¹ Mumayuva ghanya, kwakalireko nka likurumbunga, ntani vavo kapi vakalire nandya dakulya. Jesus ayita varongwa vendi avatantere ashi, ² " Ame kuna kufera nkenda mbunga yino, mukondashi vavo vanakara kare mayuva matatu kumwe name, vahana kulya. ³ Nange nivatuma vayende kumandi ghavo vahana kulya, kuvura vapwilire kundjara mundjira. Vamwe mukatji kavo kunatundu ghure.'' ⁴ Varongwa vendi avamulimburura, ''Kuni oko tuwana mboroto dakugwaneka mulivango lyamburundu lino tukutite vantu vano?'' ⁵ Ghuye avapura, ''Dimuntje damboroto ngashi munakara nado?'' Ava limburura ashi, ''Ntambiri.'' ⁶ Ghuye makura atantere Mbunga yishungire palivu. Aghupu dimuntje ntambiri, apandura Karunga, naku dibamaghura. Aditape kuvarongwa vendi vaditure kumeho yavo, ano vavo avaditapere mumbunga. ⁷ Vavo vakalire nantjwi dadisheshu dadididi, ano opo amanine kuditapera mpandu, atantere varongwa vaditapere nadonka waro. ⁸ Valire vakutire, ntani vapongayikiro ovyo vyahupaliroko vyakubamauka, vikumba vyavinene ntambiri. ⁹ Kawakalirepo vantu vakutika kunyara mayovi mane. makura avatumu vayende kumandi ghavo. ¹⁰ Mpopo tupu arondo muwato navarongwa vendi, avayendi kulidingonoko mukaunda wa Dalmanutha. ¹¹ Makura vaFariseyi avarupuka nakutameka kukukanana naye. Vavo kwashanine shiyivito shamuliwiru kukwendi, vamusheteke. ¹² Ashetere mwamunene mukukutura mutjima wendi nakughamba ashi, '' Morwanke runakushanena ruvharo rwantantani shiyivhito? Ghushiri nakumutantera ashi, kundereko shiyivhito osho ngavarupa ruvaro runo rwantantani.'' ¹³ Makura avashuvu, arondo nka muwato shimpe, nakuyenda musheli munya. ¹⁴ Makura varongwa vendi vavhuramine kushimbako mboroto opo varondire muwato. Kapi vakalire namuntje damboroto dakupitakana payimwe muwato. ¹⁵ Ghuye avarawiri, nakughamba ashi ''Takamitenu ntani munomene mu kukukunga ku vifulito vyava Fariseyi navifulito vyaHerodes. ¹⁶ Varongwa avakupurayere vavene na vavene, ''Mukonda mbyovi tunapiri mboroto.'' ¹⁷ Jesus avidimbwilire vino, mpo avatantilire ashi, ''Vinke munakuku nungawira vyakuhamena kupira mboroto? Nani kapi munavikwata lighano? Anwenka kapi munakuviyuvha, ndi? Dimutjima denu nani dakukuta? ¹⁸ Anwe mwakara namantjo, kapi mwamonanga ndi? mwakara namatwi kapi mwayuvanga ndi? kapi mwavurukanga? ¹⁹ Opo nabamwine dimuntje damboroto ntano mukatji kamayovi matano, vikumba vingashi vyayuliro vyaruhupwa vyamboroto dakubamaghuka olyo mwapongayikire. ''Avamutantere murongo navivili.'' ²⁰ Ano opo natetawire dimuntje ntano nambiri mukatji kamayovi mane, vikumba vingashi vyayuliro vyamboroto dakubamaghuka evi vapongayikire?'' Vavo avalimburura, ''vitano navivili.'' ²¹ Aghamba, ''Shimpe kapi munakuvikwata lighano?'' ²² Opo va yire kuBethsaida, vantu vamo kwayitire kwa Jesus mukafumu wamutwiku nakukushenga kwa Jesus amukwate. ²³ Jesus akwata kulighoko lyamutwiku amushapwite, nakumurupwita pandje yamukunda. Opo amutipilire pa mantjo ghendi akambeke maghoko ghendi papendi, amupura, ''Kuna kumona vintu kehevino ndi?'' ²⁴ Ghuye akankunka nakughamba ashi, ''Ame kuna kumona vantu vakufana yira vitondo vinakuyendo.'' ²⁵ Makura ghuye akambeke nka maghoko ghendi kumantjo ghamu kafumu unya, ano mukafumu mpo apahulire mantjo ghendi, makura mantjo ghendi agha mahuka, amono vininke navintje nawa-nawa. ²⁶ Jesus amutumu kumundi wendi nakumutantera ashi, ''Kapishi ghungene mudoropa.'' ²⁷ Jesus kwayendire navarongwa vendi mudimukunda da Kesareya Filipi. Mundjira a pura varongwa vendi ashi, ''Vantu omo vaghambanga ashi amere?'' ²⁸ Vavo avalimburura nakughamba ashi, ''Johanes muyoyi.'' Vamwe kughamba ashi, Elia ntani vamwe ashi ''Umwe wava porofete.'' ²⁹ Ghuye avapura, ''Makura anwe weni mwantwenyanga ashi ame are?'' Peturus aghamba kukwendi ashi, ''Ove Kristus.'' ³⁰ Jesus avarondora mukupira kuvitantera kehe ghuno vyakuhamena kukwendi. ³¹ Uye atameke kuvashonga ashi monamuntu ndje tupu kuhepa vininke vyavingi, ntani ghuye ngavamushwena kumutambura vakurona vambunga kriste nava Pristeli vavanene, novalirongi vamatjangwa, navatjangi, ntani ngavamudipagha, kuruku yamayuvha matatu ngavumbuka. ³² Ghuye kwaghambire mbudi oyo nawa-nawa ayikene. Makura Peturus amughupu amutware pampenge atameke kumu kwiyilira. ³³ Ano Jesusa apiruka akenge varongwa vendi atughumukire Peturusi nakughamba ashi, ''Nkarere kuruku yande Satana! kondashi ove kapi ghuna kutura maghano ghoye kwevi vya Karunga, ene ngoli kuvininke vya vantu.'' ³⁴ Makura ghuye mpo gha yitire mbunga yiponge kumwe navarongwa vendi, avatantere ashi, ''Nange kehe ghuno anashana kunkwama, uye ana kona kukudina mwene, adamune shikurushe shendi, ankwame. ³⁵ Mbyovoshi kehe uno ngashano kupopera monyo wendi, nga ghukombanita. ngoli ogho ngakombanito monyo wendi mukonda yande namukonda yambudi yaruhafo ndje ngaparuko. ³⁶ Vinke ngavi kwafa muntu mu kuweka Udjuni naghuntje ene ngoli akombanite monyo wendi? ³⁷ Vinke avura kutapa muntu muntjinto yamonyo wendi? ³⁸ Kehe ghuno amfango ntjoni nankango dande moruno ruvaro rwarushonda nandjo, mona muntu naye ngakamufita ntjoni apa ngaya mughuyerere wavashe nava Engeli vakupongoka.''