¹ Ê da ma, setu djá, Jizu tia ka xina povo ni guêsa i ka fa di vangelhu; ê vita sefi Sacerdoti i Escriba, ki ané Acion ² i punta fá nó: "Kuali porê bô ka zi ané kuê? Ê nguê da Sê pôrê sé"? ³ Ê Kundji ané: "Hun també ka puta sê: "Fá Hun ⁴ batizu di Zon sá d'océ ô di homé"? ⁵ Ané tia ka keta ki ané mé, ka fa: "Si sê kudji: 'd'océ', Ê ka fá: 'punda kuai sê na kia kêlê nê wa? ⁶ Magi si sê fa: 'di homé', turu pôvô ka da nó ki buru, punda bô sa setu ma Zon Batista sa profeta". ⁷ Antó ané kudji ma ané na tá angi ê sa wa. ⁸ Jizu fa ané: "Nê an na ka fa sê kuali pôrê ma an ka ané kué kuê". ⁹ Jizu ka komesa ka konta pôvô ané vesu né: "Uã homé kuna uã vinha, lendé da nguê ki ka zivi i siê fo tia yô djá. ¹⁰ Siga uã djá ê manda uã sevili lekaru da né nguê ki ka zi ya pê dê uã kuê di vinha. Magi ê beté i mandé beré dingui mó secu. ¹¹ Antó ê tô manda otô na lekaru da né nguê, magi nguê beté, zipocaré ê tô mandé dingui mó secu. ¹² Ê tô manda zi têsê vê, magi ané légé kolekuê. ¹³ Anto donu di vinha fá: 'kua nga zi? nga manda mosu hun amaru. Ê ka pô respeité'. ¹⁴ Magi ola ma ngué ka zi viê bê, ané keta ki ané mé, fa: 'Sê sá donu. bá nó maté pa nó sa donu'. ¹⁵ Ané kolé kuê ni vinha i maté. Kua ané ka zi, da donu di vinha? ¹⁶ Ê ka bi daná nguê sa zi vié da otô nguê vinha. Ola ma ané ndê kuê, ané fá: "ma kuê na ka da wa"! ¹⁷ Magi Jizu bia ané fa: "kuê sa kuai ki sa kêveru: 'Buru ma consttutoru zeta bila buru ngola'? ¹⁸ Turu nguê ki ka kiê diba buru ê ka fika ngigue, nguê mé ka kiê diba rê ê ka bila ompô". ¹⁹ Ni oré ê, escriba e ané sefi sacerdoti ngôló uã moru pa tê pesu, punda ndê ma vesu mê tia faru sa da ané. Magi ané mendu pôvô. ²⁰ Ê diê ki kuiraru, manda vijaru, findji di nguê buaru, pa pie si a ka bê ni fa rê, ê dé juridiku i purê di govenu. ²¹ Antó ané punté fa: "Mêsé, nó ta mó ka fa i xina buaru i na ka zi kua mora nguê wa, magi ka xina mondja Desu ki veré. ²² Ê na sa buaru paga impostu da Césa ô inó? ²³ Magi Jizu ndê stusia ané ê fa: ²⁴ "Musa Hun uã denáru. Di nguêi sa figula eskeveru né?" Ê ané kudji: "Sé Césa" ²⁵ Jizu fa: "Antó da Césa kua di Césa da Desu kua di Desu". ²⁶ Ê ané na bê né uã fala mali rê wa ni wê pôvô, magi spantaru ki kua mé kundji ane ka boka. ²⁷ Otô sacerdoti xiga zuntu rê, ki tia ka fa nguê motxi na ka lata wa, ²⁸ a punté fa: "Mésê, Muzezi desa da nó skeveru si, manu di uã nguê muê, sá kasaru ê na tê ná ua, ê sa pê tua mora mengai rê viúva ê da ná da manú ré. ^{29 33} Ê tia seté mano. Pimelu kasaru ê muê sê nó; ³⁰ segundu tembé ³¹ i sô tesê kasa ki viuva, e turu seté ê, tembé na desa nawa ê muê loke. ³² Ê mengai tembé muê. Antó ni lata di kuali ané ê ka ba sá mengai rê? Punda turu nguê ê tia kuê mora mengai?" ³⁴ Jizu fá ané: "Na di tiê ka kasa ê to dá ni casaru. ³⁵ Magi nguê sá zugaru buaru di tê nguê sa ê ka tê resureson katxi motxi a ná ka kasa wa né ané ka dá ni kasaru wa. ³⁶ Ané na ká tô muê dingui wa, punda ané sa mora ansu ku sá na Desu, sa na di resureson. ³⁷ Punda nguê motxi ka lata, mora ma Muzezi fa tembé ni luguê di sarça ki tia ka deiê, me ka sama Sun Desu di Abron, Desu di Isaqui, i Desu di Jacó. ³⁸ Desu na sa Desu di motxi wa, magi di vivu, punda da Elê turu nguê ka vivé". ³⁹ Ané escriba fá: "Mésê, kundji buaru". ⁴⁰ Ané na tô puté wa. ⁴¹ Magi Jizu putá ané: "Ma sê ka pô fa ma Kristu na mosu di Davi? ⁴² Punda popé Davi fa ni livu di Salmu: "Sun fa da Sun mu: "Tasó direta hun, ⁴³ até hun nga pê numigu ni mondja di Ôpé ! ⁴⁴ Si Davi ka sama Kristu di Sun, ma Ê ka pô sa mosu rê?" ⁴⁵ Ê má turu pôvô tia ka ndê, ê fa dá ané nkenu re: ⁴⁶ kuidaru kê ané escriba, ki ka gosta nda ki tunika, gosta di mantha ni kua, banco maxi buaru ni sinagoga ê pimelu luguê ni banquetu, ⁴⁷ ki ka dana kai viuva, ki fa di orason motxi: Ané é ka tua uã uã connaru motxi maxi glavi.