¹ Davide wahlanganisa tonkhe tiphatsimandla taka Israyeli watibitela eJerusalema: Tindvuna letiphetse tive, netindvuna tematiko letisebentela inkhosi, netindvuna tetinkhulungwane netemakhulu, nebaphatsi bayo yonkhe imphahla nelutfo kwenkhosi nemadvodzana ayo, netisebenti kanye nemabutfo lafaka ekhatsi tingwazi. ² Inkhosi Davide yase isukuma ima ngetinyawo yatsi, ''Ngilaleleni bomnaketfu nesive sakitsi. Bekuyinhloso yami kwakha indlu lapho kutophumula khona libhokisi lesivumelwano saSimakadze; senabelo setinyawo taNkulunkulu futsi nemalungiselelo sengiwentile ekulakha. ³ Kodvwa Nkulunkulu utse kimi, ''Wena ngeke wakhe lithempeli lelibito lami ngoba wena uyindvodza yemphi futsi sewucitse nengati.'' ⁴ Noko Simakadze, Nkulunkulu wema Israyeli, wakhetsa mine endlini yonkhe yaketfu kutsi ngibe yinkhosi yema Israyeli phakadze naphakadze. Ukhetse Juda kutsi abe ngumholi, kwatsi elusendvweni lwakaJuda wakhetsa uketse indlu yaketfu, nakuwo onkhe emadvodzana ababe wajabula kukhetsa mine kutsi ngibe yinkhosi yaka Israyeli wonkhe. ⁵ Kuwo onkhe emadvodzana Simakadze langiphe wona, ukhetse Solomon indvodzana yami, kutsi ihlale esihlalweni sebukhosi baSimakadze ka Israyeli. ⁶ Utse kimi, ''Indvodzana yakho Solomoni itokwakha indlu yami netibuya tami, ngoba ngikhetse yena kutsi abe yindvodzana yami, nami ngitoba ngubabe wakhe. ⁷ Ngitomisa bukhosi bakhe phakadze naphakadze, nangabe atochubeka alandzele imitsetfo nemiyalo yami njengoba wenta nanamuhla. ⁸ 'Nyalo emehlweni a Israyeli wonkhe, nakulenhlangano yaSimakadze, kanye nasebukhoneni baNkulunkulu, nonkhe nine nitoyigcina phindze niyilandzele yonkhe imitsetfo yaSimakadze NKulunkulu wenu. Kwenteni loku kute nitophatsa lendzawo lena lenkhe niphindze niyishiye njenge lifa letitukulwane emvakwenu phakadze naphakadze. ⁹ Wena ke Solomoni ndvodzana yami, hlonipha Nkulunkulu weyihlo, phindze umkhonte ngenhlitiyo yakho yonkhe nangemoya lovumako. Kwente loku ngoba Simakadze uphenya tonkhe tinhlitiyo futsi ucondzisisa konkhe lokubangela imicabango yawonkhe muntfu. Nawumfuna, utawukumutfola, kodvwa uma umulahla, naye utokuphika phakadze naphakadze. ¹⁰ Kubone ukwati kutsi Simakadze ukhetse wena kutsi wakhe lelithempeli libe yindzawo yakhe lengcwele. Cina uwente lowo msebenti.'' ¹¹ Davide wabese unika indvodzana yakhe Solomoni tinhlelo tekwakha emasango elithempeli, nesakhiwo selithempeli, netetingungumakamelo, temakamelo lasetulu, netemakamelo lasekhatsi, netelikamelo lendzawo yenhlawulo. ¹² Wanika Solomoni tinhlelo bekadze atidvwebile tetibuya tendlu yaSimakadze, kanye nawo onkhe emakamelo lalitungeletile, netetingungumakamelo ekhatsi endlini yaNkulunkulu, kanye netingungu tetintfo taSimakadze. ¹³ Wamunika imitsetfo yaleticheme teba pristi kanye nemaLevi temisebenti labakhetselwe yona endlini yaSimakadze, kanye nato tonkhe tintfo letisebenta indlu yaSimakadze. ¹⁴ Watfola tisindvo temavasi onkhe eligolide temusebenti ngamunye ngamunye, netisindvo temavasi elisiliva temsebenti ngamunye ngamunye, ¹⁵ netisindvo tebucwebe beligolide bekwakha tintsi tetibane netibane teligolide, nesisindvo selutsi lesibane seligolide ngasinye ngasinye, nesisindvo selutsi lesibane selisiliva ngasinye ngasinye ngekucondzana nemsebenti welutsi lwesibane ngalunye ngalunye. ¹⁶ Washo nesisindvo seligolide sematafula esinkhwa sebukhona, ngelitafula ngelitafula, sisindvo selisiliva lematafula elisiliva. ¹⁷ Washo nesisindvo seligolide lelihlantekile lekwakha timfologo tenyama, bobhesini kanye netinkomoshi. Washo nesisindvo sesitja seligolide ngasinye ngasinye, kanye nesisindvo selisiliva lesitja ngasinye ngasinye. ¹⁸ Washo nesisindvo seligolide lelicengiwe lekwakha lilati lemphepho, nesisindvo seligolide leluhlelo lwekwakha incola, nesemakherubhi lavule timphiko tawo tavala libhokisi lesivumelwano saSimakadze. ¹⁹ Davide watsi, ' Ngikubhale konkhe loku njengoba Nkulunkulu angitfumile phindze nekutsi ngati ngati letinhlelo tekwakha.'' ²⁰ Davide watsi kundvodzana yakhe Solomoni, ''Cina ube nesibindzi. Wente lomsebenti. Ungesabi nobe uphele emandla ngoba Simakadze, Nkulunkulu wami unawe. Ngeke akushiye noma akulahle ate wonkhe lomsebenti wendlu yaSimakadze aphelele. ²¹ Buka, nati ticheme tema pristi netemaLevi letitokwenta imisebenti yasendlini yaNkulnkulu. Batoba kanye nawe, kanye nawo wonkhe lofisile kanye nemadvodza lane lwati lekusebenta, kutsi akulekelele ekwenteni lomsebenti. Tiphatsimandla kanye nebantfu bonkhe sebalungele kulandzela imilayelo yakho.''