¹ Lyahanu Jesu chatwaliwa ni Luhuho mwi halaupa ku ku likiwa kwa diabulusi. ² Ha cha linyima zilyo mazuba a makumi one ni masiku a makumi one, nafwe inzala. ³ Muliki neza mi nikuwamba kwali, "Heba njiwe Mwana wa Ireeza, utae aa mabwe a sanduke chilyo" ⁴ Mi Jesu netaba chati kwali, ''Ku ñoletwa, 'Muntu kete nahale bulyo cha zilyo, kono ni cha linzwi ni linzwi lyonse lizwa mukaholo ka Ireeza"' ⁵ Linu diabulisi cha muhinda kumutwala mumunzi ujolola mi nikumubika hewulu lya muzako mule we itempele, ⁶ Mi chati kwali, 'Heba njiwe u Mwana wa Ireeza, uliwisikize hansi, kakuti kuñoletwe, 'Kate mañeloi akwe kuti aku babalele,'mi, Mua kunyemune mu mayanza awo, njikuti kanji ukabi itende lyako kwi ibwe.''' ⁷ Jesu nati kwali, "Kuñoletwa hape, 'Kanji u liki Simwine Ireeza wako.''' ⁸ "Hape, diabulusi na mu hinda kumutwala he lundu ile ni kumutondeza mibuso ina yonse yenkanda ni kububana kwayo . ⁹ ''Nati kwali, "Zonse izi zintu kani zikuhe, heba nofukama ni kuni lapela." ¹⁰ Linu Jesu chati kawali, "Zwaha kwiyakuna, Satani! Mukuti kuñoletwa, 'Mo fukamine Simwine Ireeza wako, mi momutendele iye yeyena.'" ¹¹ Linu diabulusi cha mulekeza, mi mubone, mañeloi chi eza niku mutendela. ¹² Linu haho Jesu hazuwa kuti Joani aba suminwa, chazwa nikubola mwa Galileya; ¹³ Chasiya Nazareta nikuyenda kukekala mwa Kapenauma, ina kumukuzo wewate lya Galileya, mu zilalo za Zebuloni ni Nafitali. ¹⁴ Ichi chiba tendahali kwi zuziliza cha bawambi muporofita Isaya, ¹⁵ "Inkanda ya Zabuloni ni nkanda ya Nafitali, kutwala kwi wate, kuhitilila Jordani, Galileya ya bantu bamachaba! ¹⁶ Bantu ba bena mulififi, chibabona iseli ikando, mi nabo babena mukanda ni mu munzunde walifu, hewulu lyabo iseli chilyazwa." ¹⁷ Kuzwa iyo nako Jesu natanga ku kutaza nati, "Mubake, mukuti mubuso wa kwiwulu chi wina hafuhi" ¹⁸ Habali kwa buyenda kumbali ye wate lya Galileya, cha bona bakwame bobele, Simone yo sumpwa Pitolosi, ni Andriyasi mwanche, ba sohela kanyandi mwi wate, mukuti babali bayambi. ¹⁹ Jesu chati kubali, "Mwize, munichilile, muni mi tende bayambi ba bantu." ²⁰ Haho chibasiya tunyandi ni kumwi chilila. ²¹ Jesu habali kwa buyenda kuzwa uko cha bona bamwi bakwame bobele, Jakobo mwana wa Zebediya, ni Joani mwanche, ba bena mu chisepe ni Zebediya ishabo ni baonga tunyandi twabo. Cha basumpa, ²² mi haho chiba siya chisepe ni shabo ni kumwi chilila. ²³ Jesu na yenda-yenda mwa Galileya yonse, naluta mu masinagoge abo, kukutaza ibangeli ya mubuso, ni kuhoza zilwalantu zisiyene-siyene ni zilwalo ku bantu. ²⁴ Indaba ziamana naye ni za ka zuweka mwa Siriya yonse, mi bantu ba baleti kwali balwele bonse, bazilwalo zisiyene-siyene, ni kusasaminwa, ba madimona, ni kuzuminina ni zihole. Jesu cha bahoza. ²⁵ Ikunga chilya mwichilila kuzwa mwa Galileya, kwa Dekapolisi, Jelusalema, ni Judeya, ni mwishilya lya Jordani.