¹ Aleco cindi Mwami wakandambila kuti, 'Beza mabwe obile mbuli kumatalikilo, mponya uze kuli mebo atala ecilundu, mponya uzopange bbokisi lye cisamu. ² Ndiyolemba amabwe majwi ayo ali amabwe ngiwakapwacola, ambi uyo abika mubbokisi; ³ Mponya ndakapanga bokisi ecisamu comunga, amane ndakabeza mabwe obile mbuli kumatalikilo, mponya ndakatanta atala ecilundu, nkejesi mabwe obile mujanaz. ⁴ Wakalemba amabwe, mbuli mbwakalemba kumatalikilo, malailile ali kumi ngakamba Mwami kuli nwebo acilundu kuzwa akati komulilo abuzuba bomuswangano; mponya Mwami wakandipangawo. ⁵ Ndakapiluka kuseluka cilundu, okubika mabwe mubbokisi ndingapanga; koko ngaya, mbuli mbwakandilailila Mwami.'' ⁶ ( Bantu boku Isilayeli bakenda kuzwa ku Beeroth Bene Jaakan kusika ku Moserah. Oku Aaron nkwakafwida, amane nkwakazikilwa; Eleazar, mwana wakwe, wakaba mupaizi mubusena bwakwe. ⁷ Kuzwa oko bakenda kwinka ku Gudgodah, mponya kuzwa ku Gudgodah kwinka ku Jotbathah, nyika yotulonga twa manzi. ⁸ Aleco cindi Mwami wakasala mushobo wa Levi kuti banyamune bbokisi lye cizuminano co Mwami, kwima ameso o Mwamim kumubelekela, okuleleka bantu muzina lyakwe, mbuli sunu. ⁹ Kambo kako Levi takwe cibela na lukono munyika abazyalwanyina; Mwami ndolukono lwakwe, mbuli mbwakamwambila Mwami Leza wenu.) ¹⁰ ''Ndakakala acilundu mbuli kumatalikilo, mazuba ali makumi one amasiku ali makumi one. Mwami wakandiswilizya eco cindi; ¹¹ Mwami takwe nakayeya kumunyonyona. Mwami wakati kuli mebo, 'nyamuka, zulwida bantu ubendelezye mumusinzo wabo; bayonjila oku bweza nyika njindakakonka kumauso kuti ndiyobapa.' ¹² Ino Isilayeli ninzi Mwami Leza wenu ncayanda kuli nwebo, kwinda kumuyowa Mwami Leza wenu, kuti mwende mu nzila zyakwe zyonse, kumuyanda, oku komba Mwami Leza wenu emyoyo yenu yense emyuya yenu yense, ¹³ Mubambe malailile o Mwami emilawo yakwe, eyonje mulayilila sunu kujatikizya bubotu kuli nwebo? ¹⁴ Amulange, ku Mwami Leza wenu ukala kujulu ambi okujulu kwamajulu, nyika, ezyo zintu zilimumo. ¹⁵ Pele Mwami alike ngwakatondezya kukubotelwa mumauso kuti abayande, mbuli bwacita sunu. ¹⁶ Kambo kako amupalule cikanda ce myoyo yenu, okuti mubeleke kuyumya nsingo zyenu. ¹⁷ Kambo Mwami Leza, ngu Leza wotuleza okuti ngu Mwami wabami, Leza mupati, ngosinguzu ambi nguyonsya utatondezyi kusalulula oku tatambula zipo cokusisilikizya. ¹⁸ Upa lubetesi kuli bamucaala aba nakazi bakafwidwa balumi, utondezya luyando kuli bamasi kwinda mukubapa zilyo ezi biya. ¹⁹ Kambo kako amube oluyanda kuli bamasi; kambo amwi mwali bamasi be nyika ya Ijipiti. ²⁰ Muyo muyowa Mwami Leza wenu; oyu muyomukomba. Kulinguwe mujatilile, okuti muzina lyakwe muyokonka. ²¹ Ngontembazyo yenu, ambi ngo Leza wenu, wamucitila ezi zintu zipati ziyosya, nzya bona menso enu. ²² Mauso bakainka mu Ijipiti kabali bantu makumi osanwe amakumi obile; ino Mwami Leza wenu wamuvuzya anga ninyenyezi zyokujulu.