¹ 'Bomnaketfu nabobabe, lalelani kutiphendvulela kwami lengitawukwetfula kini nyalo'. ² Na lesicuku siva Phawula akhuluma naso ngelulwimi lwesiHebheru, babindza. Watsi, ³ 'NgiliJuda, lelatalelwa eThasu yaseSilisiya, kodvwa ngifundze kulelidolobha lonaleli phasetinyawo taGamalieli. Ngafundziswa ngekwalendlela lecotfo lenebunono yemtsetfo wabobabe. Nginenshisekelo ngaNkulunkulu, njengoba nonkhe ninjalo namuhla. ⁴ Ngayicindzetela lendlela kwate kwaba kusekufeni, ngibopha labadvuna nalabasikati ngibatfula ejele, ⁵ njengobe nempristi lomkhulu nemalunga bangafakaza. Ngemukela tincwadzi letivela kubo mayelana nebanaketfu labaseDamaseko, ngaya le ngenhloso yekubabuyisa baboshiwe eJerusalema kute bajeziswe. ⁶ Kwenteka ke kutsi ngisahamba sengisondzela eDamaseko, emini nje ngekuphatima kweliso kukhanya lokukhulu lokuvela ezulwini kwakhanya kwangigigeletela. ⁷ Ngawela emhlabatsini ngase ngiva livi litsi kimi,'Sawula, Sawula, ungihluphelani na? ⁸ Ngaphendvula ngatsi,'Ungubani Nkosi?' Watsi kimi,'NginguJesu waseNazaretha, lona lomtingelako.' ⁹ Laba lebebahamba nami bakubona lokukhanya, kodvwa abalicondzanga leliphimbo lalowo labekhuluma kimi. ¹⁰ Ngatsi,'Ngentenjani, Nkosi?' INkosi yatsi kimi, 'Sukuma ungene eDamaseko. Nawufika khona utawutjelwa yonkhe intfo lokumele uyente'. ¹¹ Ngehluleka kubona ngenca yalokukhanya lokukhulu, lalabebahamba nami bangihola ngibanjwe ngetandla, ngeta ngekhatsi eDamaseko. ¹² Lapho ke ngahlangana nendvodza leyayibitwa ngekutsi ngu Ananiyasi, Indvodza leyayitimisela ngekwemtsetfo futsi lebeyikhulunywa kahle ngiwo onkhe emaJuda labehlala lapho. ¹³ Yefika kimi, yema eceleni kwami, yase itsi, 'Mnaketfu Sawula, yemukela kubona kwakho.' Ngalelo li awa ngambona. ¹⁴ Wase utsi, 'LoNkulunkulu wabobabe ukukhetsile kutsi wati intsandvo yakhe, ubone lolungile wakhe, nanekutsi uve livi lelivela emlonyeni wakhe. ¹⁵ Ngoba utawuba ngufakazi wakhe kubobonkhe bantfu ngaloku lokubonile nalokuvile. ¹⁶ Nyalo nje uhleti leni? Sukuma, ubhajatiswe, uhlantwe etonweni takho, ngekubita libito lakhe'. ¹⁷ Emva kwekutsi ngibuyele eJerusalema, futsi ngisathandaza ekhatsi ethempelini, kwenteka nganikwa umbono. ¹⁸ Ngambona yena atsi kimi, 'Sheshisa uphume eJerusalema ngekushesha, ngoba bangeke babemukele bufakazi bakho ngami'. ¹⁹ Ngatsi, 'Nkosi, bona lucobo lwabo bayati kutsi ngavalela ejele futsi ngashaya labo lebebakholwela kuwe kuwo onkhe emasinagoge. ²⁰ Ngesikhatsi ingati yaSitefane longufakazi wakho icitfwa, nami ngangikhona ngime eceleni ngivumelana futsi ngigadze timphahla talababulali bakhe'. ²¹ Kodvwa watsi kimi, 'Hamba, ngitakutfumela khashane kubetive.' ²² Bamlalela kwate kwaba ngulapho asho loku. Emva kwaloko bamemeta batsi, 'Umuntfu lonje akasuswe emhlabeni.' ²³ Basamemeta, bakhumula tembatfo tabo tangaphandle batijikijela futsi bakha umhlaba bawujika etulu emoyeni, ²⁴ umphatsi wabokabuteni bemasotja wayala kutsi Phawula aletfwe endzaweni lephephile. Wakhipha umyalo kutsi ahlohlwe imibuto nangekumubhambabula , ukute umkhuteli ati kutsi laba bebabangwa yini kutsi bamemete bamelane naye kanjena. ²⁵ Kwatsi nasebamkhungile ngetilwabhu, Phawula wakhuluma nalendvuna yelibutfo lebeyime eceleni kwakhe, 'Kusemtsetfweni yini kini kutsi nimbambabule indvodza longumRoma futsi longakabekwa licala?' ²⁶ Na lendvuna yelibutfo ikuva loku, yaya kuKabuteni lomkhulu wetempi yafika yamtjela, yatsi, 'Utawenta njani? Ngoba lendvodza lena ingumRoma.' ²⁷ Kabuteni lomkhulu wetimpi weta watsi kuye, 'Ngitjele, kambe wena ungumRoma na?, ' Phawula watsi, 'Yebo.' ²⁸ Kabuteni lomkhulu wetimpi waphendvula, 'Lobuve lobu ngabutsenga ngelinani lemali lelisetulu. 'Kodvwa Phawula watsi, 'Mine ngingumRoma wekutalwa'. ²⁹ Ngako ke lamadvodza labetawumvivinya amshiya ngekushesha. Naye kabuteni lomkhulu wetimpi wesaba, nakacondza kutsi Phawula abewesive semaRoma, ngobe phela naku besekambomphe ngetilwabhu. ³⁰ Ngelilanga lelilandzelako, kabuteni lomkhulu wetempi wafuna kwati emaciniso ngalamacala lemaJuda bekawabeka Phawula. Ngako ke wamtfukulula wabita bapristi labakhulu nalolonkhe licoco emhlanganweni. Wabese uletsa Phawula wamehlisela emkhatsini wabobonkhe.