^{1 2 3} Jehoshaphat bekanjinge kakhulu futsi ahlonishwa; watakhela bungani na-Ahab ngekutsi abendzisele indvodzakati yakhe. Kwahamba iminyaka, Jehoshaphat wehla waya ku-Ahab eSamaria. Ahab wahlaba timvu netinkhomo letinengi ahlabela Jehoshaphat nabobonkhe bantfu labekahamba nabo. Phindze wamgcugcutela kutsi bahlasele Ramoth Gilead kanye kanye. Ahab, inkhosi yaka-Izrayeli, yatsi kuJehoshaphat, inkhosi yemaJuda, ''Asambe siye kuRamoth Gilead?'' Jehoshaphat wamphendvula watsi, ''Ngifanana nawe, nebantfu bami bafana nebakakho. Sitobe sikanye nawe kulemphi.'' ^{4 5} Jehoshaphat wase utsi enkhosini yaka-Izrayeli, ''Ngicela ucale ngekufuna livi laSimakadze libe yimphendvulo yakho.'' Yabese inhosi yaka-Izrayeli ihlanganisa baprofethi; emakhulu lamane emadvodza, wase utsi kuwo, ''Siye yini eRamoth Gilead siyokulwa, nobe ngingayi?'' Baphendvula batsi, ''Hlasela, ngoba Nkulunkulu utoyinikela esandleni senkhosi.'' ^{6 7 8} Kodvwa Jehoshaphat watsi, ''Kukhona yini lana umprofethi waSimakadze lesingafuna kuye kwelulekwa?'' Inkhosi yaka-Izrayeli yatsi kuJehoshaphat, ''Kukhona yinye indvodza lesingayisebentisa kufuna seluleko saSimakadze, nguMicaiah indvodzana ya-Imlah, kepha ngiyamenyanya ngoba akake waprofetha lokuhle ngami, kodvwa kuhlala kungulokubi.'' Kodvwa Jehoshaphat watsi, ''Inkhosi ayikafaneli kusho njalo.'' Yabese inkhosi yaka-Izrayeli ibita yinye indvodza yatsi kuyo, ''Shesha ulandze Micaiah indvodzana ya-Imlah.' ^{9 10 11} Ahab inkhosi yema-Izrayeli naJehoshaphat inkhosi yemaJuda besebahleti ngamunye esihlalweni sebukhosi, bambetse tigubho tabo, ebaleni lekubhulela esangweni lekungena eaSamaria, nebaprofethi babonkhe baprofetha embikwabo. Zedekiah indvodzana yaKenaanah bekatakhele timphondvo temsimbi wase utsi, ''Simakadze utsi:Ngaleti utowafuca ema-Arameans ate aphele.'' Bonkhe baprofethi baboniswa kona loko, batsi, ''Hlasela iRamoth Gilead uncobe, Simakadze soyinikelile esandleni senkhosi.'' ^{12 13 14} Lesitfunywa lesasihambe siyobita Micaiah satsi kuye, ''Lalela, emavi ebaprofethi ngamunye ngamunye akhuluma lokuhle ngenkhosi. Nawe akho emavi akavumelane newabo, ukhulume lokuhle.'' Micaiah waphendvula watsi, ''Simakadze asaphila, ngitokhuluma lokushiwo nguNkulunkulu.'' Ngesikhatsi Micaiah afika enkhosini, inkhosi yatsi kuye, ''Micaiah, siye yini kuyohlasela eRamoth Gilead, nobe singayi?'' Micaiah wamphendvula, ''Hlaselani nincobe! Ngoba kutoba kuncoba lokuhle.'' ^{15 16} Inkhosi yabe itsi kuMicaiah, ''Sekukangakhi ngikutjela kutsi ukhulume liciniso lodvwa egameni laSimakadze?'' Ngako-ke Micaiah wase utsi, ''Ngibone onkhe ema-Izrayeli acitseke etintsabeni, kanjenge timvu letite umelusi, waseSimakadze utsi, 'Leti tite umelusi. Wonkhe muntfu akabuyele ekhaya lakhe ngekuthula.'' ^{17 18} Inkhosi yaka-Izrayeli yabese itsi kuJehoshaphat, ''Angikasho yini kutsi ngeke aboniswe lokuhle ngami, kepha impnakalo kuphela?'' Wabese Micaiah utsi, ''Ngako-ke nonkhe nitolalela livi laSimakadze: Ngimbonile Simakadze ahleti esihlalweni sakhe sebukhosi, kanye natotonkhe tingilozi telizulu betimile esandleni sekudla kanye nangesencele. ¹⁹ Simakadze watsi, ''Ngubani longasiyengela Ahab, inkhosi yaka-Izrayeli, kuze itohamba iyofela eRamaoth Gilead?' Lomunye washo loku nalaomunye washo lokwa. ^{20 21} Kwabese kuvela umoya wena embikwaSimakadze wase utsi, ''Ngitomuhunga mine, ' Simakadze wabuta watsi, ''Kanjani?' Ngitokwehla ngiyoba ngumlomo lonemanga kubobonkhe baprofethi bakhe.'' Simakadze waphendvula, 'Utomhunga, futsi utophumelela. Hamba uyokwentanjalo.' ²² Ngako-ke, Simakadze sobeke umoya wemanga emilonyeni yalabaprofethi bakho, Simakadze somemetele sehlakalo sakho.'' ^{23 24} Wabese Zedekiah indvodzana yaKenaanah, iyasondzela, yashaya Micaiah ngemphama esihlatsini, wase utsi, ''Umoya waSimakadze uhambephi kutokhuluma nawe aphuma kimi kutokhuluma nawe?'' Micaiah waphendvula watsi, ''Lalela, utokwati ngalelinye lilanga, ngesikhatsi ubaleka uyobhaca kulenye indlu.'' ^{25 26 27} Inkhosi yaka-Izrayeli yabese itsi etisebentini tayo, ''Mine tsatsani Micaiah nimyise ku-Amon, indvuna yelidolobha, nakuJoash, indvodzana yami. Nitofika nitsi kuye, 'Inkhosi itsi: Fakani lendvodza lena ejele nimuphe sinkhwa lesincane nemanti lamancane, ngite ngibuye ngiphephile.''' Micaiaha wabese utsi, ''Nangabe utobuya uphephile, shotsi Simakadze akakhulumi kimi.'' Wachubeka watsi, ''Lalela lana, nine nonkhe.'' ^{28 29 30} Ngako-ke inkhosi yaka-Izrayeli, kanye naJehoshaphat, inkhosi yemaJuda, benyuka bayohlasela Ramoth Gilead. Inkhosi yaka-Izrayeli yatsi kuJehoshaphat, ''Ngitogcoka ngingabonakali kutsi ngingubani ngiye emphini, kodvwa wena utogcoka tingubo takho tebukhosi.'' Ngakoke inkhosi yatifihla, base baya emphini. Inkhosi yase-Aram yase itjele tindvuna tetincola takhe temphi, kutsi, ''Nine anilwi namuntfu kungaba ngulomncane nobe lonemandla, kodvwa nitolwa nenkhosi yaka-Izrayeli kuphela.'' ^{31 32} Kwatsi tindvuna tetincola temphi natibona Jehoshaphat tatsi, ''Nayiya inkhosi yaka-Izrayeli.'' Tindvuna tagucuka tilungela kumhlasela, kodvwa Jehoshaphat wamemeta, Simakadze wamlekelela. Nkulunkulu wabajikisa kutsi bangeti kuye. Kwatsi ngesikhatsi letindvuna tetincola temphi tibona kutsi akusiyo inkhosi yaka-Izrayeli, tajika tangamuhlaseli. ^{33 34} Kodvwa lomunye wadvonsa butjoki bakhe wadubula inkhosi yaka-Izrayeli lapho kuhlangana khona tembatfo tayo tekutivikela. Wabese Ahab utsi kulona loshayela incola yakhe, '' Jikisa lencola sihambe lana, ngoba sengilimele kabi.''Imphi yashuba ngalelo langa, nenkhosi yaka-Izrayeli bebayisukumisile encoleni yayo ibuke imphi yema-Arameans kwate kwabayintsambama. Ngesikhatsi lilanga lisashobela, wafa.