¹ Mponyina twakapiluka okutola musinzo okwinka munkanda munzila ibambalika ku lwizi kusalala, mbubonya mbuli Mwami mbwakandambila; mazuba manji twali kobuzyubguluka cilundu ca Seili, ² Mwami wakandambila, kuti ³ 'Mwendenda cindi cilafu mucilundu eci; amupiluke mutozye kulubazu lokunyika. ⁴ Lailila bantu, kuti, ''Mulainda akati kecisi cabana nyoko, bolunyungu lwa Isau, bakende mu Seili; bayomuyowa. Ino amucenjele. ⁵ Mutalwani ambo, nkambo nsikomupa nyika yabo, ne, nenga bunji kwecituta ce cilundu caseili kuti cibe lukono lwakwe. ⁶ Zilyo zyokulya mulazyula kulimbabo amali, kuti mulye; ape mulaula manzi kulimbabo amali, kutegwa munywe. ⁷ Nkambo Mwami Leza wenu wamuleleka mumulimo yeense yamanza enu; ulizi mbumwali kwendenda munkanda eyi mpati. Myaka eyi ili makumi one Mwami Leza wenu wali anywebo, takwe cintu cimwakambula.'' ⁸ Mponyina takwe baindilila banama, bolunyungu lwa Isau balikukala mu Seili, twakasiya mugwagwa uzwa ku Alaba, kuzwa ku Elati okuzwa ku Ezioni Gebeli. Mponyina twakapiluka okuyoinda mugwagwa womunkanda kuya ku Mowabu. ⁹ Mwami wakandambila, mutakatazyi ba Mowabu, ape mutalwani nkondo ambabo. Nkambo sikoyomupa nyika yabo kuti mwivube lwenu. Nkambo ndakaupa Ali kulunyungu lwa Loti, kuti bavube.' ¹⁰ (Ba Emi mbabakasaguna kukala mulinjiyo, bantu bapati, banji, balamfu mbuli ba Anakimu; ¹¹ abo ambo balambwa kuti mba Rafai, mbubonya mbuli ba Anakimu; pele ba mowabu balabamba kuti mba Emi. ¹² Ba Holi ambo mbabakasanguna kukala mu Seili, pele balunyungu lwa Esau bakabatanda. Babanyonyona kuzwa kuli mbabo. Okukala mucibaka cabo, mbubonya mbuli ba Isilayeli mbubaka citila nyika yolukono lwabo njakabapa Mwami.) ¹³ '''Ino amunyamuke muzubuke kalonga ka Zeledi,' Mponya twakazubuka kalonga ka Zeledi. ¹⁴ Inawa mazuba nitwakasika kuzwa ku Kadesi Baliniya kusikila nitwakazubuka kalonga ka Zeledi, cakasika kumyaka ili makumi otatwe o musanu aitatu. Cindi eco beense bamusela ulya wali kukonzya kuya kunkondo balimanide kale kufwa, mbubonya mbuli mwami mbwakakonkezya. ¹⁵ Nikuba namu, janza lyo Mwami takwe nilyalikuyanda liya zyalani mukuti alinyonyene mane limwi bakamanine. ¹⁶ Eci cakacitika, ino abo beense balumi badide mukulwana nibakamana kufwa akati kabantu, ¹⁷ Mwami wakandambila, kuti, ¹⁸ 'Sunu mula sotoka Ali, kumukano walo Mowabu. ¹⁹ Mwakusika kumbali ya bantu ba Amoni, mutabakatazyi nenga kubalwana; nkambo nsikoyomupa kabela kenyika yabantu ndakaipa kuli balunyungu lwa Loti kuti baivube. ²⁰ (Eyi anjiyo ilambwa kuti nyika yaba Refayimu. Ba Refayimu mbabakasanguna kukala nkuko_pele ba Amoni babamba kuti mba Zumuzumi_ ²¹ bali bantu bapati, bali banji, okuba balanfu mbuli ba Anakimu. Pele Mwami wakabanyonyona kunembo lyoa ba Amoninitisi, mponyina bakazunda okukala mucibaka cabo kuzwa elyo okusika sunu. ²² Oyo Mwami ape wakacitila bantu ba Esau, bakede mu Seili, nakabanyonyona ba Holi kuzwa kunembo lyabo, mponyina ba lunyungu lwa Isau nakabazunda okuyokala mucibaka vabo kusikila sunu. ²³ Ambabo ba Avitisi bakede muminzi kusikila ku Gaza, ba Kafitoli, bakazwa ku Kafitoli, bakabanyonyona okukala mucibaka cabo.) ²⁴ '''Ino amunyamuke, amutalike musinzo wenu, muzubuke kuti lya Alinoni; Bona ndaba mumanza ako Sihoni mu Amoli, Mwami waba Hesiboni, enyika yakwe. Talika kwivuba, okulwana anguwe munkondo. ²⁵ Sunu ndilatalika kubika buyo mu myoyo yabantu beense buyo bansi; bakamvwa zyenu liyobaleka mumafuwa tontolo ankambo kenu. ²⁶ Ndakatuma batumwa kuzwa kunkanda ya Kademoti ya Sihoni, wami wa Hesihiboni, amajwi alumuno, kuti, ²⁷ 'Amutuzumizye twide munyika yenu; ndilainda mumugwagwa mupati; ndilainda nekuba kujaza lyecilisya na kucigoyo. ²⁸ Ulandiduzizya zyikulya amali, kutegwa ndilye; undipe manzi, amaila, kutegwa ndinwe; buyo amundileke ndinde amaulu angu; ²⁹ mbubonya mbuli balunyungu lwa Esau bakede ku Seili, a ba Mowabu bakede ku Ali, mbubakacita; mane ndikainde ndikazubuke Jodani mu nyika eye Mwami Leza wesu njatupa.' ³⁰ Pele Sihoni, Mwami wa Hesiboni, takwe nakazumizya kuti twimwide; nkambo Mwami Leza wenu wakamucita kuli abe sicinguni, mukuti mulamuzunda amwabila mpowa, mbuli mbukubede sunu. ³¹ Mwami wakandambila, 'Bona, ndatalika kumupa Sihoni enyika yakwe kunembo lyenu; amutalike kwivuba, mukuti mwivube nyika yakwe. ³² Mponyina Sihoni wakeza kuzotusandukila, we abantu bakwe beense, kuzotulwanisya ku Jahaza. ³³ Mwami Leza wesu wakamwaba kulindiswe mponya twakamuzunda abana bakwe a bantu bakwe beense. ³⁴ Twakajana minzi yakwe yeense kucindi eco okwinyonyona kumaninizya minzi yeense balumi abanakazi abana banini; takwe naba womwi ngutwakasiya kali mumi. ³⁵ Pele ngombe twakazitola kuti zibe zyesu, antomwi alubono lweminzi eyo citwa kazunda. ³⁶ Kuzwa ku Aloyeli uli kumbali oku nkomwe yakalonga ka Alinoni, okuzwa kumunzi uli kukalonga ka Alinoni, okuzwa ku munzi uli kukalonga, mane kusikila ku Gileyadi, tikwalikwe munzi neba olukwakwa lulomfu utwakakacilwa. Mwami Leza wesu wakaibika mumanza esu. ³⁷ Kwali buyo kunyika yabalunyungu lwa Amimoni nkomwatakaika, nikuba kweesu kumbali lyo mulonga wa Jabboki, eminzi yokuzilundu oko kweese Mwami Leza wesu nkwakatukasya.