¹ Mwelende kubamba eense malailile ngindimupa sunu, kutegwa mupone okuvula, okutola nyika eyo Mwami njakakonkezya kumauso. ² Amuyeye nzila yeense Mwami Leza wenu njakamusololweda mumyaka ili makumi one munkanda, kuti amubombye, amusunke kuti azibe cali mumyoyo yenu, na ninga mylakonzya kubamba malailile akwe na ne. ³ Wakamubombya, wamujazya nzala wamusanina amana, eco ncimwatakezi nywebo nibaba bamauso tibalicizi. Wakacita eci kuti amuzubye kuti tinsi nsima ailike iponya muntu; pele, ulapona amajwi eense azwa mumulomo wo Mwami. ⁴ Zizwato zyenu takwe nizyakayawoka, amaulu anu takwe nakazimba myaka eyi yeense ili makumi one. ⁵ Amuyeye mumyoyo yenu, kuti mbubonya mbuli mwalumi mbwalaya mwanakwe, mbubonya Mwami Leza wenu ulamulaya. ⁶ Mponya amubambe milawo yo Mwami Leza wenu, kuti mwende munzila zyakwe okumulemeka. ⁷ Nkambo Mwami Leza wenu ulamusisya kunyika mbotu, nyika yotulonga twamanzi, yotusensa, kukunkila mu makuti akati kazilundu; ⁸ Nyika yobulotwe a maila, yamusansa emikuyu, amapomegranite; nyika ezisamu zya Maolivi o buci. ⁹ Ninyika nkomutakonzi kulya cinkwa mukubula okonkomutayobuli cintu niciba comwi; nyika ilamabwe apangidwe obutale, okuzilundu zyayo nkomukonzya kusya mukuba. ¹⁰ Ino muyolya okukuta, okulongezya Mwami Leza wenu nkambo kenyika mbotu njamupa. ¹¹ Ino amucenjele kuti mutalubi Mwami Leza wenu, mukuleka kubamba malailie akwe emilawo yakwe embeta zyakwe njendi mukumulailila sunu. ¹² Amubweni, mwakulya cokukuta, okuyaka manda mabotu okukala mulingawo, myoyo yenu iyo imikwa. ¹³ Amucenjele kuti ngombe embele zyenu zyavula anjiyo nsiliva engolida zyavukavula, ape zyeense zyomujesi zyavula, ¹⁴ ninga mwakulisumpula okuluba Mwami Leza wenu, wakamugwisya munyika ua Ijipiti, o munganda yobuzike. ¹⁵ Mutakalubi oyo wakamuzulwida munkanda mpati iyosya, muli buyo nzoka nkali olubanze ape nyika ciyumayuma mutakwe manzi, wakamugwisya manzi mubwe jumu. ¹⁶ Wakamulisya mana omo munkanda eco basikale benu cibatakezi. Kuti amubombye amusunke, okumucitila kabotu kumamanino. ¹⁷ pele amuzibe kuti Mwami Leza wenu, ngumupa nguzu zyakujana lubono olu.' ¹⁸ Pele amuzibe kuti Mwami Leza wenu, ngumupa nguzu zyakujana lubono olu; kuti azuzikizye cizuminano cakwe ncakakonkezya kuli bamauso, mbukubede esunu. ¹⁹ Ciyocitika namu, kuti mukalibe Mwami Leza wenu na mwacilila baleza bambi, kubakomba, okubamanina milimo yabo, ndamwambila buzuba bwesunu kuti kasimpe muyonyonyoka. ²⁰ Mbubonya mbuli bamasi Mwami mbakanyonyona kunembo lyenu, anywibo muyonyonyoka nkambo kokutaswilila ijwi lya Mwami Leza wenu.