¹ Vanini naku, baphristi! Naka, yindlu ya Israel! Lalela, yindlu yenkhosi! Ngobe kwehlulelwa kuyeta kumelana nani nonkhe. Ube lugibe eMizpah futsi nelinetsi lelendlalwe etikwe Tabor. ² Bavukela mbuso bema ekujuleni kwekubulala, kepha ngitawubajezisa bonkhe. ³ Ngiyamati Ephraim, na Israel akafihlwa kimi. Ephraim, nyalo sewube njenge ngwadla; Israel ungcolisiwe. ⁴ Tento tabo angeke tibavumele kutsi bajikele Nkulunkulu, ngobe ingcondvo yabo yebuphingi ikubo, futsi abamati Simakadze. ⁵ Leligcabho la Israel lifakazela kumelana naye; ngako Israel na Ephraim batawugileka ekutisoleni kwabo; naJuda naye utawugileka nabo. ⁶ Batawuhamba nemihlambi yabo kuyofuna Simakadze, kodvwa angeke bamtfole, ngobe sotikhiphile kubo. ⁷ Bebangatsembeki ku Simakadze, ngobe bebatele bantfwana basengakashadi. Nyalo imikhosi yenyeti lensha itobadla kanye nemasimu abo. ⁸ Futsa luphondvo eGibeah, kanye nelicilongo eRamah. Hlaba inyandzaleyo eBeth Aven: 'Sitakulandzela, Benjamini! ⁹ Ephraim utoba ngulolahliwe ngelilanga lesijeziso. Emkhatsini waletive taka Israel ngikushito lengicinisekile kutsi kwenteke. ¹⁰ Labaholi baka Juda bafanana nalabo labasusa litje lemncele. Ngitawutfululela intfukutselo yami kibo njenge manti. ¹¹ Ephraim ukhatsatekile; ukhatsatekile ngesijeziso, ngobe utihambele ngekutsandza kwakhe emvakwe tithico. ¹² Ngako ngitofana nemuhlwa ku Ephraim, futsi njengekubola kulendlu yaka Juda. ¹³ Ngesikhatsi Ephraim abona kugula kwakhe, na Juda wabona silondza sakhe, bese Ephraim waya ku Assiriya, na Juda watfuma titfunywa takhe enkhosini lenkhulu. Kodvwa bekangakhoni kunika likhambi kini bantfu nobe aphilise tilondza tenu. ¹⁴ Ngaka ngitofana nelibhubesi ku Ephraim, futsi njenge libhubesi leliselincane endlini yaJuda. Mine, nanami, ngitodzabula futsi ngihambe; Ngitoba titimisa, futsi kute lotobasindzisa. ¹⁵ Ngitawuhamba ngibuyele endzaweni yami, kuze babone kutisola kwabo futsi bafune buso bami, bate bangifunisise ekukhatsatekeni kwabo.''