¹ Pilatu wase utsatsa Jesu wamshaya. ² Emasotja amlukela umchele wemanyeva. Bayibeka enhloko yaJesu bamgcokisa ingubo lebukhwebeletane. ³ Beta kuye batsi, "Bayethe, Nkhosi yemaJuda!" base bayamshaya. ⁴ Pilatu waya ngaphandle futsi watsi kubo, "Bukani, ngimuletsa langaphandle kini khona nitokwati kutsi angitfoli licala kuye." ⁵ Ngako ke Jesu waphuma, afake umchele wemanyeva kanye nengubo lebukhwebeletane. Pilato watsi kubo, "Bukani, nangu lomuntfu!" ⁶ Ngako ke baphristi labakhulu kanye netiphatsi mandla nabambona Jesu, bakhala batsi, " Mbetseleni, Mbetseleni! "Pilatu watsi kubo, "Mtsatseni nimbetsele nine, ngoba angitfoli licala kuye." ⁷ EmaJuda amphendvula, "Sinemtsetfo, futsi ngekwemtsetfo kufanele kutsi afe ngoba utenta Indvodzana yaNkulunkulu." ⁸ Pilato nakeva loku, wesaba kakhulu, futsi ⁹ wangena emahhovisi embuso futsi watsi kuJesu, "Ubuyaphi?" Kodvwa Jesu akamphendvulanga. ¹⁰ Wase Pilato utsi kuye, "Awukhulumi nami? Awati yini kutsi nginemandla ekukukhulula, futsi nemandla ekukubetsela? " ¹¹ Jesu wamphendvula, "Kute emandla lonawo etikwami ngaphandle kwaloko lonikwe kona kusuka etulu. Ngako ke, loyo longinikele kuwe unesono lesikhulu." ¹² Kulemphendvulo, Pilato wetama kumkhulula, kodvwa emaJuda akhala, atsi, "Nawukhulula lendvodza, awusuye umngani waKhesari.Wonkhe muntfu lotenta inkhosi ukhuluma amelane naKhesari." ¹³ Pilatu nakeva lamagama, waletsa Jesu ngaphandle wahlala esihlalweni sekuhlulela lesibitwa "ngendzawo leyilwe ngematje ", kodvwa ngesiHebheru ibitwa, "ngeGabatha." ¹⁴ Nyalo kwakusikhatsi sekulungiselela liphasika, ngetikhatsi telihora lesitfupha. Pilatu watsi kumaJuda, "Bukani, nayi inkhosi yenu!" ¹⁵ Bakhala, " Mtsatseni, mtsatseni, akabetselwe! "Pilatu watsi kubo, "Ngiyibetsele yini Inkhosi yenu?" Baphristi labakhulu baphendvula, "Tsine site inkhosi ngaphandle kwaKhesari." ¹⁶ Wase Pilatu ubanika Jesu kutsi bambetsele. ¹⁷ Base bayamtsatsa Jesu, waphuma, atiphatsele siphambano, endzaweni lebekutsiwa "indzawo yesikobho, " lokungesiHebheru kubitwa "iGolgotha." ¹⁸ Bambetselela lapho, kanye naye nalamanye emadvodza lababili, ngapha nangapha, Jesu asemkhatsini. ¹⁹ Pilat wabhala luphawu walubeka esiphambanweni. Bekubhalwe ; JESU WASENAZARETHA, INKHOSI YEMAJUDA. ²⁰ EmaJuda lamaningi alufundza loluphawu ngoba lendzawo Jesu labambetsela kuyo yayidvute nelidolobha lelikhulu. Loluphawu lwawubhalwe ngesiHebheru, si-Lathini, kanye nesiGrikhi. ²¹ Umhpristi lomkhulu wemaJuda watsi kuPilatu, "Ungabhali, 'Inkhosi yemaJuda' kepha, 'Lona watsi, "NgiyiNkhosi yemaJuda.'" ²² Pilatu waphendvula, "Loko lengikubhalile ngikubhalile." ²³ Emasotja nasambetsele Jesu, batsatsa timphahla takhe batehlukanisa eticukwini letine, sinye samunye ngamunye wabo; ngisho nayo lengubo. Lengubo yayite umtfungo, yayentiwe ngendvwangu yinye kusukela etulu. ²⁴ Base batsi kumunye ngamunye, "Asingayidzabuli, asijike emadayisi sitobona kutsi itoba yabani." Loku kwenteka khona umbhalo utofezeka lolotsi, "Behlukanisa timphahla tami bajika emadayisi bajikela timphahla tami." Loku ngulokwentiwa masotja. ²⁵ Labebememe eceleni kwesiphambano saJesu bekungumake wakhe, dzadze wabomake wakhe, Mariya umkaKlophasi, kanye naMariya Magdalena. ²⁶ Kwatsi Jesu abona unina kanye nemfundzi lamtsandzako bemile edvute, ²⁷ watsi kunina, "Mfati, buka, indvodzana yakho!" Wabese utsi kumfundzi wakhe, 'bona unyoko!' Ngalelo hora umfundzi wamtsatsa wamyisa ekhaya lakhe. ²⁸ Emvakwaloku, ati kutsi yonkhe intfo yaseyiphelele futsi khona umbhalo utofezela, Jesu watsi, "Ngomile." ²⁹ Lijeke leliwayini lelimunyu lalibekiwe lapho, ngako ke bafaka sipontji basichoma egaleni lehisophi baliphakamisela emlonyeni wakhe. ³⁰ Jesu nase anatse leliwayini lelimunyu, watsi, "Sekuphelele. "Wagebisa inhloko yakhe wayekela umphefumulo wakhe. ³¹ Kwase kutsi emaJuda, ngoba kwakulilanga lekulungiselela, futsi ngoba umtimba wakhe angeke uhlale esiphambanweni ngeliSabatha ( ngoba lelo Sabatha lalimcoka kakhulu), ³² bacela Pilatu kutsi babephule imilente yabo bese bayabesusa. Emasotja ase ayeta aphula imilente yalendvodza yekucala kanye neyesibili lebebabetselwe naJesu. ³³ Nabeta kuJesu, babona kutsi abesavele afile, ngako ke abayephulanga imilente yakhe. ³⁴ Kodvwa ke linye lalamasotja lamgwaza ngesikhali ehlangotsini, masinyane ingati nemanti yaphuma. ³⁵ Lolobone loku wafakaza, futsi bufakazi bakhe buliciniso. Uyati kutsi loko lakusho kuliciniso khona nani nitokholwa. ³⁶ Ngoba letintfo leti tenteka khona umbhalo utogcwaliseka, "Kute ngisho nalinye lematsambo lakhe leliyawukwephulwa." ³⁷ Futsi, lomunye umbhalo utsi, "Batombuka loyo labamgwaza." ³⁸ Emvakwaletintfo leti, Josefa wase-Arimathiya, phelaabengumfundzi waJesu ( kodwa ngemfihlo ngekwesaba emaJuda), wacela Pilatu kutsi atsatsa yini umtimba waJesu. Pilatu wamvumela. Ngako ke Josefa wefika watsatsa umtimba wakhe. ³⁹ Nikhodimasi naye weta, loyo ekucaleni weta kuJesu ebusuku. Abephetse inhlanganiselo yemure kanye nenhlaba, labekungalinganiselwa kumalitha langu-100. ⁴⁰ Ngako ke batsatsa umtimba waJesu bamgocota ngetembhatfo telineni bafaka nemakha, njengelisiko lemaJuda ekungcwaba umuntfu lofile. ⁴¹ Nyalo endzaweni lapho bebambetsele khona kwakunengadze; futsi engadzeni kwakunelithuna lelisha lapho bekute umuntfu lobekake wangcwatjwa khona. ⁴² Ngoba bekulilanga lekulungiselela kwemaJuda futsi ngoba lelithuna lalidvutane, babeka Jesu kulo.