¹ Kwatsi ekuseni ngeluvivi elangeni lekucala leliviki, Kuse semnyama, Mariya wase magadala weta ethuneni wabona litje lisusiwe ethuneni. ² Ngako ke wagijima weta ku Simoni Phetro nakumunye umfundzi labatsandvwa ngu Jesu, Watsi kubo, ''Bayitsetse inkhosi ethuneni, futsi asati kutsi bambeke kuphi.'' ³ Ngako ke Phetro nalolomunye umfundzi baphumela ngaphandle, bahamba baya ethuneni. ⁴ Bobabili bagijima kanye kanye lolomunye umfundzi waphangisa wagijima ngembili kwa Phetro wafika kucala ethuneni. ⁵ wagobondzela, wabona tembatfo tihleli lapha, kepha akangenanga ngekhatsi. ⁶ Simoni Phetro wase uyefika emva kwakhe wangena ethuneni. Wabona tembatfo tihleli lapha ⁷ kanye netembatfo betisenhloko yakhe. Betingakahlali naleletinye tembatfo kepha betigocotwe tabekwa todvwa endzaweni lenye. ⁸ Kwatsi lolomunye umfundzi, lona lowafika kucala ethuneni, naye wangena ngekhatsi, wase uyabona phindze wakholwa. ⁹ Phela kute kube nguleso sikhatsi bebangati kutsi umbhalo utsi utovuka ekufeni. ¹⁰ Ngako labafundzi babuyela emuva ekhaya. ¹¹ Kepha Mariya bekeme ngaphandle kwelithuna akhala. Ngesikhatsi akhala, waguca phasi ethuneni. ¹² Wabona tingilozi letimbili tigcoke lokumhlophe tihleti, lenye enhloko, lenye etinyaweni lapho umtimba waJesu bewukhonakhona. ¹³ Tatsi kuye, ''Mfati, ukhalelani?'' Watsi kuto, ''ngobe batsetse Inkhosi yami, futsi angati kutsi bambekephi.'' ¹⁴ Watsi sekakhulume loku, wagucuka wase ubona Jesu eme khona lapho, kepha beka ngati kutsi nguJesu. ¹⁵ Jesu watsi kuye, ''Mfati,Ukhalelani? Ngubani lomfunako?'' Wacabanga kutsi sisebenti sase ngadzeni, ngako watsi kuye, ''Mnumzane, nangabe umsusile lana, ngitjele kutsi umbekephi, khona ngitoyomtsatsa.'' ¹⁶ Jesu watsi kuye, ''Mariya.'' Wagucuka, watsi kuye ngesi Aramu, ''Mfundzisi.'' ¹⁷ Jesu watsi kuye, ''Ungangitsintsi, ngobe ngisekayi etulu kuBabe, kepha hamba kubomnaketfu utsi kubo ngitawuhamba ngiye etulu kuBabe wami naku Babe wenu, kuNkulunkulu wami na Nkulunkulu wenu.'' ¹⁸ Mariya wase Magadala weta watjela bafundzi, ''Ngiyibonile Inkhosi,'' nanekutsi ikhulume letinfto kuye. ¹⁹ Ebusuku ngalelo langa, ngelilanga lekucala leliviki, iminyango yayikhiyiwe lapho bafundzi bebesaba emaJuda, Jesu weta wase uma emkhatsini wabo wase utsi kubo, ''Kuthula akube kini.'' ²⁰ Emva kwekutsi asho loku, wabakhombisa tandla takhe kanye neluhlangotsi lwakhe. Labafundzi batfokota nababona Inkhosi. ²¹ Jesu watsi kubo futsi, ''Kuthula akube kini. Njengaloku Babe angitfumile, kanjalo ngiyanitfuma nine.'' ²² Ngesikhatsi Jesu asho loku, waphefumulela kubo wase sewutsi kubo, ''Mukelani Moya Longcwele.'' ²³ Noma ngubani lononako nimcolele, ucolelwe; loyo lochubeka anona, ningamcoleli, akacolelwa ke.'' ²⁴ Tomasi, munye walabalishumi nakubili, lobitwa ngaDidimu, bekangekho ngesikhatsi Jesu efika ekucaleni. ²⁵ Lalabanye bafundzi batsi kuye, ''Sibone Inkhosi.'' Watsi kubo, ''ngaphandle ngibone etandleni timbobo tetipikili, bese ngifaka sandla sami emhlubulweni wakhe, ngeke ngikholwe.'' ²⁶ Emva kwemalanga lasiphohlongo bafundzi bakhe bebangekhatsi futsi, NaTomasi abe nabo. Jesu wefika ngesikhatsi iminyango ivaliwe, wema nabo, wase utsi, ''Kuthula akube kini.'' ²⁷ Wase utsi kuTomasi, ''Faka lapha iminwe yakho bese ubona tandla tami. Faka sandla sakho eluhlangotsini lwami. Yekela kungakholwa, kepha kholwa.'' ²⁸ Tomasi waphendvula watsi kuye, ''Nkhosi yami naNkulunkulu wami.'' ²⁹ Jesu watsi kuye, ''Ngobe ungibonile, sewuyakholwa. Babusisiswe labo labangakaboni, kodvwa bayakholwa.'' ³⁰ Jesu ke wenta imimangaliso leminye leminyenti phambi kwebafundzi, imimangaliso lengakabhalwa kulencwandzi, ³¹ kepha loku kubhaliwe kute kutsi nikholwe kutsi Jesu ungu Khristu, Indvodzana yaNkulunkulu, nekutsi nanikholwa, nitoba nekuphila egameni lakhe.