¹ BekunemFarisi ligama lakhe bekungu Nikhodimasi, umholi wemaJuda. ² Lendvodza yeta kuJesu ebusuku yatsi kuye, ''Mfundzisi, siyati kwekutsi ungumfundzisi lowachamuka kuNkulunkulu, ngoba kute longenta letibonakaliso lotentako ngaphandle nangabe Nkulunkulu anaye.'' ³ Jesu waphendvula kuye, ''Ngicinisile, ngicinisile, ngaphandle umuntfu atalwe ngekwesibili, angeke awubone umbuso waNkulunkulu.'' ⁴ Nikhodimasi watsi kuye, '''Angatalwa kanjani umuntfu asamdzala na? Angeke angene kwesibili esibeletfweni sa make wakhe abese uyatalwa, angakhona na?'' ⁵ Jesu waphendvula, ''Ngicisile, ngicinisile, ngaphandle umuntfu atalwe ngemanti nangaMoya, angeke angene embusweni waNkulunkulu. ⁶ Loko lokutelwe ngenyama kuyinyama, naloko lokutelwe ngeMoya kunguMoya. ⁷ Ningamangali ngekutsi ngitse kini, ''Nimelwe kutalwa kabusha.' ⁸ Umoya uhhusha lapho ufise khona; uyawuva umsindvo wawo, kepha awati kutsi ubuyaphi noma uyaphi. Unjalo wonkhe lotelwe ngaMoya.'' ⁹ Nikhodimasi wamphendvula watsi, ''Tingaba kanjani letintfo leti?'' ¹⁰ Jesu waphendvula watsi kuye, ''Ungumfundzisi waka Israyeli. kepha noko ube ungaticondzi letintfo leti? ¹¹ Ngicinisile, ngicinisile, ngitsi kuwe, sikhuluma lesikwatiko, siphindze sifakaze ngalesikubonile. Kepha anibemukeli bufakazi betfu. ¹² Kube benginganitjela ngetintfo temhlaba ningete nakholwa, nitawukholwa kanjani uma nginitjela ngetintfo tasezulwini? ¹³ Kute lonyukele ezulwini ngaphandle kwakhe lowehla achamuka ezulwini, INdzodzana yeMuntfu. ¹⁴ Njengaloku Mose aphakamisa inyoka ehlane, kanjalo neNdvodzana Yemuntfu kumele iphakanyiselwe etulu, ¹⁵ kute bonkhe labakholwa kuye babe nekuphila lokunguna phakadze. ¹⁶ Nkulunkulu wawutsandza umhlaba kangaka, wate wanikela ngeNdvodzana yakhe leyayiyodvwa, kute wonkhe lokholwa kuyo angafi kepha abe nekuphila lokuphakadze. ¹⁷ Ngoba Nkulunkulu akatfumelanga iNdvodzana emhlabeni kute itokwehlulela umhlaba, kepha kute atewusindzisa umhlaba ngayo. ¹⁸ Loyo lokholwa kuye akehlulelwa, kepha loyo longakholwa sewuvele wehlulelwe ngoba angakholwanga egameni leNdvodzana yaNkulunkulu leyodvwa. ¹⁹ Lesi sizatfu sekwehlulela: Kukhanya sekufikile emhlabeni, bantfu batsandza bumnyama kunekukhanya ngoba tento tabo tatitimbi. ²⁰ Ngoba wonkhe lowenta lokubi uyakwenyanya kukhanya, futsi akaphumeli ekukhanyeni, kute tento takhe tingetowuvela ebaleni. ²¹ Kepha, lowenta liciniso uvela ekukhanyeni kute kutobonakala kutsi imisebenti yakhe yentiwe kuNkulunkulu.'' ²² Emva kwaloko, Jesu nebafundzi bakhe baya eveni lase Judiya. Lapho wahlala nabo waphindze wabhabhatisa. ²³ NaJohane bekabhabhatisa eAyenoni dvutane nase Salimi ngobe bekunemanti lamanyenti khona. Bantfu bebeta kuye batobhabhatiswa, ²⁴ ngoba Johane abesengakaphonswa ejele. ²⁵ Kwase kuba nekuhishana emkhatsini walabanye bafundzi baJohane nemJuda mayelana nekuhlambulula ngekwemkhosi. ²⁶ Baya ku Johane batsi, ''Mfundzisi, loyo bekanawe ngesheya kwemfula iJodane, loyo lofakaze ngaye, buka, uyabhabhatisa, futsi bonkhe baya kuye. ²⁷ Johane waphendvula watsi, ''Umuntfu angeke atfole lutfo ngaphandle nangabe kuniketwe kuye kuchamuka ezulwini. ²⁸ Nine matfupha ningafakaza kutsi ngatsi, 'Angisuye loKhristu,' kepha esikhundleni, 'Ngitfunyelwe ngaphambi kwakhe.'' ²⁹ Makoti ngewemkhwenyana. Nyalo umngani wemkhwenyana, lomako aphindze amuve, ujabula kakhulu ngenca yelivi lemkhwenyana. Loku, ke, yinjabulo yami yentiwe yaphelela. ³⁰ Kumele akhule, mine nginciphe. ³¹ Loyo lochamuka ngetulu ungetulu kwako konkhe. Loyo lochamuka emhlabeni wasemhlabeni futsi ukhuluma ngemhlaba. Loyo lochamuka ezulwini ungetulu kwako konkhe. ³² Ufakaza ngalakubonile nalakuvile, kepha kute lowemukela bufakazi bakhe. ³³ Loyo lowemukele bufakazi bakhe sewucinisekile kutsi Nkulunkulu uliciniso. ³⁴ Ngoba loyo lotfunyelwe nguNkulunkulu ukhuluma emavi aNkulunkulu. Ngoba akaniketi uMoya ngekulinganisa. ³⁵ Babe uyayitsandza Indvodzana futsi uniketele tonkhe tintfo esandleni sayo. ³⁶ Loyo lokholwa kuyo INdvodzana unekuphila lokuphakadze, kepha loyo longayilaleli Indvodzana angeke akubone kuphila, kepha lulaka lwaNkulunkulu luhlala etikwakhe.''