¹ Mu mamele kuti kanji mu chiti zitendantu zo bulotu bwenu habusu bwa bantu kuti mu bonwe kubali, heba njobulyo kete mu wane mupuzo kwe Ishenu wina mwi wulu. ² Linu ha muha intuso, kanji mulizi impeta habusu bwenu mu ba chitila ba bachengeli muma sinagoge ni mu migwagwa, njikuti ba tembwe ku bantu. Chabusakusima niti kwenu, chi ba batambuli wabo mupuzo. ³ Kono hamuha intuso, kanji mu zuminini iyanza lyenu lya chimonso kwi ziba chili kwete kutenda iyanza lyenu lya malyo, ⁴ Njikuti impo yenu ihewe chakuliwungula. Linu Ishenu yo bwene zi wungwilwe mwa mi bozekeze. ⁵ Mi ha mulapela, kanji mukolisina ubu bachengeleli, ba saka kuzimana ni kulapela mu masinagoge ni mu machokelo a migwagwa, nji kuti ba bonwe bantu. Chabusakusima Ni wamba kwenu, chiba ba tambuli mupuzo wabo. ⁶ Kono inwe, chi mulapela, mwi njile mu malibela, mi mwi yala chiyazo, mulapele kwe Ishenu wina muliwungwile. Linu Ishenu yo bone muliwungwile mwa mi bozekeze. ⁷ Imi chi mulapela, kanji mu boleli zisena intuso ubu mu ba chitila ba Sikunze, ba zeza kuti ka ba zuwiwe cho bungi bwa manzwi abo. ⁸ Chobulyo, kanji mukolisina jabo, mukuti Ishenu wizi zi musaka, ni mu seni ku mu kumbila. ⁹ Chobulyo mulapele buti: 'Ishetu wina mwi wulu, ku jolozwe izina lyako. ¹⁰ Imi mubuso wako wize. Imi intato yako i tendahale hansi sina muina mwi wulu. ¹¹ Tuhe sunu zilyo ze zuva ni zuva. ¹² U kwatile milandu yetu, uvu naswe mu tu ba kwatili va vatu fosezi. ¹³ Hape kanji utu twali mu muliko, kono utu lukulule ku muntu muvi. ¹⁴ Mi ho kwatila bantu infoso zabo, Ishenu wa mwi wulu naye mwa mi kwatile. ¹⁵ Kono ha musa kwatili bamwi infoso zabo, niheba Ishenu kete na mikwatile infoso zenu. ¹⁶ Nihakubabulyo, ha mu linyima zilyo, kanji mubi ni zifateho zi lishonda ubu mu batendela ba chengelela, ba li sandula zifateho njikuti ba boneke ku bantu kuti bena ha ku linyima zilyo. Cha buniti ni cho kwenu, ba batambuli mipuzo yabo. ¹⁷ Kono inwe, ha mulinyima zilyo, mulisinge mafuta ku mutwi ni ku samba ku chifateho chenu. ¹⁸ Nji kuti kanji muboneki ku bantu kuti mwina ha kuli nyima zilyo, kono konji kwe Ishenu wina muliwungwile. Imi Ishenu yo bwene muliwungwile, mwa mi bozekeze. ¹⁹ Kanji uli kunganyizi cifumu ca hansi, hena mafele ni mafumi a wola kuci lya, ni hena vasa va wola kutulula mwateni ni ku iva. ²⁰ Kono, u likunganyize cifumu umwine kwi wulu ku sena mafele ni mafumi alya hateni, hasena ni vasa va wola ku tulula ni ku iva. ²¹ Kakuli hena cifumu cako nji hena inkulo yako. ²² Linso nji lambi lya muvili. Cikwina vulyo, heva linso lyako li vona hande, muvili wako onse mu uve mwiseli. ²³ Heva linso lyako li towele, ni muvili wako wonse wina mucinzime. Cikwina vulyo, heva iseli lina kwako lina luli mucinzime, cikando vule ico cinzime! ²⁴ Kakwina muntu yete na tendele vasimwine vovele, hesi ka toye yenke ni ku saka zumwi, kamba mwa kuteke yenke ni ku shwaula zumwi. Koti co wola ku tendela Ireza ni cifumu. ²⁵ Chobulyo ni wamba kwenu, kanji mu bilaeli ni ziamana buhalo bwenu, chete mulye nandi chete munywe-nandi kaza mubili wenu, chete muzwate. Nji kuti buhalo ka buhiti zilyo, ni mubili kuhita zizwato ? ²⁶ Mulole zizuni za mwi byumbyulu. Kazi byali kazi sinzi nandi ku bika zi kutulwa muziduli, kono Ishenu we wulu uzilisika. Aho inwe kana mu babutokwa ahulu ku zi zamba? ²⁷ Njeni kwenu yo wola ku vulaela ku ekeza ku vuhalo vwakwe? Cwale cinzi hamu vilela ni za kuzwata? ²⁸ Mu hupule nanga ziyangayanga za mu mawa, mu zi menena. Kazi tendi, kazi hosi vwanda. ²⁹ Kono ni mi wambila niti, nanga Salumoni munkanya yakwe kana ava zwati niheva ku likana ni lyoke lyao. ³⁰ Heva Ireza u zwatika lyani lya mumawa, lihala sunu ni zona lici li sohelwa mwi ziko, ku woleka vule ku zwatika inwe, inwe muve ntumelo inini? ³¹ Ni ha kwina vulyo kanji mu vileli ni muti, 'Mu tulye nzi?' kamba ' Mutu ñywe nzi?' kamba 'Mutu zwate zizwato nzi?' ³² Ba Sikunze nji bagana izi zintu, imi Ishenu we wulu wizi kuti mu zisaka. ³³ Kono ku matangilo musake mubuso wakwe ni ku shiyama kwakwe imi izi zintu zonse ka muzihewe. ³⁴ Chobulyo, kanji mubileli ni zezona, mukuti izona kali bilele chalyo. Limwi ni limwi izuba lilikene bungi bwabubi bwalyo.