulongo. ²⁸ Lomuntfu loshisa letitfo leto kumele awashe tembatfo takhe ageze nemtimba wakhe emantini; emavakwaloko, angabuya enkambu. ²⁹ Kutawuhlala kungumtsetfwo lobhaliwe kini kutsi enyangeni yesikhombisa, elangeni lelishumi lenyanga, kumele nititfobe ningasebenti, noma ngabe uwekutalwa kulelive noma wekuhamba lohlala emkhatsini wenu. ³⁰ Loku kungoba ngalelilanga leli kubuyisana kutowentelwa nine, kunihlambulula kuto tonkhe tono tenu kute nihlobe phambi kwa Simakadze. ³¹ Li Sabatha lelihloniphekile kini lekuphumula, futsi kumele nititfobe ningasebenti. Loku kutawuhlala kungumtsetfo lobhaliwe emkhatsini wenu. ³² Umphristi lomkhulu, lona lotawugcotjwa abekwe kutsi babakwe kuba ngumphristi lomkhulu esikhundleni seyise, kumele ente kubuyiselana agcoke tembatfo telineni, loku, tembatfo letingcwele. ³³ Kumele ente kubuyisana endzaweni lengcwele kakhulu; kumele ente kubiyisana kwelithende lekuhlangana nekwelilathi, kumele ente kubuyisana kwebaphristi kanye nabo bonkhe bantfu bekuhlanganyela. ³⁴ loku kutohlala kungumtsetfo lobhaliwe kwenu, kwenta kubuyisana kwebantfu baka Israel ngenca yetono tabo tonkhe, kanye yonkhe minyaka.'' Loku kwentiwa njengoba Simakadze ayalele Moses.