¹ Wabese Hiram inkhosi yaseTyre itfumela titfunywa kuDavide, netihlahla teceda, nebabati betigodvo kanye nebacoti bematje. Bakhela Davide indlu. ² Davide bekati kutsi Simakadze bekabeke yena njenge nkhosi kuma-Israyeli, nekutsi umbuso wakhe wawuhlonipheke kakhulu ngenca yesive sakhe saka-Israyeli. ³ EJerusalema, Davide watsatsa bafati labanengi, waba mguyise wemadvodzana lamanengi kanye nemadvodzakati. ⁴ Lawa ngemabito emantfwana labatalwa nguye eJerusalema: Shammua, naShobab, naNathan, naSolomon, ⁵ na-Ibhar, na-Elishua, na-Elpelet, ⁶ naNogah, naNepheg, naJaphia, ⁷ na-Elishama, naBeeliada, na-Eliphelet. ⁸ Ngesikhatsi emaFilisti eva kutsi Davide sogcotjiwe njengenkhosi ya-Izrayeli, enyuka ayomfuna emaFilisti. Kepha Davide wanela kuva ngaloku wase uyaphuma uyawahlangabeta. ⁹ EmaFilisti bekefikile abamba inkundzi esigodzini seRephaim. ¹⁰ Wabese Davide ucela lusito kuNkulunkulu. Wabuta watsi, ''Ngiwahlasele yini emaFilisti? Utongincobisa yini emaFilisti?'' Simakadze wamphendvula watsi, ''Hlasela, ngitowanikela kuwe.'' ¹¹ Ngakoke baphuma banyuka bayaBaal Perazim, lokungukhona lapho lawancobela khona emaFilisti. Davide watsi, ''Nkulunkulu udzabule ekhatsi titsa tami ngesandla sami njenge sikhukhula semanti.'' Nagakoke libito lalendzawo kwabese kutsi yiBaal Perazim. ¹² Emafilisti abaleka ashiya bonkulunkulwana bawo lapha, wabese Davide ukhipha livi kutsi abashiswe. ^{13 14} Abese emaFilisti aphindze ahlasela abamba inkundzi lesigodzi . Ngakoke Davide waphindza wacela lusito kuNkulunkulu. Nkulunkulu watsi, ''Ungabahlaseli uchamuke ngembili kwabo, kepha batungeletele ngemuva bese uchamuka ekhatsi ehlatsini lebhalisamu. ¹⁵ Ngesikhatsi uva umsindvo longatsi tigi tekushuca emoyeni lohhusha etulu etihlahleni tebhalisamu, vele uhlasele ngemandla. Yentani njena ngoba Nkulunkulu utobe ahambe kucala ayohlasela imphi yemaFilisti. ¹⁶ Ngakoke Davide wenta njengoba Nkulunkulu abeshito. Davide wayincoba imphi yemaFilisti kusukela eGibeon kuya eGezer. ¹⁷ Lwabese ludvumo lwaDavide lugcwala yonkhe indzawo, naSimakadze wenta tonkhe tive kutsi timesabe Davide.