¹ Njalo uma ngifuna kuphilisa Israel, sono sa Ephraim siyavela, kanye naletento letimbi tase Samaria, ngoba benta bucili; lowebako uyangena, futsi sicuku lesineludlame sihlasela etitaladini. ² Ababoni etinhlitiyweni tabo kutsi ngikhumbula tonkhe tento tabo letimbi. Nyalo tento tabo tiyabatungeleta; tiphambi kwebuso bami. ³ Ngebubi babo benta inkhosi ijabule, nangemanga abo tiphatsimandla. ⁴ Bonkhe batiphingi, njenge hhavu ishisiwe ngumbhaki, lomako ekuguculeni umlilo kusuka ekubhuceni inhlama ite icedze kukhukhumuka. ⁵ Ngelilanga lenkhosi yetfu tiphatsimandla titente labagulako ngekushisa kweliwayini. Welulela sandla sakhe kulabo bebaphukuta. ⁶ Ngoba ngetinhlitiyo letinjenge lihhavu, bahlela emacebo abo lakhohlisako. Intfukutselo yabo ivutsa kancane busuku bonkhe; ekuseni ivutsela etulu njenge mlilo lonelilangabi. ⁷ Bonkhe bashisa kuhle kwehhavu, futsi babulala labo lababusa etikwabo. Onkhe emakhosi abo awile; kute namunye wabo longibitako. ⁸ Ephraim utifaka emkhatsini webantfu. Ephraim likhekhe lelipacakile lelingakaguculwa. ⁹ Bahambi sebabulele bacedza emandla akhe, kepha akakwati. Timvu enhloko tifafatwe etikwakhe, kepha akakwati. ¹⁰ Kutikhukhumeta kwa Israel kufakaza kumelane naye; kepha noko, abakabuyeli ku Simakadze Nkulunkulu wabo, futsi abakamfuni , ngisho sekwenteke konkhe loku. ¹¹ Ephraim ufana nelituba, usheshe ayengeke futsi akacabangi, ubita i Egypt, bese undiza uya e Assyria. ¹² Uma bahamba, ngitawendlala linetsa lami etikwabo; ngitawubagola ngibabuyise phansi njenge tinyoni tesibhakabhaka. Ngitobajezisa ekuhambeni kanye kanye . ¹³ Nako kibo! Ngoba bangilahlekele. Kubhubha kuyeta kubo! Balwile bamelene nami! Bengitobasindzisa, kepha bakhulume emanga bamelene nami. ¹⁴ Abakakhali kimi ngenhlitiyo yabo yonkhe, kepha badzindza sililo emibhedzeni yabo. Bahlangana kanye kanye bahlanganele inhlanyelo neliwayini lelisha, futsi bayangifulatsela. ¹⁵ Noma ngabacecesha futsi ngacinisa imikhono yabo, nyalo sebahlela lokubi bamelene nami. ¹⁶ Bayabuya, kepha ababuyeli kimi, longetulu kwako konkhe. Banjenge mtjoki lotsambile. tiphatsimandla tabo titawuwa ngenkemba ngenca yekuhlambalata kwemalwimi abo. Loku kutawuba siphukuto sabo eveni lase Egypt.