¹ Muli bantu bo mwami leza wenu. Mutalitendoli, nanga kugela kufumbwa cibela cokumenso enu ankambo kabafu. ² Mbuli mbumuli bantu abo basalala ku mwami leza wenu, ape mwami wakamusala kuti mube bantu bakwe, kwinda bense bantu abo bali atala enyika. ³ Tamwelede kulya kufumbwa cintu cisesemya. ⁴ Aba mbabanyama mbimwelede kulya: Ngombe, imbelele, ape empongo, ⁵ insya, konze, lubondwe, nanja, injelele, lweengu, o munyumbwe. ⁶ Mulakonzya kulya kufumbwa munyama wanzanya nfumba, nkokuti, abo bajesi nfumba zyanzene muzipanzi zyobile, ape oyo uselula. ⁷ Nikuba namu, tamwelede kulya bamwi banyama abo baselula nanga bajesi nfumba zyanzene muzipanzi zyobile: inkamela, sulwe, ape o cibila; nkambo zilaselula pele tazikwe ngumba zyanzene , tazisalali kuli nywebo. ⁸ Ingulube anjiyo taisalali kuli nywebo nkambo ili enfumba zyanzene pele taiseluli: taisalali kuli nywebo. Mutanolyi nyama ye ngulube, ape mutanojata mitunta yazyo. ⁹ Kuzintu ezi zili mu manzi mulakonzya kulya: kufumbwa cijesi tuyambyo amakwa; ¹⁰ Pele kufumbwa citakwe tuyambyo amakwa tamwelede kulya: tazisalali kuli nywebo. ¹¹ Beense bayuni basalala mulakonzya kulya. ¹² Pele aba mbabayuni mbimulelede kulya: sikwazi, makubi, cuungwe, ¹³ biimbe, luunga aba lubanze be musyobo misyobo. ¹⁴ Tamwelede kulya kufumbwa musyobo wacikwangala, ¹⁵ Impowani, sikusiku, nkolenkole, basikakooze bemisyobo misyobo. ¹⁶ Tumba munini, siyaswimuumba, o cibengelele, ¹⁷ Kakukumbwi, sifundwe, simusika. ¹⁸ Tamwelede kulya tongola nyangu nyangu o musyobo kufumwa wa masyula miyoba, nganga yabayuni, ape o sikampafwa. ¹⁹ Kufumbwa zyamababa, zyulu mumabunga bunga tazisalali kuli nywebo; tazyelede kuligwa. ²⁰ Mulakonzya kulya kufumbwa zintu zyuluka zisalala zimwi. ²¹ Tamwelede kulya kufumbwa cintu califwida; mulakonzya kucipa kumuzwakule ukala mukati ke minzi yenu. Kuti alye: nanga kuzwa kumuzwakule. Nkambo muli bantu basalala kumwami leza wenu. Tamwelede kubizya kapongo kanini mumalili enyina. ²² Nconzyo mwelede kupa kwe kumi kulezi mwakatyola kuzwa kumbuto zyenu, ezyo zizwa kuzwa ku myunda mwaka o mwaka. ²³ Mulelede kulya ku menso o mwami leza, mucibaka eco ncayosala kuti cibe cokumelemezezya, ce kumi cobutebuzi zye waini wenu nupya, ape amafuta enu, ape okubana bokusanguna bo butanga bwe mbelele zyenu; nkokuti mwiye kumulemeka cindi cense mwami leza wenu. ²⁴ Kuti na musinzo mulanfu kuli nywebo cokuti tamukonzi kuciyumuna, nkambo cibaka eco mwami leza wenu ncayosala cokumulemenezya cili kuli anywibo nkokuti, awo mwami leza amuleleka, ²⁵ muyocuzya amali, mukange mali mu manza enu, mukainke kucibaka eco mwami leza wenu ncayosala. ²⁶ Oko muyobelesya mali kuli nzimuyanda kufumbwa: ingombe, mbelele, waini nanga cokunywa cidide, nanga kufumbwa ncimuyanda. Mponya muyolya oko kumenso, o mwami leza wenu ape o kusekelela, nywebo abana benu. ²⁷ Mu Levi ukala akati kenu-mutamulubi, nkambo takwe caabilo niluba lukono anywibo. ²⁸ Kumamanino emyaka yotatwe muyotola zyeense zyokupa kwe kumi kuli nzimwajana mu mwaka oyo, ape muyozibamba mu minzi yenu; ²⁹ mponya mu Leviti nkambo tajesi caabilo nanga lukono anywibo, ape o muzwakule, abamucaala, abamukabafu abo bali akati kenu, bayoza okuzolya ape okukuta. Amucite eci nkokuti mwami leza wenu ulakonzya kumuleleka mumulimo wenu weense wa manza enu eyo njimucita.