^{1 2 3} Nasekacedzile kuthantaza Solomoni, umlilo wehla ezulwini wadla leminikelo leshisiwe kanye nemihlatjelo, nenkhatimulo yaSimakadze yagcwala indlu yonkhe. Bapristi abazange basakhona kungena endlini yaSimakadze, ngoba inkhatimulo yakhe beseyigcwele indlu. Ngesikhatsi sonkhe sive saka-Izrayeli sibona umlilo ehla nenkhatimulo yaSimakadze tikwendlu, baguca babheka phasi esiyalweni badvumisa babonga Simakadze. Batsi, ''Ngoba muhle, nesivumelwano sakhe sekutsembeka sime phakadze.'' ^{4 5 6} Ngakoke inkhosi nesive sonkhe banikela ngemihlatjelo kuSimakadze, Inkhosi Solomoni yanikela ngemhlatjelo wemhlambi wetinkhomolongemashumi lamabili etinkhulungwane netimvu leti 120,000 letihlangene netimbuti. Ngakoke inkhosi nesive sonkhe bentela lithempeli laNkulunkulu. Bapristi bema, ngamunye ngamunye eme esikhundleni sakhe; nemaLevi netigubhu tekuhlabelela Simakadze, leyo leyakhiwe nguDavide akhela kudvumisa Simakadze engomeni, ''Ngoba sivumelwane sakhe sekutsembeka sime inguna ohakadze.'' Bonkhe bapristi bafutsa emacilongo embikwabo, naso sonkhe sive saka-Izrayeli sema. ⁷ Solomoni wahlukanisela Simakadze likhatsi nekhatsi lasesibuyeni lasendlini yaSimakadze. Kulapho lanikelela khona iminikelo yekushiswa nemafutsa emnikelo webudlelwane, ngoba lelilati lelitfusi bekalakhile belehluleka kutfwala umnikelo wekushiswa, nemnikelo wenhlavu, kanye nemafutsa. ^{8 9 10} Ngakoke Solomoni wabamba umkhosi ngaleso sikhatsi wemalanga lasikhombisa, kanye na-Izrayeli wonkhe anaye, kungumhlangano lomkhulu kakhulu, kusukela eLebo Hamath kuya eningizimu yaseGibhithe. Ngelilanga lesiphohlongo babamba umhlangano wenkholo, ngoba besebawentile iminikelo yaselatini emalanga lasikhokhombisa, nelidzini lemalanga lasikhombisa. Ngelilanga lemashumi lamabili nakunye enyangeni yesikhombisa, Solomoni wakhulula bantfu babuyela emathendeni abo nenjabulo nekutfokota etinhlitiyweni tabo ngenca yalokuhle Simakadze lakwente kuDavide, naSolomoni, kanye na-Izrayeli, bantfu bakhe. ^{11 12} Solomoni wabese uyacedza kwakha lithempeli laSimakadze kanye nesigodlo sakhe. Konkhe lekwakufike enhlitiyweni yaSolomoni kutsi akwente endlini yaSimakadze kanye nasesigodlweni sakhe, wase akhonile ukwenta. Simakadze watibonakalisa kuSolomoni ebusuku watsi kuye, ''Ngiwuvile umthantazo wakho, sengitikhetsele lendzawo kutsi kube yindlu yemihlatjelo. ^{13 14 15} Nakungatsiwa ngivale emazulu kutsi kube bete litulu, noma ngitfumele sikhonyane kutsi sitawubhubhisa live, noma ngitfumele sifo kubantfu bami, bese nangabe bantfu bami, lababitwa ngelibito lami, batotitfoba, bakhuleke, bafune buso bami, bagucuke etindleleni tabo letimbi, ngitobeva ngisezulwini , ngibatsetselele sono sabo, ngiphilise live labo. Emehlo ami ayawuvuleka netindlebe tami tilalelisise imikhuleko lekhulekwa ekhatsi kulendzawo. ^{16 17 18} Ngoba sengikhetsile ngayihlukanisela kutsi libito lami phakadze naphakadze kulendlu. Emehlo ami nenhltiyo yami iyohlala ikhonakhona onkhe emalanga. Wena-ke nangabe utohamba embikwami njengobe uyihlo bekahamba, ulalele yonkhe imiyalo lengikunika yona nemitsetfo kanye nemigomo yami, ngitawubese ngimisa sihlalo sakho sebukhosi, njengoba ngasho esivumelwaneni naDavide uyihlo, nangitsi, 'Intalelwane yakho iyohlala libusa ka-Izrayeli.' ^{19 20} Kepha uma ugucuka, ulahle imitsetfo nemiyalo yami lengiyibeke embikwakho, nanawuhamba uyokhonta labanye bonkulunkulwana ubakhotsamele, ngiyawubese ngiyabasiphula emhlabeni lengibanike wona. Lelithempeli lengilihlukanisele libito lami, ngiyawukulisusa embikwami, ngilente inhlekisa kubantfu bonkhe. ^{21 22} Noko lelithempeli linesitfunti nyalo, wonkhe umuntfu lowengca kulo uyomangala ahlebe. Babute, ''Simakadze uyenteleni intfo lenjena kulelive nakulelithempeli?' Labanye batophendvula batsi, ''Ngoba balahle Simakadze, Nkulunkulu wabo, lowakhipha boyise mkhulu eveni laseGibhithe, bakhetsa labanye bonkulunkulu babakhotsamela babadvumisa. Kungako Simakadze ehlise tonkhe letimo kubo.'''