¹ '' Mine ngingumuvini longiwona wona, bese Babe wami ngumlimi. ² Yena ususa emagala kimi langatseli titselo futsi uyalitsena lonkhe ligala lelitsela titselo kute lichubeke litsele kakhulu. ³ Senivele nihlantekile ngalomlayeto lengiwukhulume kini. ⁴ Hlalani kimi, nami kini. Njengeligala angeke likhone kutsela titselo ngekwalo ngaphandle kwemvini, ngako-ke nani ngeke nikhone ngaphandle kwekutsi nihlale kimi. ⁵ Mine ngingumvini, nine nimagala. Loyo lohlala kimi nami kuye uyawutsela titselo letinyenti, ngoba ngaphandle kwami kute leningakwenta. ⁶ Uma kukhona longahlali kimi uyalahlwa njengeligala abese uyoma, abutsiswa alahlwe emlilweni, abese ayashiswa. ⁷ Uma nihlala kimi nemavi ami ahlala kini, niyawucela konkhe lokufisile nitakwentelwa. ⁸ Babe wami uyadvumiseka kuloku, kutsi nitsele titselo letinyenti nikhombise kutsi vele nibafundzi bami. ⁹ Njengaloku BAbe angitsandzile mine, nami nginitsandzile. Hlalani elutsandvweni lami. ¹⁰ Uma nigcina imiyaleto yami, niyawuhlala elutsandvweni lwami, nje ngobe nami ngiyigcinile imiyaleto yaBabe ngihlala elutsandvweni lwakhe. ¹¹ Ngikhulume loku kini kute kujabula kwami kube kini nekutsi intfokoto yenu ipheleliswe. ¹² Lona ngumlayeto wami, kutsi nitsandzane njengobe nami nginitsandza. ¹³ Kute lonelutsandvo lolwendlula lolu- laloyo lowanikela imphilo yakhe ngenca yebangani bakhe. ¹⁴ Nine nibangani bami, uma nenta loku lenginiyaleta kutsi nikwente. ¹⁵ Angeke nisabitwa ngetisebenti ngoba tisebenti atati kutsi umphatsi wato wentani. Nginibite bangani, ngoba konkhe lengikuve kuBabe ngikubonakalisile kini. ¹⁶ Aningikhetsanga, kepha mine ngikhetse nine futsi ngani gcoba kute nitawuhamba nitsele titselo nekutsi titselo tenu tihlale. Loku kwentelwa kutsi konkhe leniyokucela kuBabe egameni lami, utaninika. ¹⁷ Ngiyaniyala ngaletintfo, kute kutsi nitsandzane. ¹⁸ Uma live linenyanya, niyati kutsi lenyanya mine kucala ngaphambi kwekutsi lenyanye nine. ¹⁹ Kbe benibelive, live belitanitsandza njengebalo. Kepha ngalokutsi anisibo belive nekutsi nganikhetsa kubelive kungako live linenyanya. ²⁰ Khumbulani livi lami lengalisho kini, ''Sisebenti asisikhulu kunemphatsi waso.'' Nangabe bangihlukubeta nani futsi batanihlukubeta; uma bagcina livi lami nelenu bataligcina. ²¹ Batawenta loku kini ngenca yeligama lami, ngoba abamati lowangitfuma. ²² Kube angizange ngite ngitokhuluma nabo, ngabe bate sono, kepha nyalo bete taba ngekona kwabo. ²³ Loyo longinyanyako unyanya naBabe wami. ²⁴ Kube angiyentanga lemisebenti lengazange yentiwe nangumunye kubo, ngabe abanasono, kepha nyalo sebabonile futsi banyanya mine naBabe wami. ²⁵ Kepha loku kwakukwekutsi umbhalo ugcwaliseke lobhaleke emtsetfweni wabo, '' Bangenyanya ngaphandle kwesizatfu.'' ²⁶ Uma UMdvudvuti efika- loyo lengitamutfumela kini avela kuBabe, loku, nguMoya weliciniso, lochamuka kuBabe- utawufakaza ngami. ²⁷ Nani nimelwe kufakaza ngami, ngoba beninami kusukela ekucaleni.