¹ Kuti na akati kenu kwazwa musinsimi na sikulota ziloto, mponya wamupacitondezyo na cintu cikomosya, ² okuti citodezyo na cintu cikomosya cacitika, ncakamwambila kati, 'Atucilele tuleza tumwi, ntumutazi, mponya tutukombe,' ³ mutamuvvwidi majwi akwe oyo musinsimi, na sikulota ziloto; kambo Mwami Leza wenu uliku mutatuba kuti na mulamuyanda Mwami Leza wenu emyoyo yenu ambi emyuya yenu. ⁴ Uyo cilila Mwami Leza wako, kumusumpula, kucilila malailile akwe, oku mvwida ijwi lyakwe, ambi oyo mukambo oku mujatilila. ⁵ Oyo musinsimi na oyo siziloto uyojaigwa, kambo wakamba zitajatikizi ku Mwami Leza wako, wakamugwisya munyika ya Ijipiti, ambi oku mufutula kuzwa muna'nda yentolongo. Oyo musinsimi uyanda kumugwisya munzila eyo Mwami Leza wenu njakamulailila kwenda. Ino amugwisye bubi akati kenu. ⁶ Ino kuti na muzyalwanyoko, mwana wabanyoko, na mwana wako mwalumi, na mwana wako, musimbi, na mwanakazi wako wetumbu, na mwenzinyoko uli mbuli buyo muya wako, wazacokusisilizya wakwenena okwamba kuti, 'Katiya tukakombe tuleza tumwi oto totazi, nikuba nwebo na besiku benu- ⁷ kufumbwa tu leza twa bantu mbuli abo bakede afwi na bali kule anwibo, kuzwa kumatalikilo enyika kusikila kumamanino enyika.' ⁸ Mutamumvwidi na kumuswilizya, ambi mutakazumizyi kumufwida luse mu menso enu, ambi mutakamulekeleli na kumusisa. ⁹ Pele, ,muyomujaya uyo; janza lyenu ndeliyosanguna kumuguma kuti mumujaye, amane ijanza lya bantu bonse. ¹⁰ Uyo mupotola amabwe mane ukamujaye, nkambo wakasola kukugwisya ku Mwami Leza wako, wakakugwisya munyika ya Ijipit, kuzwa muna'nda yentolongo. ¹¹ Isilayeli yonse iyomvwa okuyowa, ambi tabayoindilizyi kucitac bubi akati kenu. ¹² Kuti na mwamvwa umwi wamba cintu amunzi wenu womwi, kuti Mwami Leza wenu wamupa kuti mukalemuno: ¹³ Bamwi bantu mbemyoyo mibi bazwa akati kenu okugwisya basiminzi mumunzi yabo okwamba kuti, 'Katiya tukakombe tuleza tumwi ntomutezi.' ¹⁴ Mponya muyotatuba bumboni, kuyandola, oku yandola kabotu. Awo mwakujana kuti masimpe okuti eci cintu cakacitika akati kenu, mponya muyotola taamu. ¹⁵ Muyobalwana basiminzi boyo munzi esumo, kunyonyona munzi abantu balimo bonse kutolelezya ezivwubwa, esumo. ¹⁶ Muyobunga zyonse zimuyojana mumunzi okubika akati kenzila oku tenta munzi, antomwi ezintu nzyolukono, mbuli zipo ku -Mwami Leza wenu. Munzi uyoba kalundu kezintu zisinyekide kutamani; tauyobi ukayakwe. ¹⁷ Takwe enzyo zintu zibikilidwe kunyonyonwa ziyoba mumanza enu. Eci mbucelede kuba, ku Mwami aazwe kukunyema kwakwe, amutondezye luse, abe obulumbu ali nwebo, okumuyungizizya, mbuli mbwakakonka kumauso. ¹⁸ Uyocita eci kambo mulaswilizya ku jwi lyo Mwami Leza wenu, oku bamba malailile akwe aya ngemulailila sunu, kuti mucite ziyandikana mumenso o Mwami Leza wenu.