¹ Awo Mwami Leza wenu nayo mweta mumasi ngimwinka kuyokala, uyotanda zisi zinji amenso enu-ba Hittites, ba Girgashites, ba Amorites, ba Canaanites, ba Perizzites, ba Hivites, ambi aba Jebusites-masi ali musanu aobile ku mwindanguzu. ² Ngu Mwami Leza wenu umupa mbabo mwakubakonzya, mponya mwelede kubanyonyona. Tamuyonjili mucizuminano ambabo, tamuyobafwidi luse. ³ Amane tamuyobambi makwatwa ambabo. Tamuyobapi bana benu basimbi kubana babo balumi, okuti tamuyobwezi bana babo basimbi kupa bana benu balumi. ⁴ Kambo baosandula bana benu balumi kuzwa kuli mebo, kuti bakakombe tuleza tumwi. Kambo konyema ko Mwami kuyomubukila, amane uyomunyonyona cokufwambana. ⁵ Ino mbobu mbumuyocita kuli mbabo: Muyopwacola azikombelo zyabo, kupwacola mabwe abo mutupanzi, kutenda okugwisya ansi masamu abo ba Ashereh , okutenta tuleza twabo. ⁶ Kambo mulicisi cisalidwe ku Mwami Leza wenu. Wakamusala kuti mube bantu bakwe, kwinda bantu bamwi balyano anyika. ⁷ Mwami takwe nakamuyanda na kumusala kambo kokuti mwali banji kwinda bamwi bantu-pele mwalibace akati kaba bantu bonse- ⁸ kono kambo kokuti ula muyanda, okuti uyanda kujatilila cipangano ncakakonka ku mauso benu. Kambo kako Mwami ncakamugwisya ejanza lyakwe lyenguzu okumunununa kuzwa muna'nda yobuzike, kuzwa mumanza a Pharaoh, mwami we Ijipiti. ⁹ Mpawo amuzibe kuti Mwami Leza wenu-ngu Leza ushomeka, ujatilila cipangano okushomeka kumyele myele yamazyalanwa kuti abo ba muyande oku cilila malailile akwe, ¹⁰ kono ulapilusizya kulabo batamuyandi mu menso abo kuti abanyonyone; tayobi oluse kuloyo utamuyandi; oyo mupilusizya amenso akwe. ¹¹ Muyojatilila malailile akwe, milawo, amalayililile ngindamwambila sunu, kuti mwacilile. ¹² Kuti na mwaswilizya malailile aya, okwajatilila ambi okwacilizya, kuyoba kuti Mwami Leza wenu jatilila cizuminano anwibo okushomeka nkwakakonka amauso. ¹³ Oyumuyanda, okumuleleka okumuyungizizya. Uyoleleka buzyali bwenu, zizyalo zyo muse wenu-maila enu, busansa bwenu, amafuta enu- otunamani twe ngo'mbe zyenu, abana bezivwubwa zyenu munyika njakakonka ku mauso benu kuti oyomupa. ¹⁴ Muyolelekwa kwinda bantu bamwi bonse; takuyobi batazyali akati kenu naba mwalumi na mwanakazi na akati kezi vwubwa zyenu. ¹⁵ Mwami uyo gwisya malwazi onse akati kenu; takwe mwalwazi mabi ngimuzi omu Ijipiti ayo muguma, kono oyoabika ali abo batamuyandi. ¹⁶ Muyobamana bonse bantu abo Mwami Leza wenu mbayopa kuli nwebo, tamuyobafwidi luse. Mutakakombi tuleza twabo, kambo kayobakakole kuli nqwebo. ¹⁷ Kuti na watimumoyo wako, 'Aya masi manji loko kwinda mebo; ndiyo agwisya buti?- ¹⁸ utakabayowi; ukayeye Mwami Leza wako nzyakacita kuli Falawo omu Ijipiti monse; ¹⁹ kupenga kunji kumwakabona amenso enu, zitondezyo, zikomosya, ijanza lye nguzu, ejanza lya Mwami Leza wenu lya kamugwisya. Mwami Leza wenu uyocita eci cintu ciswana kuli abo mbimuyowa. ²⁰ Mane, Mwami Leza wenu uyotuma mavo akati kabo, mane kusikila abo bakasyala abo balisisa kulinwebo bakanyonyoke kuzwa kumenso enu. ²¹ Tamuyobayowi, kambo Mwami Leza wenu uli akati kenu, Leza mupati uyosya. ²² Mwami Leza wenu uyo agwisya masi kuzwa kuli nwebo kanini kanini. Tamuyobakonzi bonse acindi comwi, mwendi zinyama zyomusaka ziyovulisya akati kenu. ²³ Kono Mwami Leza wenu uyomupa kuzunda mwazoswanana munkondo; uyobalwanisya kusikila bakanyonyoke. ²⁴ Uyobika bami babo mumanza enu, mponya muyojaya zina lyabo ansi lyejulu. Takwe uyomulwana, kusikila mukabanyonyone. ²⁵ Muyotenta zibubwa zyabo zyotuleza-mutakabwezi siliva na ngolide zivumba awo, kambo kuti mwabweza, muyonjila mukakole-kambo cintu citondwa ku Mwami Leza wenu. ²⁶ Tamuyonjinzyi zitondwa muna'nda yenu kutalika kucikomba. Muyocikaka okucisula, kambo cabambilwa kuti cinyonyonwe.