¹ Va Fariseyi navarongi matjangwa ovova tundiro ku Jerusalem kwayapongire kumwe naye vana mukundurukida. ² Vavo kwakengire varongwa vendi vamwemo kunakulya mboroto na maghoko ghakunyata, vahana kukukusha. ³ VaFariseyi nava Juda navantje kwakalire nampo ashi, vavo nakulyashi nange kapi vana kukushu kumaghoko. Morwa yayo kwakalire mpo yakushikuru shavo shakare. ⁴ Opo kava tundanga vaFariseyi kulivango lya maghulitiro, Vavo kapikava lyanga vahana ku kukusha, ntani vavo vakwatililire vininke vya vingi ovyo vatambulireko vya mpo yavo, yira vyakukusha nkinda, va poto, visha vyangorodo, na vipuna ovyo kavashungiranga. ⁵ VaFariseyi ntani nava kurongi matjangwa avaya nakupura Jesus ashi, ''Morwa nke, vana kupira kukwama mpo ya shikuru varongwa voye, morwa shi vavo kulya mboroto davo namaghoko ghakupira kukusha ?'' ⁶ Ghuye avalimburura ashi, ''Jesaya apumbire nawa kuhamena ku makukitaghukiro ghenu. Yira momo vavitjanga ashi, 'Avano vantu vamfumadeka na ngevho davo, ene ngoli dimutjima davo ure name. ⁷ Likangango lyamaghoko ghoko vampa, vavo kuronga dimuragho davantu ashi ngo mapuliro ghavo.' ⁸ Anwe kushuva muragho waKarunga na kukwama veta da pampo odo vatulitapo vantu.'' ⁹ Ghuye aghambanka kwavo ashi, ''Weni omo mushwena veta daKarunga mukwame vya mpo yenu? ¹⁰ Mbyo ngoli aghambilire Moses ashi, ''Fumadeka vasho navaNyoko; ntani, 'Kehe uno waku ghamba vyavidona kuhamena kuVashe ndi Vawina nakuparukashi, ghuye ndje tupu kufa.' ¹¹ Eno ngoli anwe kughamba ashi, 'Nange muntu a ghamba kuvashe ndi vawina ashi, ''Kehe yino mbatero wakara nayo ya kutunda kwandene likudjambero lya naumwande'' (Kutanta ashi Shitapa sha Karunga'), ¹² makura ghuye kapi mumupulitira adire kuruwanena kehevino vashe ndi Vawina. ¹³ Anwe kwarenkita nkango daKarunga dikare yira kundereko mulyo, mukonda ya mpo yenu oyo mwahanita. ntani navininke vimwe ovyo mwaruwananga.'' ¹⁴ Ghuye Ayitanka waro mbunga yayinene nakuvatantera ashi, '''Nteghererenu, namuvantje, ntani muvikwate lighano. ¹⁵ Kundereko shaku tunda pandje ya rutu rwa muntu shakuvura kumunyateka opo shingena mumwendi. Nani ngoli osho shatundango mumunntu ntjo shamunyatekango. ¹⁶ Ogho akaro namatwi, ayuve. ¹⁷ Opo atundire Jesus pa mbunga angene mumundi, varongwa vendi ava mupura kuhamena kushifanekito. ¹⁸ Jesus aghamba ashi, ''Nanwe kapi munavikwata lighano? Kehevino vya kungena munda ya muntu kwato kumu nyateka, ¹⁹ kondashi kapi viyenda mumutjima wendi, ano ngoli vyavyo kungena mulipumba lyendi ntani kapita viyende pandje?'' Na nkango dino Jesus kwavikenitire ashi ndya nadintje dakena. ²⁰ Ghuye aghamba ashi, ''Ovyo vya tundango mumuntu mbyo vyakumu nyateka. ²¹ Kondashi vyamunda ya muntu, ku tunda kumu tjima, kurupukamo maghayarodona, runtjo, widi, kudipagha, ²² kushondera, lidovo, vighayara dona, kuhora vikuhafita vya parutu, mantjo gha nyanya, kurundira, likunenepito, lipiro ndunge. ²³ Maudona naghantje ghano kwa tundanga munda yamuntu, ntani mbyo nka vya nyatekango muntu.'' ²⁴ Ghuye makura ashapukapo naku tundupo panya ayendi kulidingonoko mukunda lya Tyre na Sidon. Munya mpo akangenine mundjugho, ntani kapi ashanine kehe ghuno ayive ashi kuni anakara, ene ngoli kapi vavulire kumuhoreka. ²⁵ Yira momu vyashwa kushoroka, opo tupu amuyuvire mugholikadi ogho akaliro namonendi wa mukadona ogho dakwatire mpepo dadidona, mpo ayire nakuyawera kumpadi dendi. ²⁶ Mukamali unya kwa kalire warudi rwa vaGereka, ghuye ntundiliro yendi muSyrophoenician. Ghuye amukanderere akatjide mpepo dadidona ditundemo mwamonendi. ²⁷ Ghuye aghamba kwendi ashi, ''Pulitirenu tanko vanuke valye. Mukondashi kapi vya wapa muku ghupa mboroto davanuke ntani kadivukumina mbwa.'' ²⁸ Mukamali amu limburura nakughamba ashi, ''Nhii, Hompa, nampili mbwa dakuntji ya ntishe nado kulya vighufefere vya ndya davanuke.'' ²⁹ Ghuye aghamba kwendi ashi, ''Konda yavyo unaghamba, ove unamanguruka mukayenda. Mpepo dakunyata dinatundumo mwamonoye.'' ³⁰ Mukamali unya avyuka mundjugho yendi akawana mwanuke ghuye anarara pa mbete, dado mpepo dadidona dinamutundu. ³¹ Makura atundumo nka mulidingonoko mukunda lya Tire, ntani apitiri mu Sidoni ayende kulifuta lya Galileya a kanduke mulidingonoko mukunda lya Dekapolis. ³² Vavo ava muyitiri shipururu-puru ogho akaliro naghudito mukughamba, nano avamukandelire mukuyenda aka kambeke maghoko ghendi pendi. ³³ Makura amuupupo amutwara kumpenge, atura nyara dendi kumatwi ghendi, ntani atipi nakuguma ruraka rwendi. ³⁴ Makura aliyamene akenge kuliwiru, nakumutantera, ''Ephpthatha,'' ovyo vinakutanto ashi, ''Gharura!'' ³⁵ Mpopo matwi ghendi agha gharuka, likumango rwa ruraka rwendi naro arumangurukira, nakuvareka kughamba nawa nawa. ³⁶ Jesus ava rawiri ashi kundereko ogho avi tantero vantu. Ngoli vavo mpo avavihanitire unene. ³⁷ Vavo vyava tetukitire ngudu, nakughamba ashi, ''Ana ruwana navintje mughuhunga. Ghuye nka kurenka vakufamatwi vayuve, vakupira kughamba vaghambe.''