¹ Emvakwekutsi Jesu asho letintfo leti, waphakamisela emehlo akhe emazulwini wase utsi, ''Babe, lihora selifikile, khatimulisa Indvodzana yakho kute Indvodzana itekukhatimulisa- ² njengoba umnikile ligunya kuyo yonkhe inyama kute atewuniketa imphilo lenguna phakadze kuwo wonkhe lomnikete yena. ³ Lena yimphilo lenguna phakadze: Kutsi bakwati, wena wedvwa longuNkulunkulu weliciniso, naloyo lomtfumele, Jesu Khristu. ⁴ Ngikukhatimulisile emhlabeni. Ngiwucedzile lomsebenti longinike wona kutsi ngiwente. ⁵ Nyalo, Babe, ngikhatimulise kanye nawe ngalenkhatimulo lebenginayo nawe umhlaba ungakadalwa. ⁶ Ngaveta libito lakho kubantfu lowawunginike bona basemhlabeni. Bebabakho, wabaniketa mine, futsi baligcinile livi lakho. ⁷ Nyalo sebayati kutsi konkhe longinike kona kuchamuka kuwe, ⁸ ngoba ngibanike onkhe emavi longinikete wona. Bawemukela futsi bati ngekweliciniso kutsi ngachamuka kuwe, futsi bakholwa kutsi ngitfunyelwe nguwe. ⁹ Ngiyabathandazela. Angithandazeli umhlaba kepha labo longinikete bona, ngoba bangebakho. ¹⁰ Konkhe lokungekwami kwakho, nalokungekwakho kwami, futsi ngiyakhatimuliseka kubo. ¹¹ Angisekho emhlabeni, kepha labantfu laba basemhlabeni, futsi sengita kuwe. Babe Longcwele, bagcine egameni lakho longinikete lona kute batawuba munye, njengoba tsine simunye. ¹² Ngesikhatsi nginabo, ngabagcina egameni lakho, longinikete lona. Ngabavikela, kwababete ngisho namunye lobhubhako, ngaphandle kwendvodzana yembubhiso, kute kutawufezeka imibhalo. ¹³ Nyalo ngita kuwe, kodvwa ngisho letintfo leti emhlabeni kute injabulo yami itawufezeka kubo. ¹⁴ Ngibaniketile livi lakho, nelive libatondzile ngoba bangasibo balomhlaba, njengoba nami ngingesuye wakulomhlaba. ¹⁵ Angikuceli kutsi ubatsatse emhlabeni, kepha kutsi ubavikele kulomubi. ¹⁶ Abasibo bakulomhlaba, njengoba nami ngingesuye wakulomhlaba. ¹⁷ Bahlukanise ngeliciniso. Livi lakho liliciniso. ¹⁸ Njengoba ungitfumele emhlabeni, kanjalo nami ngibatfumele emhlabeni. ¹⁹ Ngenca yabo ngitehlukanisile, kute nabo batewutehlukanisa ngeliciniso. ²⁰ Angithandazeli letintfo leti kuphela, kepha nalabo labatokholwa kimi ngelivi labo ²¹ kute bonkhe batoba munye, njengoba wena, Babe, ukimi, nami ngikuwe. Shangatsi nabo bangaba kitsi kute umhlaba utewukholwa kutsi ungitfumile. ²² Inkhatimulo longinikete yona, ngibanikete yona, kute batoba munye, njengoba natsi simunye. ²³ Mine kubo, nawe kimi - kute batewuniketwa ebunyeni lobuphelele, kute umhlaba utewati kutsi ungitfumile, nekutsi ubatsandzile njengoba nami ungitsandzile. ²⁴ Babe, ngifuna kutsi labo longinikete bona babe nami lapho ngikhona khona, phindze babone inkhatimulo yami, lenkhatimulo longinikete yona ngoba wangitsandza umhlaba ungakadalwa. ²⁵ Babe Lolungile, umhlaba bewungakwati, kepha ngiyakwati; nalaba bayati kutsi ungitfumile. ²⁶ Ngente ligama lakho latiwa kubo, futsi ngitowenta latiwe kute kutsi lolutsandzo longitsandze ngalo lutawuba kubo, nami ngitawuba kubo.''