¹ Ngesikhatsi Jesu ati kutsi baFarisi sebevile kutsi bekenta futsi abhabhatisa bafundzi labanyenti kuna Johane ² (noma Jesu lucobo lwakhe abengabhabhatisi, kepha bafundzi bakhe bebabhabhatisa), ³ wayishiya iJudiya wabuyela emuva futsi eGalile. ⁴ Kepha bekumcoka kuye kutsi ahambe ngase Samariya. ⁵ Ngako wefika edolobheni lase Samariya lelibitwa ngekutsi iSikhari, dvutane nesiceshana sendzawo lena Jakobe layinika indvodzana yakhe Josefa. ⁶ Umtfombo waJakobe bewulapho. Jesu asakhatsele kuloluhambo lwakhe wahlala ngakulomtfombo. Bekucishe kube lihora lesitfupha. ⁷ Umfati wemSamariya weta kutowukha emanti, Jesu watsi kuye, ''Nginike emanti ngitonatsa.'' ⁸ Ngoba bafundzi bakhe bebasaye edolobheni kuyotsenga kudla. ⁹ Lomfati wemSamariya watsi kuye, ''Kanjani kutsi wena, ungumJuda ucela mine ngingumfati wemSamariya, lutfo lekunatsa?'' Ngoba emaJuda ete kusebentsisana nemaSamariya. ¹⁰ Jesu waphendvula watsi kuye, ''Kube bowusati sipho saNkulunkulu, nekutsi ngubani lolotsi kuwe, 'Nginike sinatfo,' ngabe ucele kuye, futsi ngabe ukunike emanti ekuphila.'' ¹¹ Lomfati watsi kuye, ''Mnumzane, ute libhakede futsi lomtfombo uyashona. Akuphi lamanti akho ekuphila? ¹² Awusimkhulu, umkhulu, kunababe wetfu Jakobe, lowasinika lomtfombo futsi wanatsa kuwo lucobo lwakhe, yena nemadvodzana akhe nemfuyo yakhe?'' ¹³ Jesu waphendvula watsi kuye, ''Wonkhe lonatsa kulamanti lawa utawuphindze ome futsi, ¹⁴ kepha loyo lonatsa kulamanti lengitomnika wona ngeke aphindze ome. Esikhundleni, lamanti lengiyomnika wona ayawuba ngumtfombo wemanti kuye, aphuphume kube kuphila kwaphakadze.'' ¹⁵ Lomfati watsi kuye, ''mnumzane nginikete lamanti kute nginganawukoma nekutsi ngingaphindzi ngite la emtfonjeni kutokha emanti.'' ¹⁶ Jesu watsi kuye,'' hamba uyobita indvodza yakho, ute nayo lapha.'' ¹⁷ Lomfati wamphendvula watsi kuye .'' ngite indvodza.'' Jesu wamphendvula watsi, ucinisile uma utsi awunayo indvodza,'' ¹⁸ Ngoba uke waba nemadvodza lasihlanu, nyalo lonayo manje akusiyo yakho. loku lokushilo kuliciniso. ¹⁹ Lomfati watsi kuye, ''mnumzane ngiyabona kutsi ungumphrofethi. ²⁰ Bobabe betfu bebakhontela kulentsaba, kepha nine nitsi i-Jerusalema yindzawo lapho bantfu kumele bakhonte khona.'' ²¹ Jesu watsi kulomfati, ''Ngikholwe, mfati, kutsi liyeta lihora lapho nitodvumisa Babe hhayi kulentsaba noma eJerusalema. ²² Nine nidvumisa leningakwati. Tsine sidvumisa lesikwatiko, ngoba insindziso ivela kumaJuda. ²³ Noko ke, lihora liyeta, futsi ke selifikile, uma bantfu lapho labadvumisako batodvumisa Babe ngeliciniso nangamoya, ngoba Babe ufuna bantfu labanjalo labatamdvumisa. ²⁴ Nkulunkulu ungu Moya, futsi bantfu labamdvumisako kufanele bamdvumise ngamoya nangeliciniso. ²⁵ Lomfati watsi kuye, ''Ngiyati kutsi Mesiya uyeta (loyo lobitwa ngekutsi Khristu). Uma eta utawusichazela konkhe.'' ²⁶ Jesu watsi kuye. ''Nginguye, lona lokhuluma nawe.'' ²⁷ Kuleso sikhatsi bafundzi bakhe babuya. Manje bebatibuta kutsi ukhulumelani newesifazane, kepha kute lowatsi, ''Ufunani?'' noma ''Ukhulumelani naye?'' ²⁸ Ngako lomfati washiya imbita yemanti, wabuyela emuva edolobheni, wafika watsi kubantfu, ²⁹ ''Wotani, nitobona lomuntfu longitjele konkhe lengikwentile. Ngeke kube ngu Khristu, kungenteka yini?'' ³⁰ Bashiya lidolobha base beta kuye. ³¹ Kulesikhatsi, bafundzi bakhe bebamncenga, batsi, '''Rabi, dlani.'' ³² Kepha watsi kubo, ''Nginako kudla lengikudlako nine leningati ngako.'' ³³ Ngako bafundzi bakhe bakhuluma lomunye kulomunye, ''Ngabe kukhona lomletsele latokudla, bakhona yini?'' ³⁴ Jesu watsi kubo, ''Kudla kwami kwenta intsandvo yaloyo longitfumile nekutsi ngiwucedze umsebenti wakhe. ³⁵ Anisho yini kutsi, 'Kunetinyanga letine futsi, bese kuta sivuno'? Ngitsi kini, bukani etulu nibone emasimu, ngoba alungele kuvunwa! ³⁶ Loyo lovunako wemukela liholo futsi abutsise titselo temphilo yaphakadze, kute kutsi loyo lohlanyelako naloyo lovunako batfokote kanyekanye. ³⁷ Ngoba Kulesisho, kuliciniso kutsi, 'lomunye uyahlanyela lomunye avune'. ³⁸ Nganitfuma kutsi niyovuna leningakakusebenteli. Labanye basebentile, nine nivele nangena emsebentini wabo. ³⁹ Lamanyenti emaSamariya kulelo dolobha akholwa ngulombiko lowafakazelwa ngulomfati ngaJesu, ''Ungitjele konkhe lengikwentile.'' ⁴⁰ Ngako uma lamaSamariya eta kuye, bamcela kutsi ahlale nabo, wase uhlala emalanga lamabili. ⁴¹ Labanyenti futsi bakholwa ngenca yelivi lakhe. ⁴² Batsi kulomfati, ''Asisakholwa ngenca yalokushito, kepha kungenca yalesikuvile, futsi siyati kutsi impela lona ngumsindzisi walomhlaba.'' ⁴³ Emvakwemalanga lamabili, wabashiya waya eGalile. ⁴⁴ NaJesu lucobo lwakhe wamemetela kutsi umphrofethi ngeke ahlonishwe eveni lakubo. ⁴⁵ Uma efika eGalile, bantfu base Galile bamemukela. Bebabone tonkhe letintfo latenta edzilini laseJerusalema, njengoba nabo bebayile kulelidzili. ⁴⁶ Weta eKhana lase Galile, lapho wenta emanti liwayini. Bekunemuntfu lotsite wase bukhosini lebekanendvodzana lebeyigulela eKhaphenawume. ⁴⁷ Uma eva kutsi Jesu ubuya eJudiya uya eGalile, waya kuJesu wacela kutsi ehlele phasi aphilise indvodzana yakhe, lebeseyitokufa. ⁴⁸ Jesu watsi kuye, ''Ngaphandle kwekutsi nibone tibonakaliso netimangaliso, ngeke nikholwe.'' ⁴⁹ Lowasebukhosini watsi kuye, ''Mnumzane, wota indvodzana yami ingakafi.'' ⁵⁰ Jesu watsi kuye, '' Hamba. Indvodzana yakho iyaphila.'' Lendvodza yawakholwa lamavi lashiwo nguJesu kuye, yase iyahamba. ⁵¹ Ngesikhatsi asahamba aya entasi, tisebenti takhe tahlangana naye, tamtjela kutsi indvodzana yakhe iyaphila. ⁵² Ngako wababuta lelihora ngesikhatsi lacale ngaso kululama. Bamphendvula, ''Itolo ngelihora lesikhombisa lomkhuhlane wamushiya.'' ⁵³ Lobabe wakhumbula kutsi bekungulelihora lakhuluma ngaloJesu, ''Indvodzana yakho iyaphila.'' Ngako yena cobo lwakhe nato tonkhe tisebenti takhe takholwa. ⁵⁴ Lesi bekusibonakaliso sesibili Jesu lasenta uma aphuma eJudiya kuya eGalile.