¹ Nashana mudimuke eshi ngepi namukondjerapo,haka Laodicea, nothingi thagho mbadi hamona rupara rwange panyama. ² Narughana mukutjokedha mitjima dhagho hadhirete pofotji muruhakitho no mughuyara ghoghutungi ghomakomweneno gho matjwathaneno, mughudimuki ghoghudhindo waNyambi ghomwaKristusi. ³ Mumwendi wonda ghutungi ghoghunyanyami noghudimuki. ⁴ Nakumutongwera yino podiyo shi noyofotjitemba mbogha mwangereka noyighamba yokumuhongaghuritha. ⁵ Ngambi kemo eshi mbadi nidi nenu panyama, ene nenu nidi pamupepo. Nahafa pakumona yikara yenu yoyiwa nomangcamu ghomatawero mwaKristusi. ⁶ Thikadi mwatambura Kristusi Jesusi gho Fumu, muyende mumwendi. ⁷ Mukuthimenene mumwendi, mukurere mumwendi, mutanare mumatawero thikadi hayimuhongire, no mwayara nomatumero. ⁸ Mumone eshi noyofotji temba ghakumukwata kupitera muyikuhonga noyangereka yonyaranyara kukutha mu thitjo thawanu, kukutha thirughanitho thomupepo ghokaye, nombadi kukutha Kristusi. ⁹ Mumwendi ghuyara ghoghuheya waNyambi yakara muyipo. ¹⁰ Hamuyaritha mumwendi, oyu ghadi eshi mutwi kupiterera kehe yuno muraghuri no muragho. ¹¹ Mumwendi namwe mwapwa kukena no makeneno agha ghapira kurughana munu mukutundithako nyama tho kuyirama, ene mumakeneno ghomwa Kristusi. ¹² Hakuvumbekire nendi padiyoghero,no hamuyeyure mumwendi kupitera mumatawero mungcamu dhaNyambi,oyu ghamuvumbure mwawafu. ¹³ Ghopa mwafire pamurandu ghomaharwero no kupira makeneno ghopa nyama, aye gha mututmine pofotji nendi nokututhiyerera twaheya maharwero ghetu. ¹⁴ Aye ne ghatundithirepo mughuyi agha hatjanga, agha ghatwimananyena nomiragho dhadho. Aye ghayishwayithirepo kupitera pakuyipamarera kuthikurushe. ¹⁵ Aye ghahakungurire haraghuri nawa kamuragho noghahaturire pambandha, ghawa hayithire pathikurushe. ¹⁶ Yodiyo eshi, mbadi ghakona kumupangura ghumwe kuyidya endi yinwa, ndi kuhatera kudifeste endi pakuterama kaghonda, ndi kuhatera kumayuwa ghoSabata. ¹⁷ Oyi ne ghomudhidhimbi ghoyinu yi yina keya, ene yune Kristusi. ¹⁸ Mbadi mwakona kutawedhera oyu ghanashana kumuyedhaghura no hakughihaEngeli hamupangure muku mutundithako kundjambi dhenu. Munu ghokemo ghengena muyinu yi ghamona no ghukununeka pakupira thitambo payighayara yendi yopa nyama. Mbadi ghakwata mutwi wendi. ¹⁹ Yoyishi kumutwi yipitere muyirama yoyiheya kate pa yakunungathanena ayo yakara no makurero agha ghatapa Nyambi. ²⁰ Ngeshi mwafire pofotji na Kristusi muyirughana yomupepo ghopakaye pano, nye muna kuparera thikadi kahima kaye: ²¹ ''Mwakwatako, nomwayere ndi mwakundamako''? ²² Yinu yoyiheya ne mboyina tundupo pakuyirughanitha kukutha mumarawero no mumahongo ghawanu. ²³ Miragho dhi dhakara noghudimuki ghomatawero gha hatenda hathinda nomakumbirupithero norupetho royirama ene mbadi yakara nomudyo,kumaghuwa ghoyirama.