¹ Mwahona,mutape kwahapika, yoghuhungami noyi yaroghera, mudimuke namwe karo mwakara nahekudyenu gho mudiwiru. ² Mukare kughutho mukutanara mumandapero. mukare munarawa nokutumera. ³ Murapere pofotji natwe karo, eshi Nyambi ghayandhure thero dhonando, mughamba kuthitetu thaKristusi. Yoyishi koyi ame ghanighanga no menge. ⁴ Muraperere eshi ni kone kuyikenitha, thikadi naroghera kughamba. ⁵ Yende mughunyanyami kughutho kwawa hadi panunda, ndani kushutura ruvedhe. ⁶ Ninge manando ghoye kehepano ghakare nothinyeke. Muwatawedhere hamutanarithe no mungwa, podiyo mukone kudimuka eshi ngepi ghokuhuthera kehe munu. ⁷ Koyi yinu kuhamena kukwange, Tychicusi nanyi ghawatende mukunidimukitha kukwenu. Aye ne minentu ghomuhakwa, murughani ghomuhunga ndani mupika nomushere muyendhetu mwafumu. ⁸ Ame ne naghumutumena kukwenu koyi, podigho mukone kudimuka maghukukutu gho kuhamena kukwetu, podiyo shi ghamutjokedhe mitjima dhenu. ⁹ Ame naghumutumena pofotji naOnesimus, ghomutawedhi nomina ghomuhakwa. Oyu ghadi ghofotji ghopapenu. Awo nanyi hakuna mudimukithe kukwenu yoyiheya eyi yahokokire kuno. ¹⁰ Aristarchus, mukanotwa muyendhange, ghana mumorora, naMarkusi naye, thiro waBarnabasi (kuhatera koyu mwawana marawero; ngeshi ghakwiye kukwenu, mwakumutambure), ¹¹ naJesusi oyu ngaha toyanga Justusi owa pithawo kwawakena hodiyo haruwani hohashere kughufumu waNyambi. Awo hakarire hahengaghuri kukwange. ¹² Apaphrasi ghana mumorora, naye ghofotji ghopapenu nomupika Kristusi Jesusi. Naye kehe pano kukondja kukwenu mumandapero. ¹³ Podiyo mukone kwimana kukumenenamo no kuyara mumatoyedhero moyoyihe kumahimeno ghaNyambi. Ame kukona kushupa kuyiruwana yendi yoyikuru kukwenu, kukowa hadi muLaodisiya, ndani nowa hadi muHierapolisi. ¹⁴ Lukasi dokotere ghomuhakwa ndani naDemasi hana murumeritha. ¹⁵ Rumerithe haminetu muLaodiciya naNympha, ndani no ngirishe odhi dhidi mudighumbo dyendi. ¹⁶ Apa hakadhitoya dhi mbapira mukatji kenu, mukadhitoye karo nomungirishe dhawa kaLoadiciya, ndani mukadhimone karo hanakudhitoya dhi mbapira kushwagha Laodiciya. ¹⁷ Mutongwere Archippus eshi,''Kenge kuyirughana eyi wa wana mwaFumu, eyi waroghera kuyikumithamo.'' ¹⁸ Dirumeritho dine munyara dhange- Paghulusi. Muvuruke menge ghange. ninge thinyeke thikare nenu.