¹ Davide watakhela tindlu edolobheni lakhe. Walungiselela indzawo yelibhokisi lesivumelwano saNkulunkulu walakhela lithende. ² Wabese Davide utsi, ''NgemaLevi kuphela langatfwala libhokisi lesivumelwano saNkulunkulu, ngoba bakhetfwa nguSimakadze kutsi batfwale libhokisi lesivumelwano saSimakadze, nekumsebentela ingunaphakadze. ³ Wabse Davide uhlanganisa onkhe ema-Izrayeli eJerusalema, kutsi enyuse libhokisi lesivumelwano saSimakadze liye endzaweni layilungiselele yona. ⁴ Davide wabita wahlanganisa titukulwane ta-Aaron nemaLevi. ⁵ Kusukela etitukulwaneni taKohath, bekuna-Uriel indvuna yabo netihlobo takhe, 120 wemadvodza. ⁶ Nakusukela etitukulwaneni taMerari, bekuna-Asaiah indvuna yabo netihlobo takhe, 220 wemadvodza. ⁷ Netitukulwane taGershom, bekunaJoel indvuna yabo netihlobo takhe, 130 wemadvodza. ⁸ Netitukulwane ta-Elizaphan, bekunaShemaiah indvuna yabo netihlobo takhe, 200 wemadvodza. ⁹ Netitukulwane taHebron, bekuna-Eliel indvuna yabo netihlobo takhe, 80 wemadvodza. ¹⁰ Netitukulwane ta-Uzziel, bekuna-Amminadab indvuna yabo netihlobo takhe, 112 wemadvodza. ¹¹ Davide wabita boZodok na-Abiathar bapristi, nemaLevi bo-Uriel, na-Asaiah, naJoel, naShemaiah, na-Eliel, na-Amminadab. ¹² Watsi kubo, ''Nibaholi bemindeni yemaLevi. Tihlambululeni, nine nabomnakenu, kute nitawukhona kuletsa lelibhokisi lesivumelwano saSimakadze, Nkulunkulu wa-Izrayeli, nililetse kulendzawo lengililungiselele yona. ¹³ Ekucaleni aliphatfwanga ngini. Ngiko Simakadze longuNkulunkulu wetfu waveta lulaka lwakhe, ngoba asimufunanga nobe silalele umtsetfo wakhe.'' ¹⁴ Ngakoke bapristi nemaLevi atihlanjulula kute batawukhona kwetfwala lelibhokisi lesivumelwano saSimakadze, Nkulunkulu wa-Izrayeli. ¹⁵ Ngaoke emaLevi alitfwala libhokisi lesivumelwano saNkulunkulu emahlombe abo ngemabhoko, njengobe Mose bekashito-balandzela imitsetfo leshiwo livi laSimakadze. ¹⁶ Davide wakhuluma nebaholi bemaLevi kutsi bakhombe banakabo njengebahlabeleli labatodlala tingitali ngemsindvo lophakeme, emaluthi nemalayasi nemasimbali lakhala kakhulu. ¹⁷ Ngakoke emaLevi akhomba Heman indvodzana yaJoel nalomunye webanakabo, na-Asaph indvodzana yaBerekiah. Bakhomba nakumbonakabo esitukulwaneni saMerari na-Ethan indvodzana yaKushaiah. ¹⁸ Kanye nabo bekunabomnakabo labalandzelako: boZechariah, naJaaziel, naShemiramoth, naJehiel, na-Unni, na-Eliab, naMaaseiah, naMatthithiah, na-Eliphelehu, naMikneiah, na-Obed-Edom kanye naJeiel, nagcini masango. ¹⁹ Bahlabeleli boHeman, na-Asaph, kanye na-Ethan bakhonkwa kutsi ngibo labatodlalela etulu emasimbali elitfusi. ²⁰ Zechariah, na-Aziel, naShemiramoth, naJehiel, na-Unni, na-Eliab, naMaaseiah, kanye naBenaiah bebadlala emaluthi, bahlabela i-Alamoth. ²¹ Mattithiah, na-Eliphelehu, naMikneiah, na-Obed-Edom, naJeiel, kanye na-Azaziah bebadlala embili bahlabela iSheminith. ²² Kenaniah, umholi wemaLevi, bekangumcondzisi wetekuhlabelela ngoba bekasebenta kufundzisa kuhlabela. ²³ Berekiah na-Elkanah bekungibo lababuke libhokisi lesivumelwano saSimakadze. ²⁴ BoShebaniah, naJoshaphat, naNethanel, na-Amasai, naZechariah, naBenaniah, kanye na-Eliezer, bapristi, kwabo bekukufutsa emacilongo embikwelibhokisi lesivumelwano saNkulunkulu. Bo-Obed-Edom naJehiel bekungibo lababuke libhokisi lesivumelwano. ^{25 26} Ngakoke Davide, nebaholi baka-Izrayeli, netindvuna tetinkhulungwane tenyuka tayowulandza lelibhokisi lesivumelwano saSimakadze endlini ya-Obed-Edom ngekuhlabelela nekujabula. Ngesikhatsi Nkulunkulu elekelela emaLevi lebekatfwele lelibhokisi lesivumelwano saSimakadze, kwahlatjwa tinkunzi letisikhombisa netihhanca letisikhombisa tentiwa umhlatjelo. ^{27 28} Davide bekembetse umjiva lotfungwe ngelilineni lelicolisakele, njengemaLevi lebekatfwele lelibhokisi lesivumelwano, nebahlabeleli kanye naKenaniah, nalohlabela embili ingoma nebahlabeleli. Davide bekagcoke sidziya selinineni. Ngakoke onkhe ema-Izrayeli alilandza lelibhokisi lesivumelwano saSimakadze ngekumemeta kwekujabula, kanye nemisindvo yemacilongo, nemasimbali, kanye nemaluthi nemahaphu. ²⁹ Kepha latsi lisangena libhokisi lesivumelwano saSimakadze edolobheni laDavide, Michal indvodzana yaSaul, yabuka ngelifasitelo. Wabona inkhosi Davide igidza ijabulile. Wase uyamenyanya enhlitiyweni yakhe.