¹ Linu Jesu habona zinabungi, cha ya hewulu lye lundu. Hachekala hansi, balutwani bakwe chibeza kwali. ² Cheyalula kaholo kakwe ni kubaluta, nati, ³ Bafuyoletwe nji bahumanehi muluhuho, kakuti abo mubuso wewulu njiwabo. ⁴ Bafuyoletwe njabo balila, kakuti muba tontozwe. ⁵ Bafuyoletwe njiba lishuwite, kakuti mubayole inkanda. ⁶ Bafuyoletwe njabo balizuwa inzala ni nyotwa yo kushiyama, kakuti kabezuzwe. ⁷ Bafuyoletwe njibena chishemo, kakuti kaba tambule chishemo. ⁸ Bafuyoletwe njiba jolola munkulo, kakuti ka babone Ireeza. ⁹ Bafuyoletwe baleti beinkozo, kakuti kabasumpwe bana ba Ireeza. ¹⁰ Bafuyoletwe njabo ba nyandisiwa cha libaka lya kuluka' chabo nji mubuso wewulu . ¹¹ Kufuyolwa nji kwenu heba bantu bamituka ni kumisukulula, ni kuwamba zonse zintu zibilala kwenu cha kumihambiliza chebaka lyangu. ¹² Munyakalale mi musange, kakuti mupuzo wenu mukando mwi wulu. Kakuti mweyi inzila bantu ba basukululi baporofita ba bahali inwe ni museni kuba kwateni. ¹³ Njinwe mu mwinyo we inkanda. Kono heiba mwinyo ni usampuka, kautetwe buti kuti ube ulunga hape? Kausina nenza hape konji kusohela hanze ni kulyatolelwa mwikonde lya matende a bantu. ¹⁴ Njinwe mwi seli lye inkanda. Munzi uzakitwe helundu kauwoli kuwungulwa. ¹⁵ Kakwina bantu bakumunika ilambi ni kuli bika mwi konde lya chiseye, kono hesi ha chizimanino che lambi, mi libelengela umwi ni umwi wina munzubo. ¹⁶ Musiye iseli lyenu libelenge habusu bwa bantu mu nzila ita kuti babone mitendo yenu ishiyeme ni temba Ishenu wina mwi wulu. ¹⁷ Kanji muzezi kuti ni bezili kumanisa mulao kapa baporofita. Kena ni bezili kubamanisa, kono kube zuziliza. ¹⁸ Kakuti chabusakusima ni mi wambila kuti kwanda iwulu ni nkanda hete ni zimane, kakwina ni yonke intaku kapa limwina linzwi lyete limaniswe kuzwiswa mumulao, mbwiteli zintu zonse hete nizi shiyame. ¹⁹ yense yo cola nanga munini wonke kweyi milao niku luta bamwi kutenda bulyo ka sumpwe munini mu mubuso wakwiwulu. Kono yo imamela ni kuiluta ka sumpwe mukando mu mubuso wakwiwulu. ²⁰ Mi ni mita kuti hesi kushiyama kwenu chi kwazamba kushiyama kwa bañoli ni kwa bafalisi, kete ni mwi njile che nzila ihi ne ihi mu mubuso wakwiwulu. ²¹ Muba zuwi kuti kubatewa kubali munako zakale, 'Leke kwihaya,' mi, 'Yense yete ehaye mwabe mubukabo bwe inkatulo.' ²² Kono ni wamba kuti yense yo bengele mwakwe mwabe mubukabo bwe inkatulo. Mi yense yoti kwamwake, 'Iwe umuntu yasena intuso!' kabe mubukabo bwe inkhuta. Mi yense yoti, 'Iwe chihole!' mwabe mubukabo bwa mulilo welihele. ²³ Chobulyo heiba uha impo yako hakatala mi hateni wina cha kufosekeze, ²⁴ leke impo yako habusu bwa katala, mi uyende. Cheintazi mubolisane inkulo ni mwako, mi linu wize zohe impo yako. ²⁵ Zuminzane ni yokuzekisa kapili ni musina naye munzila iya kunkuta, kamba muzekisi wako mwakuhe mu mayanza amu atuli, mi muatuli mwakuhe kumuofisa, mi iwola kusohelwa muintolongo. ²⁶ Chabusakusima niti kwenu, kete ni muzwe mwateni hesi chi mwaliha masheleni onse amukolota. ²⁷ Muba zuwi kuti kuba tewa, 'Leke kutenda buhule.' ²⁸ Kono niti kwenu yense yolola mwanakazi che inkumbu kwali chatenda buhule naye kale munkulo yakwe. ²⁹ Mi heiba linso lyako lya malyo li ku letela kuchunchula, u li nyukule mi u lizindile kule nawe. Kakuti kwina mbubo chilama chimwina cha mubili wako chifwe kuhita kuti mubili onse usohelwe mulihele. ³⁰ Mi heiba iyanza lyako lya malyo liku letela kuchunchula, u likosole mi ulisohele kule nawe. Kakuti kwina mbubo kwako kuti chilama chimwina cha mubili wako kuti chiye mulihele kuhita kuti mubili onse wako uye mulihele. ³¹ Kubatelwe hape, 'Yense yeta hindike mwi hyabwe, amuhe inolo lye kauhano. ³² Kono Ime niti kwenu kuti yense yo kauhana ni mwanakazi wakwe, heisi chebaka lya buhule, umuletela kuba ihule. Mi yense yete namusese kuzwa hakaniwa naye upanga buhule. ³³ Hape, muba zuwi kuti kubatelwe kwabo kubenako zakale, ' Kanji unkonki cha kuli sumina yaka kuchenga, kono utwale kulisumina kwako kwa Simwine.' ³⁴ Kono niti kwenu, kanji munkonki, kamba niheba chewulu, kakuti nji chipula cha Ireeza, ³⁵ kamba che nkanda , kakuli nji malyatilo a matende akwe; kamba cha Jerusalema kakuti nji munzi wa Simwine mukando. ³⁶ Niheiaba musiye ku nkonka cha mutwi wenu, kakuti ka muwoli kutenda lusuki lumwina kutuba kamba kusiha. ³⁷ 37 Kono musiye chiwambo chenu chibe, 'Ee, ee,' kamba 'Aa, aa.' Chonse chizambilila ichi chizwa kumuntu mubi. ³⁸ Mubazuwi kuti kuba tewa, ´Linso cha linso, mi lino cha lino. ³⁹ Kono Niti kwenu, kanji mu kanini iye mubilala. Kakuti, yense yo ku bakula kwi tama lya malyo, musandilwe ni limwi hape. ⁴⁰ Mi heiba zumwi u saka ku kutwala kunkuta ni kuhinda chizwato chanko, musiye hape ahinde ni mukanjo wanko, ⁴¹ Mi yense yo kuhambiliza imaile imwina, uyende naye imaile zobele. ⁴² Muhe ku yense yo mikumbila, mi kanji mukanini yense yo saka ku kalima kwenu. ⁴³ Mubazuwi kuti ku batewa, 'Muswanela kusaka imubambene naye mi mutoye chila chenu. ⁴⁴ ´Kono Niti kwenu, musake zila zenu mi muba kumbilile abo ba misukulula, ⁴⁵ ili kuti mube mubana ba baswisu be Ishenu wina mwiwulu. Kakuti u ñatulisa izuba lyakwe haba bilala ni ba shiyeme, ni ku tumina invula kubasali babi ni kubabi. ⁴⁶ Njikuti heba musaka abo ba misaka, mupuzo nzi umuwana? Kahena kuti nanga batelisi ba mutelo batenda chintu chiswana? ⁴⁷ Hamulumelisa bulyo bakwenu, chinzi chimutenda kuzamba bamwi? Kena kuti nanga Bachisi batenda chintu chiswana? ⁴⁸ Chobulyo muyelele kuba bashiyeme, ubu nji Ishenu wa kwiwulu mwashiyamele.