¹ Kambo kako muyoyanda Mwami Leza wenu okucilila malailile akwe, malembe akwe, kwamba kwakwe, emilawo yakwe. ² Amubone kuti tandili kwambili bana benu, batazi nikuba kubona cisubulo co Mwami Leza wenu, bupati bwakwe, janza lwakwe lye nguzu, na janza lyakwe litambikidwe, ³ Zitondezyo emicito njakacita akati ke Ijipiti kuli Falawo, mwami woku Ijipiti, oku nyika yakwe yonse. ⁴ Okuti naba babwene zya katita kubalwani boku Ijipiti, kumbongolo zyabo, nakuzikocikala zyabo, mbwakapa manzi omu lwizi lwa mabu kuti bakongwe nibali kumutandanya, ombulimbwa kabanyonyona Mwami kusikila sunu, ⁵ na njakamucitila munkanda kusikila ni mwakasika mubusena obu. ⁶ Tibalina kubona zyakacita Mwami kuli Dathan o Abiram, bana balumi ba Eliab mwalumi mwana wa Reuben, mbuyaka juka nyika okubamina, manda abo, matente abo, ezivubano zyabo zyakabacilila, akati ka Isilayeli. ⁷ Kono menso enu abona milimo mipati eyo njakacita Mwami. ⁸ Kambo kako amucilile milawo yonse njindimulalila sunu, kuti mudiyeye, okwinka kuyo kona nyika nji mwinkila, ⁹ okuti mukakale mazuba manji munyika Mwami njakakonka kupa mauso abana babo, nyika ikunka malili obuci. ¹⁰ Kambo nyika nji muyokona, ilimbuli nyika ya Ijipiti, nkumwakazwida, nkumwakabyala mbuto okutilayila manzi amaulu enu, mbuli myunda ye micelo; ¹¹ kono nyika, njimwinkila kuyokona, ni nyika yotulundu enselelo, okuti inwa manzi emvula yokujulu, ¹² nyika eyo Mwami Leza wenu njababalela; menso o Mwami Leza wenu alangila njiyo, kuzwa mwaka nitalika kusikila kumamanino o mwaka.