¹ Ewela soti kusambizya kusilya kwa cimana. Nipo winji wa wanthu weciza nakumuzengulila, elowa mu wato mu cimana, nonkhala pansi. Winji wa wanthu onse wenze ku mbali kosilizyila cimana. ² Nipo esambizya vinthu vinyinji mu malinganizyo, nipo mu ma sambizyo yake, eciti kuli weve, ³ Mvwani! mulimi eciya kukomela mbuto zyake. ⁴ Pokomela, mbuto ziyake ziponela pa njila, nipo tuni tuwela nipo twecilya. ⁵ Mbuto ziyake ziponela pamusili wamyala, penzeve lito linyinji. pamene apo yetukumila, cikomo lito liliyokuye patali. ⁶ Koma payechoka zuwa, vomela vewauka, cikomo venzevye mizyu, viyuma. ⁷ Mbuto ziyake ziponela pakati pa vimiti va minga. Vimiti vaminga vikula nipo vomela vilasiwa, nipo viliyotwale. ⁸ Mbuto ziyake ziponela pa lito iweme nipo zitwala nakuti zikula notalimpha, nipo vowezya vipaka, makumi atatu, makumi atatu na limo, makumi kumi." ⁹ Nipo eciti, " Aliyense ali na matu yomvwila, amvwe!" ¹⁰ Yeso penze eka, wala wenze naye pafupi naye nawala wali twelufu emukonshya pa malinganizyo. ¹¹ Eciti kuli weve," Kuli mweo mwapasiwa miluvyo ya ufumu wa Mulungu. Koma kuli wala wali panja pa vyonse wali mu malinganizyo, ¹² mwakuti akalola, cendi olola, koma olola lini nipo akuti akamvwa, nicendi akumvwa , koma omvwishisha lini, kano akayomukonkha Mulungu owalekelela." ¹³ Nipo eciti kuli weve, " Nanga mumvwishisha lini iyi linganizyo? Nomba mumvwishishe tyani yonse yayake ma linganizyo? ¹⁴ Cilimunda okomela mbuto niye okomela lizu. ¹⁵ Wayake niwala oponela pambali pa njila, pekomelewa lizu. Nipo wakaimvwa, Satana pamene apo okuza nipo otola lizu yecikomelewa. ¹⁶ Nipo ziyake ni mbuto zokomelewa pa musili wamyala, niwala, ocita kuti akamvwa lizu, pamene apo oipokelela nacisangalasho. ¹⁷ Nipo waliye mizyu muli weve, koma okoselela kwa ka nsita. panthanzi pake wakawela mandandaulo cikomo ca lizu, nipo pamene apo otaikana nayo. ¹⁸ Nipo wayakine niye wala wekomela pakati pa minga. Akumvwa lizu, ¹⁹ koma cifukatilo cha zapa chalo nipo kuwamizya wenye kwa mphasha, na makumbwilo a vinthu viyake yakalowa yoluvya lizu, nipo posowa votwala. ²⁰ Nomba pali wala wekomelewa pa lito iweme. Akumvwa lizu, nipo oizomela nipo notwala vitwalo: makumi atatu, na makumi asano na limo, na makumi kumi." ²¹ Yeso eciti kuli weve, " Ko muleta katoli-toli mu nganda nakuika munyansi mwa citundu, kano munyansi mwa polala? Muileta mukati nipo muyuika pa tala. ²² Pakuti paliye cinthu cofisika citicikaleko ziwika, nipo paliye cakusei chamene citicikaleko oneka pasweta. ²³ Kano aliyense ali na matu yomvwila, lekani amvwe!" ²⁴ Eciti kuli weve, "Mvwishishani kuli vamukumvwa, pakuti mulingo wamulinga naweve, niye wati akamulingileni namwe, nipo vinyinji vikayangizyiwe. ²⁵ Cikomo cakuti wala ali nacho, kuli eve vinyinji vikapasiwe, nipo wala aliyiletu, ku yeve natwalinato tukapokewe." ²⁶ Nipo eciti, " Ufumu wa Mulungu uli monga munthu okomela mbuto pa musili. ²⁷ Olala usiku nouka muzuwa, nipo mbuto zumela nokula, koma oziwa lini mwazumelela. ²⁸ Musili umezya weka vitwalo: coyamba pwitika, nakuza matu, nakuza mbuto yakupya mu matu. ²⁹ Nipo mbuto ikapya, pamene apo otuma cikwakwa, cikomo nsita yowezya yaza." ³⁰ Soti eciti, " Nga nicinji catingalinganizye na ufumu wa Mulungu, kano ni linganizyo yanji yatinga sewenzeshye kulondolola? ³¹ Cili kwati mbuto ya mupilu imene, ikakomelewa, ni mbuto inyandi pa mbuto zyonse zapa chalo. ³² Koma, ikakomelewa nipo yukula nopula zomela zyonse zamu dimba, nipo yunkala na misambo yoina, cakuti tuni twamululu tungapange chisa mu chimfule cao." ³³ Namalinganizyo yanyinji yotetyo ewauzya lizu, malinga enzokwanisha kumvwishisha, ³⁴ Nipo aliyo walawizye kuliye malinganizyo. Koma penze eka, ewamangusulila vyonse asambili wake. ³⁵ Pali ila siku, cingulo picewela, eciti kuli weve, "Tiyeni takuya ku mbali iyake." ³⁶ Tetyo wesiya winji, nakuya na Yeso, pakuti enze kale mu wato. Na ma wato wayake yenze soti na yeve. ³⁷ Nipo cimphepo cewela nipo matambazi eyamba kulowa mu wato mwakuti kwesala panyandi kuti wato uzule na manzi. ³⁸ Koma Yeso eka enze mukati yone panaka. Emuusha nomuuzya, "Musambizyi, ko musamalalini kuti tili pafupi kumbila?" ³⁹ Nipo epanama, noiuzya mphepo, nipo eciuzya cimana, "Mutende! Uwepo!" Nipo cimphepo cileka, nipo kwenze celele ngako. ⁴⁰ Nipo eciti kwa weve, "Muyopanji? Muliye cicetekelo?" ⁴¹ Wenze wezula na mwezo ngako nipo eciti kuli umo na muyake, "Niwani wamene uyu, cikomo mphepo kumo na cimana chumumvwila?"