¹ Ngeshi keho Nyambi ghamuvumbura pofotji naKristusi, mushane yinu yokuwiru, oku ghahungumana Kristusi kudyoko dyorudyo dyaNyambi. ² Mughayare yinu yo kuwiru, mbadi yokuhatera kuyinu yo pakaye. ³ Amwe ne mwafire, noghuparo wene kwaghundeka kwaKristusi mwaNyambi. ⁴ Apa ghakuhokoka Kristusi, oyu ghadi eshi yomoyo wenu, podiyo namwe mbomuna hokoka nendi difumaneko dyofumwa. ⁵ Mupaghe keho ne hahati hopakaye yira rungu, kupira ghukushuki, didovo, yirumbera yoyimango, ghugu, eyi yina kutongora eshi kukarera yitjwandjo. ⁶ Payinu yino poghuna kwiyera ghupata waNyambi kwawana hotutughuru hoghuthiko. ⁷ Payinu yino pakutanga namwe momwayendire apa mwatungire nagho. ⁸ Ene pano keho ne mwakona kushwagha kuyinu yoyiheya yira ghukenya, ghupata, yighayara yoyiyi, kushupa mbango noyighamba yoyimango mutunwa twenu. ⁹ Mwakwangera mwathinda kenge mwashutura munu ghokare noyitenda yendi, ¹⁰ ndani mwavata keho munu ghomupya oyu ghamutenda mupya kughudimuki kukutha kuthishwi thayofotji yu ghayi varekire. ¹¹ Yoyina karera eshi mbadiko muhirika nomuJuda, makeneno no kupira makeneno, hokupira kutjwathana yighamba yagho, hakaScythiani, hapika, munu ghokushutuka, ene Kristusi yoyoyihe, no moyoyihe. ¹² Shika di ghamutorora Nyambi, hapongoki nohahakwa, mushupate mitjima dhothineke, ghunongo, makumbirupithero, ghuporothi noghudhughutjima. ¹³ Mukukwatithe-kwatithe. Mukufere neke. Ngeshi ghumwe ghadi noyinyeghenya naghumwe, mukuthiyerere mundhira dhofotji dhighamu thiyerera fumu. ¹⁴ Kuwiru ghoyoyiheya yi, mukare noruhakitho, eyi yakwaterera ghuhungami. ¹⁵ Muninge thiraro thaKristusi thiraghure mitjima dhenu. Ethi ne thothiraro ethi ghamwithera muthirama thofotji. Ndani mukare nomatumero. ¹⁶ Muninge ghushwi ghonando dhaKristusi dhitunge mumwenu, kuhonga nokutapa marawero kwakehe yu noghunyanyami ghoghuhe waNyambi, oku muna kwimba pisalemu no membo endi membo ghopamupepo nomatumero mumutjima dhenu kwaNyambi. ¹⁷ Kehe yi muna kutenda, munando end yiruwana, muyirughane yoyihe mwafumu Jesusi. Mutape ndangi kwaNyambi ghowihe kupitera mwendi. ¹⁸ Mukadidhiko,kutape kwa nduraghumbo ghoye, eyi yarogha kwa Fumu. ¹⁹ Nduraghumbo, hake makadidhiko dyoye, no wapata nendi kupiterera. ²⁰ Mwahanuke, mukuthe no mutawe hakuru wenu mukehethino, eyi yahafitha Fumu. ²¹ Mwawiha, mwashedhaghura hanenu, podigho maghana muwakashitha. ²² Mwapika, mukuthe hakuti wenu kukutha panyama pakeheyino, kadi payirughana yo meho, endi mukuhafitha hanu, ene no mutjima ghokukushuka. Muyape Fumu. ²³ Kehe yino mwakurughana, rughane mumudhimu wa Fumu kadi wahanu. ²⁴ Muna dimuka eshi muna kuwana kwaFumu futo dho ghupingwa. Fumu Kristusi muna kurughanena. ²⁵ Kehe yuno ghana kurughana yinu yi yapira kurogha ghana kuwana matengeko ghoyinu yokupiraghukushuki eyi ghana rughana, no kadiko kufera neke.