¹ Inkhosi Davide yatsi ebandleni lonkhe, ''Solomoni ndvodzana yami, lekhetfwe yodvwana nguNkulunkulu, iseseyincane ite lwati futsi nalomsebenti mukhulu. Ngoba lelithempeli alisilo lebantfu kepha laSimakadze Nkulunkulu. ² Ngakoke ngente konkhe lokusemandleni ami kunikelela lithempeli laNkulunkulu wami. Ngininika ligolide letintfo lokufanele takhiwe ngeligolide, nelisiliva letintfo lokufanele takhiwe ngelisiliva, nelitfusi letintfo lokufanele takhiwe ngelitfusi, nensimbi yetintfo lokufanele takhiwe ngensimbi, nesigodvo setintfo lokufanele takhiwe ngesigodvo. Ngitophindze ngininike ematje elikhetselo, nematje ekuhlobisa layimibala lehlukahlukene- nawo onkhe ematje laligugu lamanengi lokungagcini. ³ Ngakoke ngenca yentfokoto yami endlini yaNkulunkulu ngininiketa ngemcebo wami weligolide newelisiliva kulo lelithempeli. Loku ngikwenta ngingeta kuko konkhe lengikulungiselele lelithempeli lelingcwele leli: ⁴ emathalenta eligolide esisindvo lesingu100,000 wemakhilo lase Ophir, kanye nemathalenta elisiliva esisindvo sa 250,000 wemakhilo kute kutohlobiswa ngako tibondza tetakhiwo. ⁵ Nginikela ngeligolide lekwakha tintfo teligolide, lanye nelisiliva lekwakha tintfo telisiliva, kanye nato tonkhe tintfo temisebenti leyentiwa babati. Ngubani lomunye lofuna kwenta umnikelo kuSimakadze namuhla atinikele yena kuye?'' ⁶ Kwase kwentisa iminikelo yekuholwa yinhlitiyo kunikela baholi bemindeni yabokhokho babo, nebaholi betive taka Israyeli, nebaphatsi betinkhulungwane nemakhulu emabutfo, netindvuna temsebenti wenkhosi. ⁷ Banikelela umsebenti wekwakha indlu yaNkulunkulu ngemathalenta eligolide lelingu 170 wemakhilo, nemali yeligolide letingu 333,000, kanye nemathalenta elisiliva esisindvo lesingu 333,000, kanye nemathalenta elitfusi esisindvo lesingu 266,000, kanye na 3,300 wesisindvo sensimbi. ⁸ Labo bebakadze banematje laligugu banikela ngawo engcebeni yendlu yaSimakadze lebeyikadze ibukwe nguJehiel umtukulu waGershon. ⁹ Sive sajabula kakhulu ngaleminikelo yetinhlitiyo letivumako, ngoba bebanikele ngetinhlitiyo letimhlophe kuSimakadze. Inkhosi Davide nayo yajabula kakhulu. ¹⁰ Davide wadvumisa Simakadze embikwalo lonkhe libandla. Davide watsi, ''Akabongwe, Simakadze, Nkulunkulu wa Israyeli longukhokho wetfu, phakadze naphakadze. ¹¹ Kwakho, Simakadze, bukhulu bakho, nemandla akho, neludvumo lonkhe, nekuncoba konkhe. Ngoba konkhe lokusezulwini nalokusemhlabeni kwakho. Umbuso ngewakho, Simakadze, futsi uphakeme wengamele konkhe. ¹² Kokubili ingcebo neludvumo kuphuma kuwe;uphindze ubuse bonkhe bantfu. Esandleni sakho ngemandla nebukhulu. Wena uphetse kucina nemandla ekwenta bantfu kutsi babe bakhulu uphindze unike emandla kunobe ngubani. ¹³ Manje ke, Nkulunkulu wetfu, siyakubonga siphindze sidvumise ligama lakho lelingcwele. ¹⁴ Kodvwa mine bengingubani, nesive sami besiyini kutsi besingate sikhone kunikela ngekuholwa yinhlitiyo tonkhe letintfo leti? Nemambala tonkhe tintfo tiphuma kuwe, natsi sivele sabuyisela emuva kuwe lokungekwakho. ¹⁵ Ngoba sitihambi netikhoseli embikwakho, njengabo bonkhe bokhokho betfu. Emalanga etfu lapha emhlabeni afana nesitfunti, futsi kute litsemba kutsi singahlala phakadze emhlabeni. ¹⁶ Simakadze Nkulunkulu wetfu, yonkhe lengcebo lena lesiyikolekile kute sikhone kwakha lithempeli lelibito lakho lelingcwele-kuvela kuwe futsi kwakho. ¹⁷ Futsi ngiyati Nkulunkulu wami kutsi wena uhlola inhlitiyo ujatjuliswe kulunga. Kodvwa mine, ngekulunga kwenhlitiyo yami nginikele ngenhlitiyo levumako tonkhe letintfo leti, nyalo sengibuka ngentfokoto njengoba bantfu bakho labakhona lana banikele ngesihle tipho kuwe. ¹⁸ Simakadze Nkulunkulu wa Abrahamu, na Isaya kanye na Izrayeli -bokhokho betfu-kugcine loku phakadze naphakadze emicabangweni yetingcondvo tebantfu bakho. Wente tinhlitiyo tabo tihlale ticondze kuwe. ¹⁹ Nika Solomoni indvodzana yami inhlitiyo lephelele kutsi agcine imitsetfo yakho, netivumelwano temiyalo, kanye netimiso takho, nekutsi achube kahle tonkhe letinhlelo tekwakha lesigodlo lengisilungiselele.'' ²⁰ Davide watsi ebandleni lonkhe, ''Akadvunyiswe Simakadze Nkulunkulu wenu.'' Libandla lonkhe lamdvumisa Simakadze longuNkulunkulu wabokhokho babo, baguca base bakhomba inhlonipho kuSimakadze kanye nasenkhosini. ²¹ Ngelilanga lelilandzelako benta imihlatjelo kuSimakadze bamushisela neminikelo. Banikela tinkunzi letiyinkhulungwane, netihhanca letiyinkhulungwane, nemazinyane layinkhulungwane, neminikelo yetinatfo kanye nemihlatjelo leminyenti bentela Izrayeli wonkhe. ²² Ngalelo langa badla baphindze banatsa embikwaSimakadze ngentfokoto lenengi. Benta Solomoni indvodzana yaDavide inkhosi kwesibili, bamugcoba ngemvume yaSimakadze kutsi abe ngulobusako. Bagcoba naZadok kutsi abe ngumpristi. ²³ Wase Solomoni uhlala esihlalweni sebukhosi saSimakadze njengenkhosi esikhundleni saDavide uyise. Solomoni waphumelela, kanye nema Izrayeli onkhe amuhlonipha. ²⁴ Tonkhe tiphatsimandla nemabutfo, kanye nemadvodzana enkhosi Davide etsembisa kutfobela inkhosi Solomoni. ²⁵ Simakadze waphakamisa kakhulu embikwema Izrayeli onkhe wase umubeka bukhosi lobukhulu kakhulu kangangekutsi kute inkhosi leyendlula leyake yanikwa bona ka Izrayeli. ²⁶ Davide indvodzana yaJese yabusa ka-Izrayeli wonkhe. ²⁷ Davide besekayinkhosi yaka-Izrayeli imanyaka lengemashumi lamane. Davide wabusa iminyaka lesikhombisa eHebron kanye neminyaka lengemashumi lamatsatfu nakutsatfu eJerusalema. ²⁸ Wafa asakhulile sekatinetisile ngemphilo lendze, atinetisile ngengcebo nangekuhlonishwa. Indvodzana yakhe lenguSolomoni yabusa ngemuva kwakhe. ²⁹ Kuphumelela konkhe kwenkhosi Davide kubhaliwe emilandvweni yaSamuweli umboniswa, nasemilandvweni yaNatani umprofethi, kanye nasemilandvweni yaGad umboniswa. ³⁰ Kubhalwe khona kutsi Davide wabusa kanjani, nemandla akhe kanye nalokwamehlela yena nema-Izrayeli kanye nayo yonkhe imikhosi yalamanye emave