¹ Jesus fala elis: '' na bardadi na fala bos, alguns di bos ku stali kana muri antis di e odja reinu di Deus ku na bin ku puder''. ² Dipus di seis dias, Jesus kumbida Pedru, Tiagu ku Djon, i leba elis ku el pa un monti altu. La si parsensa rabida se diante. ³ Si ropas bida i lampra suma lus, branku fundan, mas branku di kualker ropa di labanderas li na tera. ⁴ Enton Elias ku Moises parsi parsi pa elis di repenti i e kombersa ku Jesus. ⁵ Pedru ruspundi i fala Jesus: '' Rabi- (Mestri), i bon pa no fika li; no na fasi tris barakas: un pa Bo, un pa Maise, kil utru pa Elias''. ⁶ ( El i ka sibiba ke ki na papia, pabia e n'trumpiba). ⁷ 7 Un nuven bin kubri elis. Asin un fala bin di nuven: '' Es i nha Fidju ki n'ghama tchiu. N'ta obil!'' ⁸ Di repenti, odja ke djubi pa ladus, e ka odja ninguin ku elis, si ka son Jesus. ⁹ Odja ku e na riba di monti, i fala elis pa ka e konta ninguin ke ku e odja, ate ora ki Fidju de Omi lanta di mortu. ¹⁰ Asin e guarda kil kombersa na se sintidu, ma e staba na diskuti anti delis di ke ku pudi sedu '' lanta di mortu''. ¹¹ E puntal: '' pabia di ke ku skirbiduris fala kuma Elias dibi di bin purmeru?'' ¹² Jesus ruspundi elis: na bardadi Elias na bin purmeru pa torna pui tudu kusas na ordi. n'ta pabia di ke ki skirbidu kuma Fidju di Omi dibi di sufri manga di kusas i na disprezadu? ¹³ A mi na fala bos kuma Elia bin dja, ma e fasi ku el ke ku e misti, kil propi ku skritura fala badja sobri El. ¹⁴ Odja ku e riba nunde ku utrus disipulus staba nel, e odja manga di guintis ku bin da ba volta delis, skirbiduris na diskutiba ku elis. ¹⁵ Odja ku ki manga di guintis odjal, e kontenti dimas, e kuri pa bai falal mantenha. ¹⁶ I punta si disipulus: '' ke ku bo na diskuti ku elis?'' ¹⁷ Alguin ruspundi na metadi di guinti:'' Mestri, n'tisiu nha fidju; i tene un spiritu mau ku ta tudjil papia. ¹⁸ Es spiritu ta batil di durba kabesa sukuma ta sai na boka, i ta n'heme dintis i ta fika i na ronka bas di garganti. M'pidi bu disipulus pa e tiral el, ma e ka pudi. ¹⁹ el i ruspundi melis: mandjuandadi di guintis ku ta fia, ate kal tempu ku na sta ku bos? Ate kal tempu ku na suporta bos? Bo tisin el.'' ²⁰ E tisil mininu. Odja ku spiritu odja Jesus, kil ora djanan i dal ataki. Mininu kai na tchon i na rola, rola sukuma na sai na boka. ²¹ Jesus punta si pape: a kantu tempu ,ku sta asin? Si pape falal: '' desdi si mininesa. ²² I manga di bias i ta pintchal na fugu o na iagu i ta tenta danal. Si bu na pudi fasi algun kusa, ten pena di nos bu djudanu''. ²³ Jesus falal: ''si bu pudi! Tudu kusas ta sedu pa kil ku fia''. ²⁴ Kil ora pape di mininu grita i fala: '' ami n'fia! Djudan na nha falta di fiansa!'' ²⁵ Odja ku Jesus odja manga di guintis na kuri pa bin nunde el i reprendi ki spiritu susu, i falal: spiritu surdu imundu, n'dau ordi: sai nel, i nunka mas ka bu torna entral.'' ²⁶ I grita i fasi mininu da ataki risu i kunsa sai nel. I parsiba kil ku muri tok manga di kilis ku staba la na fala: '' i muri dja''. ²⁷ Ma Jesus pegal na mon i lantandal, i mininu lanta i firma. ²⁸ Odja ku Jesus entraba na kasa, si disipulus puntal aparti: '' pabia di ke ku manda no ka pudiba serka kil spiritu?'' ²⁹ I fala elis: '' es tipu ka ta spulsadu di kualker manera si ka son pa orason''. ³⁰ Odja ki e sai di la, e pasaba na Galileia, i Jesus ka mistiba pa ninguin sibi nunde ki e staba nel, ³¹ pabia i na n'sinaba si disipulus i fala elis:'' Fidju di Omi na sedu entregadu na mon di omis, e na matal. Ora ki muri, dipus di tris dias i na lanta di mortu''. ³² Ma e ka n'tindiba ki kombersa e teneba medu di punta utru bias. ³³ E bai pa kafarnaun. Odja ku e sta dja na kasa I punta si disipulus: '' ke ku bo na diskutiba na kaminhu?'' ³⁴ Ma e fika kaladu, ma e staba na diskuti ku n'ghutru sobri kin ku sedu mas garandi. ³⁵ I sinta I tchoma kil dozi I fala elis: '' si alguin misti sedu purmeru na bos, i na sedu ultimu i na sedu sirbidur di tudu.'' ³⁶ I toma un mininu-sinhu, i pul na se metadi, odja ki pegal ku si mon, I fala elis: ³⁷ '' kualker alguin ku risibi un mininu suma es na nha nomi, i na sedu ami ku sidunu risibi; i si alguin risibin, i ka ami ki risibi, ma kil ku mandan. ³⁸ Djon fala: '' no odja alguin na serka dimoniu na bu nomi i no tudjil fasil, pabia i ka ta siguinu''. ³⁹ Ma Jesus fala: ka bo tudji elis. Pabia ninguin ka pudi serka dimoniu na nha nomi dipus gora i rabida i na fala mal di mi. ⁴⁰ Tudu kin ku ka sta contra nos, i di nos. ⁴¹ Kualker alguin ku da bos un kopu di iagu pa bibi pabia abos i di Kristu, na bardadi na fala bos i ka na fika sin risibi pagamentu. ⁴² Kualker alguin ku pui un des pikininus ku fia na Mi kai, i na sedu mindjor pa i maradu un pedra garandi na garganti i fertchadu na mar. ⁴³ Si bu mon fasiu kai, kortal bu bota fora. I mindjor pa bu entra na vida ku un di bu mon kortadu di ki bu tene tudu dus mon i bu bai pa infernu, pa fugu ku ka ta paga. ⁴⁴ [ nunde ku bitchus ka ta muri, fugu tambi ka ta paga( e parti i kambaduba na livru antigu)]. ⁴⁵ Si bo pe fasiu kai, kortal bu botal fora. I mindjor bu entra na vida sin un pe, di ki tene tudu dus pe, i bu fertchadu na infernu. ⁴⁶ [ Nunde ku bitchus ka ta muri, fugu ka ta paga( e parti i kambaduba na livru antigu)]. ⁴⁷ Si bu udju na fasiu kai, rinkal. I mindjor entra na Renu di Deus ku un udju son di ki bu tene tudu dus udjus, i bu sedu botadu na infernu, ⁴⁸ Nunde ku bitchus ka ta muri, fugu ka ta paga. ⁴⁹ Pabia kada un na salgadu ku fugu. ⁵⁰ Sal bon, ma si pirtdi gustu kuma ki pudi fasidu pa i salga mas? Bo tene sal na bos propi, i bo vivi na pas un ku n'ghutru''.