¹ Ngicinisile, ngicinisile ngitsi kini, longangeni ngelisango lelingena esibayeni setimvu, kepha angena ngalenye indlela, leyo ndvodza ilisela nesigebengu. ² Longena ngelisango ungumelusi wetimvu. ³ Umgcini sango uyamvulela. Timvu tiyaliva liphimbo lakhe, uyatibita timvu takhe ngemagama atiholele ngaphandle. ⁴ Uma asatikhiphile takhe, uhamba ngembili kwato, timvu timlandzele, ngoba tiva lakhe liphimbo. ⁵ Ngeke tilandzele umchamuki kepha kunaloko tiyomgwema, ngoba tingalati liphimbho lemuchamuki. ⁶ Jesu wakhuluma lomfanekiso kubo, kepha abamvanga kutsi abetsini kubo. ⁷ Wase Jesu utsi kubo futsi, ''Ngicinisile, ngicinisile. ngitsi kini, Ngilisango letimvu. ⁸ Wonke lowefika phambi kwami ulisela kanye nesigebengu, kodvwa timvu atizange timlalele. ⁹ Mine ngilisango. Uma umuntfu angena ngami, uyosindziswa. Uyongena aphume futsi atfole lidlelo. ¹⁰ Lisela aliti kuphela ngaphandle litokweba futsi libulale futsi libhubhise. Ngitele kutsi babe nekuphila nayo ichichime. ¹¹ Ngingumalusi lomuhle. Umelusi lomuhle udzela imphilo yakhe ngenca yetimvu. ¹² Sisebenti lesichashiwe asisiye umelusi futsi asisiye umnikati wetimvu. Uma abona imphisi ita ushiya timvu abaleke, imphisi itibambe aiphindze itisakate. ¹³ Uyabaleka ngoba usisebenti lesichashiwe futsi akanadzaba netimvu. ¹⁴ Ngingumelusi lomuhle, futsi ngiyatati letingetami, netami tiyangati. ¹⁵ Babe uyangati, futsi nami ngiyamati Babe, futsi ngidzela imphilo yami ngenxa yetimvu. ¹⁶ Tikhona letinye timvu letingasito talesibaya, kumele ngitibuyise nato titoliva liphimbo lami. Kufanele ngitiletse nato, tiyoliva liphimbho lami kuze titoba ngumhlambi munye nemelusi munye. ¹⁷ Kungaloko Babe angitsandza: ngidzela kuphila kwami kutsi ngiphindze ngikutsatse. ¹⁸ Kute ngisho namunye longayitsatsa kimi kodvwa ngiyibeka phansi ngekutikhetsela. Nginemagunya kutsi ngiyibeke phansi, futsi nginemagunya ekuyitsatsa. Ngemukele lomyalo kuBabe. ¹⁹ Kwaba nekwehlukana phakatsi kwemaJuda ngenxa yalamagama. ²⁰ Labanyeti batsi, unelidimoni futsi uyahlanya. Nimlalelelani?'' ²¹ Labanye batsi, lawa mavi akusiwo emavi emuntfu lonemadimoni. Lidimoni kodvwa liyawavula yini emehlo emphumphutse? ²² Kwase kuba sikhatsi semkhosi wekunikela eJerusalema. ²³ Bekusebusika, Jesu abehamba ethempelini emhubheni waSolomoni. ²⁴ Khona lapho emaJuda amugegeletela batsi kuye, ''kuyote kube nini solo usingabatisa? Uma unguKhristu, sitjele ukhululeke.'' ²⁵ Jesu wabaphendvula watsi, Ngiyanitjela, kepha anikholwa. Imisebenti lengiyentako ngiyenta egameni laBabe, lafakaza ngami. ²⁶ Solo aningikholwa ngoba anisito timvu tami. ²⁷ Timvu tami tiyaliva liphimbo lami; ngiyatati, nato tiyangilandzela. ²⁸ Ngitinika kuphila kwaphakadze; atiyikufa, futsi kute loyo titsatsa esandleni sami. ²⁹ Babe wami, lowanginike tona, mkhulu kunabo bonkhe labanye, futsi akekho namunye loyobahlwitsa esandleni saBabe. ³⁰ Mine naBabe simunye.'' ³¹ EmaJuda aphindze atsatsa ematjele afuna kumgcoba. ³² Jesu waphendvula watsi, ''nginikhombisile imisebenti leminengi lekhombako kutsi ngibuya kuBabe. Nguyiphi imisebenti leningigcobela yona?'' ³³ EmaJuda amphendvula atsi, ''Asikugcobeli kwenta imisebenti lemihle, kepha kuhlambalata, ngoba wena, ungumuntfu, utenta Nkulunkulu wena. ³⁴ Jesu wabaphendvula watsi, ''Akukabhalwa yini emitsetfweni yenu, 'ngatsi nibonkulunkulu.''' ³⁵ Uma ababita kutsi nibonkulunkulu, labo lelefika kubo livi laNkulunkulu (kanye nembhalo ngeke wephulwe), ³⁶ nitsi kulona le Babe amhlukanisele wamtfumela emhlabeni, 'Uyahlambalata,' ngoba ngitse, 'Mine ngiyiNdvodzana yaNkulunkulu'? ³⁷ Uma kungesiyo imisebenti yaBabe lena lengiyentako, ningangikholwa. ³⁸ Kepha uma ngenta yona, noma ningangikholwa mine, kholwani ngulemisebenti kute nati futsi nicondze kutsi Babe ukini nami ngiku Babe. ³⁹ Betama kumbamba futsi, kepha waphunyula etandleni tabo. ⁴⁰ Wasuka futsi waya ngase Jordan endzaweni lapho Johane abebhabatisa khona ekucaleni, futsi wahlala lapho. ⁴¹ Bantfu labanengi beta kuye futsi batsi, ''Johane ngempela akatentanga tibonakaliso, kepha yonke intfo laJohane ayisho ngalendvodza iliciniso.'' ⁴² Bantfu labaningi bakholwa kuye lapho.