¹ Pawula wabuka wacondza ngco kumalunga eliqoqo wase utsi, ''Bomnaketfu, ngiphile phambi kwaNkunkulu nganembeza lokahle kute kube kunamuhla.'' ² UmPhristi lomkhulu Ananiyas watjela labo bebeme eceleni kwakhe kutsi bamushaye emlonyeni. ³ Wase Pawula utsi kuye, ''Nkulunkulu utokushaya, wena bondza lolugezwe lwaba mhlophe. Uhlalele kungehlulela ngemtsetfo, kepha ube utsi angishaywe, ngalokungekho emtsetfweni.'' ⁴ Labo bebeme eceleni batsi, ''Umhlambalata kanjena umphristi lomkhulu waNkulunkulu na?'' ⁵ Pawula watsi, ''Bengingati, bomnaketfu, kutsi abengumphristi lomkhulu. Ngoba kubhaliwe, Ungete wakhuluma lokubi ngembusi webantfu bakho.'' ⁶ Ngesikhatsi Pawula abona kutsi incenye yinye yaleliqoqo bekuma Sadusi lelenye kuba Farisi, wakhuluma kakhulu kuleliqoqo, ''Bomnaketfu, ngingumFarisi, indvodzana yemaFarisi. Kungoba nginelitsemba lekuvuka kwalabafile kungako ngehlulelwa.'' ⁷ Asakushito loku, kwacala kuhhwilitisana emkhatsini webaFarisi neba Sadusi, lesicuku sahlukana ekhatsi. ⁸ Ngoba baSadusi batsi kute kuvuswa kwalabafile, kute tingilozi, kute nemimoya, kepha baFarisi bayavuma kutsi kukhona konkhe. ⁹ Kwase kuba nemsindvo lomkhulu, labanye babhali belivi lebebamaFarisi basukuma bakeka inkhulumo lephikisako, batsi, ''Asitfoli lutfo lolubi ngalendvodza le. Kungatsiwani nangabe moya noma ingilozi ikhulumile kuye?'' ¹⁰ Lomsindvo nawuya ngekuba mkhulu, lomholi losetulu wesaba kutsi Pawula utowuhleshulwa ngibo abe ticucu, wase utjela emasotja akhe kutsi ehlele phansi ayomtsatsa ngenkhani kulamalunga eliqoqo, bamletse bayomfaka kulencaba. ¹¹ Kulobusuku lobulandzelako iNkhosi yema eceleni kwakhe yatsi, ''Ungesabi, njengobe sewufakazile ngami eJerusalema, chubeka ke ufakaze ngisho nase Roma.'' ¹² Uma sekusile, lamanye emaJuda enta licebo lelibi babita sicalekiso etikwabo bafunga kungadli noma banatse lutfo kute kube ngulapho sebabulele Pawula. ¹³ Bekunemadvodza lengca emashumini lamane lenta lelicebo lelibi. ¹⁴ Baya kubaPhristi labakhulu nakulabadzala batsi, ''Sitifake ngephansi kwesicalekiso lesikhulu, kutsi singadli lutfo site sibulale Pawula. ¹⁵ Nyalo ke, liqoqo alitjele umholi losetulu kutsi amletse lapha kuwe, kwangatsi nitewuncuma kahle ngaloludzaba lwakhe. Tsine, silungele kumbulala angakefiki nalapha.'' ¹⁶ Kepha indvodzana yadzadze waPawula yeva lokutsi bebamlindzile, yahamba yayongena kulencaba yatjela Pawula. ¹⁷ Pawula wabita munye waletindvuna watsi, ''Tsatsa nalijaha niye kumholi losetulu, ngoba kukhona lafuna kumtjela kona.'' ¹⁸ Lendvuna yatsatsa lelijaha yalimikisa kulomholi losetulu watsi, ''Pawula lolosiboshwa ungibitele kuye, wangicela kutsi ngite nalelijaha kuwe. Kukhona latokusho kuwe.'' ¹⁹ Lomholi lomkhulu walitsatsa ngesandla baya emasitseleni wambuta, ''Yini lena lekumele ungtjele yona?'' ²⁰ Lelijaha latsi, ''LamaJuda avumelene kukucela kutsi uletse Pawula luleliqoqo kusasa, kwangatsi bebatobuta ngalokuvakalako ngaloludzaba lwakhe. ²¹ Kepha ungavumi, ngoba kunemadvodza lengca emashumini lamane lalindzile. Batibitele sicalekiso etikwabo kutsi bangadli noma banatse lutfo bate bambulale. Nanyalo nje balungele, bemele imvume yakho.'' ²² Umholi losetulu wavumela lelijaha kutsi lihambe, emva kwekutsi amtjele, ''Ungatjeli muntfu kutsi ungutjele letintfo leti.'' ²³ Wase ubita timbili tindvuna wase utsi, '''Tfolani emasotja langemakhulu lamabili alungele kuhamba kute kube seKhesariya, nebagibeli bemahhashi babe ngemashumi lasikhombisa, nemadvodza etikhali langemakhulu lamabili. Nitawusuka ngelihora lesitsatfu lasebusuku.'' ²⁴ Wabalayetela nekutsi banikete Pawula tilwane langatigibela naletitomtsatsa ate afike aphephile kuFelix lusibalukhulu. ²⁵ Wase ubhala incwadzi lekanje: ²⁶ ''Klawudiyusi Lisiyasi iya ku Lusibalukhulu lohloniphekile Feliksi, ngiyavusela. ²⁷ Lendvodza lena beyiboshwe ngemaJuda futsi beseyitobulawa ngiwo lapho ngichamukele kubo sase siyamsindzisa nemasotja, ngoba ngifundzile kutsi ungumRoma. ²⁸ Ngifunile ke kwati kutsi bamsola ngani, ngase ngiyamtsatsa ngiya naye kuleliqoqo labo. ²⁹ Ngafundza ke kutsi bamsola ngemibuto lephatselene nemitsetfo yabo, kepha bekute kusola ngaye lobekufanelwe kufa noma lijele. ³⁰ Kwase kwentiwa kwateka kimi kutsi bekuneluhlelo lolumelene nalendvodza, masinyane ngase ngitfumela yena kuwe, ngase ngitjela nalabo labamsolako kutsi baletse tinsolo labanato ngaye ebukhoneni bakho.'' ³¹ Ngako ke emasotja ayilalela imiyalo yawo. Atsatsa Pawula ngentima amumikisa eAnthiphatrisi. ³² Ngelilanga lelilandzelako, liningi lalamasotja ashiya bagibeli bemahhashi bona babuyela encabeni. ³³ Uma bagibeli bemahhashi bafika eKhesariya betfula lencwadzi ku lusibalukhulu, base betfula na Pawula kuye. ³⁴ Uma lusibalukhulu sekafundze lencwadzi, wabuta Pawula kutsi wakusiphi sifundza. Uma afundza kutsi Pawula wase Silisiya, ³⁵ watsi, ''Ngitokuva ngalokuphelele uma labakusolako sebete lana.'' Wase uyalela kwekutsi agcinwe enhlokohhovisi yahulumende waHerod.