¹ Mponya twakapiluka o kwiinka kunyika yoku Bashan. Og, mwami wa ba Bashan wakaza kuzotulwanisya, inguwe abantu bakwe beense, kuzolwana ku Edrei. ² Mwami wakati kuli mebo, Útamuyowi; nkaambo ndakupa nguzu zyokumuzunda ambi ndabika bantu bakwe beense enika yakwe yeense mumanza ako. Uyocita kulinguwe mbuli mbuwakacita kuli Sihon, mwami waba Amoli, wali kukala ku Heshbon. ³ Íno Mwami Leza wesu wakapupa nguzu Og mwami waba Bashan, abantu bakwe beense bakabikwa mumanza esu. Twakabajaya kusikila mane kakutakwe naba omwi wakasyala. ⁴ Ali eco ciindi twakatola miinzi yakwe yeense. Takwe naba omwi munzi kuzwa kuminzi yzbo ili makumi ali musanu ekumi ngutwatakatola kuzwa kulimbabo-cisi ceense ca Argob, bwami bwa Og mu Bashan. ⁵ Eyi yali miinzi yeense yaliyakilidwe obulambo bulamfu, ezitendele, ape ezinsimbi; awo kwali eyimwi minzi minji yataliyakilidwe. ⁶ Twakabanyonyona cokumaninina, mbuli mbutwacita kuli Sihon mwami woku Heshbon, kwakanyonyonwa minzi yeense-balumi abanakazi ambi abana banini. ⁷ Pele olubono lweense lomumunzi twakalusala kuti lube lwesu. ⁸ Ali ciya ciindi twakabweza nyika kuzwa mu manza abami bobile baba Amoli, bali mutala lya Jodani, kuzwa kukalonga kaba Arnon kuya ku mulundu wa Hermon ⁹ (Mulundu wa Hermon witwa kuti Sirion, kuzwa kuli ba Sidonian, mponya ba Amoli bawita kuti Senir) ¹⁰ ambi minzi yeense yatala, ecisi ceense ca Gilead, ambi eca Bashan, kusikila ku Salekah oku Edrei, zisi zyo mwami Og mu Bashan.'' ¹¹ (Akaambo Og mwami wa Bashan nguwakasyala alike akati kaba Rephaim, amulange! Bulo bwakwe bwali bulo bwe nsimbi. Tibwalinsi ku Rabbah, nkubakala bana ba Ammon? bulamfu bwawo bwali tukokola tosanwe otune ambi obwaasa bwali tukokola tone, mbuli bantu mbubapima.) ¹² ''Eyi nyika eyi njitwakatola ali eco ciindi- kuzwa ku Aroer, oko nkokumbali okunkomwe lya Arnon, ambi ecisela cecilundu co muunzi wa Gilead, emiinzi yaco. Ndakaipa ba Lubbeni aba Gadites. ¹³ Ecisela cimwi co munzi wa Gilead omunzi weense wa Bashan, enyika yeense ya Og, ndacipa ku cibela co musyobo wa Manasseh. (Cisi ceense ca Argob, ape o Bashan. Cisi nciconya citwa kuti nyika yaba Rephaim. ¹⁴ Jair, mwana wa Manasseh, wakatola isi ceense ca Argob kusikila kumukano wa ba Geshuites aba Maakathites. Wakaita cisi, o Bashan, izina lwakwe, Havvoth Jair, kusikila sunu.) ¹⁵ Ndapa Gilead kuli Makir, ¹⁶ Kuli ba Lubbeni aba Gadi ndakapa nyika kuzwa ku Gilead kusikila kunkomwe lya Arnon-cisela co nkomwe ngo mukano we nyika-mponya oku mulonga wa Jodani, kauli no mukano abana ba Ammon. ¹⁷ Eimwi minyinza yao, ambi ndendilyo gezi lye nkomwe lyo mulonga Jodani, kuzwa ku Kinnereth kusikila ku lwizi lwa Arabah (nkokuti lwizi lo munyo) kunselelo yp mulundu wa Pisgah kumazwido. ¹⁸ Ndakakulailila ali ciya ciindi, ndakati, 'Mwami Leza wako wakupa nyika eyi kuti wivube; yebo abasilumamba, bayoinda kunembo yabazyalwanyina ezilwanisyo, kubantu bana Isilaili. ¹⁹ Pele banakazi benu, abana banini, olubono lwenu (ndilizi kuti mulolubon lunji), luyokala mumiinzi eyo njindakamupa, ²⁰ kusikila Mwami akape kulyokezya kubazyalwanyoko, mbuli mbwakacita kulinywebo, kusikila ambabo balube nyika eyo Mwami Leza wenu njayobapa mutala o Jodani; monya muyopiluka, umwi oumwi wenu, kulukono lwakwe olo ndundakamupa.' ²¹ Ndakamulailila Josyuwa ali ciya ciindi, ndakati, 'meso ako abona zyense ezyo Mwami Leza wako zyakacita kubami bobile aba; Mwami uyocita mbubonya ku zisi zyeense zyatamukainde. ²² Tamukoyobayowa, nkaambo Mwami Leza wenu ngonguwe uyomulwanina.' ²³ Ndakakumbila Mwami ali ciya ciindi, ndakati, ²⁴ 'O Mwami Leza, watalika kutondezya muzike wako bulemu bwako ambi ejanza lyako jumu; io kuli leza umbi kujulu nanga ansi oyo okunzya kucita milimo njiyonya mbuli mbuwakacita, ambi e milimo njuyonya yaasula? ²⁵ Amundileke ndiinke, ndamukumbila, ndikabone nyika mbotu ili mutala lya Jodani, nyika eyo mbotu ili acilundu, ambi o Lebanon.' ²⁶ Pele Mwami wakandinyemena akaambo kenu; takwe nakandiswilila. Mwami wakati kuli mebo, 'acibe camamanino eci utacindambili kambi kujatikizya zintu ezi. ²⁷ Wiinke atala ecilundu ca Pisgah ukatambye menso ako kumbo okunyika, kumusanza okujwe; ukalange amenso ako, nkaambo tokoyozubuka Jodani. ²⁸ Nenga namu lailila Josyuwa ambi okumuyumya yumya, nkaambo nguyozu lwinda bantu aba, ambi uyobacitya kuti bakakone nyika eyo njoyobona.' ²⁹ Mponya twakakala munkomwe ilangene o Beth Peor.