¹ Emva kwaleso siphitsiphitsi, Pawula watfumela wabita bafundzi asabakhutsatile, watsi salani kahle wabashiya waya eMasedoniya. ² Asahambe wadzabula leto tifundza akhulume emavi lamanyenti kubo ekubakhutsata, wefika eGrisi. ³ Kwatsi nase ahleti tinyanga letintsatfu lapho, emaJuda ahlela luzungu lekumelana naye nase alungela kuntjweza aye e Siriya, Wase uyancuma kubuyela adzabule eMasedoniya. ⁴ Labamphekeletela kwaze kwaba seAsiya kwakubo Phirihuse wase Bheriya; Aristakhusi naSekhundusi, bavela kumakholwa aseThesalonika; Gayusi wase Debe; Thimothi; naThikhikhusi naThrofimusi baseAsiya. ⁵ Kodvwa lamadvodza abehambe ngaphambi kwetfu base basilindzele eThrowasi. ⁶ Santjweza kusuka eFiliphi sekuphele emalanga esinkhwa lesingenamvubelo, ngemalanga lasihlanu sefika kubo eThrowasi. Sahlala lapho emalanga lasikhombisa. ⁷ Ngelilanga lekucala leliviki, lapho sesihlanganele kuhlephula sinkhwa, Pawula wakhuluma kulabakholwako.abetilungiselela kuhamba ngelilanga lelilandzelako, abeloku akhuluma kwate kwaba sekhatsi nebusuku. ⁸ Kwakunetibane letinyenti kulelikamelo lelisetulu lapho sasihlangene khona. ⁹ Efasitelweni kwakuhleti lijaha lelibitwa ngekutsi ngu Yuthikhusi, lowatunywa butfongo lobukhulu. Inkhulumo yaPawula yaba yindze, lelijaha, lisetumekile, lawa kusuka esitezi sesitsatfu nabamphakamisa abese afile. ¹⁰ Kodvwa Pawula wehla, watelula etikwakhe, wamgaca ngemikhono, wase utsi, " Ningasetfuki, ngobe uyaphila." ¹¹ Wase ubuyela esitezi wahlephula sinkhwa wadla. Emvakwekukhuluma nabo nabo sikhatsi lesidze kwate kwaba sentsatsakusa, wahamba. ¹² Bamletsa lomfana aphila badvudvuteka kakhulu. ¹³ Tsine ke samendvulela Pawula ngemkhumbi santjweza siya eAsosi, lapho satimisela kugibelisa Pawula. Loku naye cobo lwakhe abefisa kukwenta, ngobe abetilungiselele kuhamba phansi. ¹⁴ Asahlangane natsi eAsosi samekhweta emkhunjini saya e Mithiline. ¹⁵ Santjweza kusuka lapho sefika ngakusasa macondzana nesichingi sase Khiwose. Ngelilanga lelilandzelako sefika esichingini se Samosi. elangeni lelilandzela lelo sefika edolobheni le Milethu. ¹⁶ Ngobe Pawula abencume kuntjweza endlule e Efesu, entela kutsi kubete sikhatsi latawusicitsa e Asiya; Ngobe abejahe kuba seJerusalema ngelilanga le Pentekhosti, uma bekungenteka kutsi ente njalo. ¹⁷ EMilethu watfumela emadvodza e Efesu kuyabita baholi beli Bandla kutsi bete kuye. ¹⁸ Sebefikile kuye , watsi kubo, " Nine cobo lwenu,niyati kusukela elangeni lekucala ngifika e Asiya, kutsi ngasicitsa kanjani sikhatsi nani njalo. ¹⁹ Ngachubeka ngikhonta iNkhosi ngako konkhe kutfobeka nangetinyembeti, ngetinhlupheko letangehlela ngenca yeluzungu lwemaJuda. ²⁰ Niyati nekutsi angitange nginigodlele lutfo lolusitako kutsi nginitjele kona, nekutsi nganifundzisa ebaleni ngingena indlu ngendlu, ²¹ ngifakaza kumaJuda nakumaGrikhi ngekuphendvukela kuNkulunkulu nangekukholwa yinkhosi Jesu . ²² Bukani nyalo, ngiya eJerusalema, ngekuchutjwa nguMoya, angati kutsi kutakwentekani kimi lapho. ²³ ngaphandle nje kwekutsi Moya Longcwele ufakazile kimi kuwo onkhe emadolobha kutsi emaketane netinhlupheko kungilindzele. ²⁴ Kodvwa vele angititsatsi njengemuntfu lotikhandza amcoka kimi, uma nje kuphela ngingacedzela libanga ngiphindze ngifeze inkonzo yami lengayemukela eNkhosini Jesu, kufakaza ngelivangeli lemusa waNkulunkulu. ²⁵ Manje bukani, ngiyati kutsi nine nonkhe, lengihambe emkhatsini wenu ngimemetela umbuso, angeke niphindze nibone buso bami. ²⁶ Ngako-ke ngiyafakaza kini lamuhla, kutsi ngite licala lengati yanobe ngubani. ²⁷ Ngobe angitange nginigodlele lutfo kunitjela yonkhe intsandvo yaNkulunkulu. ²⁸ Ngako-ke ticapheleni nine , kanye nemhlambi Moya Longcwele lanente naba belusi bawo. Caphelani kwelusa liBandla laNkulunkulu, latitsengela lona ngengati yakhe ( noma ngengati yendvodzana yaKhe). ²⁹ Ngiyati kutsi emva kwekuhamba kwami, timphisi letihahako titawufika emkhatsini wenu tingawuyekeli umhlambi. ³⁰ Ngiyati nekutsi ekhatsi kini lamanye emadvodza atawufika ahlanaketele liciniso kuze advosele bafundzi kutsi balandzele bona. ³¹ Kanjalo lindzani. Khumbulani kutsi kuleminyaka lemitsatfu angiyekanga kuyala loyo naloyo nangetinyembeti busuku nemini. ³² Nyalo senginibeka etandleni taNkulunkulu nasevini lemusa wakhe, longuwona anganakha aninike lifa emkhatsini walabo labayawungcweliswa. ³³ Angitange ngitsatse kumuntfu isiliva, igolide, nobe kwekwembatsa. ³⁴ Nine ngekwenu niyati kutsi letandla leti tasebenta kufeza tidzingo tami naletalabo lenganginabo. ³⁵ Kuko konkhe nganinika sibonelo kutsi ningabasita kanjani lababutsakatsaka ngekutsi nisebente , nesekutsi nikhumbule emavi eNkhosi Jesu cobo lwakhe lawakhuluma watsi:" Kubusiswe kakhulu kupha kunekwemukela." ³⁶ Emvakwekutsi asakhulume kanjalo, waguca phansi wathandaza nabo bonkhe. ³⁷ Kwaba khona kukhala lokukhulu bagaca Pawula ngemikhono bamanga. ³⁸ Bebadzatjukiswe kakhulu nguloko labekushito kutsi angeke baphindze babone buso bakhe. Bamphekeletela kuya emkhunjini.