¹ Komumone! ni mene sino kumonena eyo yoshe ni miyo, sina okuyupela ni matwi, sina kulemuha. ² Esi mu likulikile ni mene seni limukile, kakwisa eso muni bita naso. ³ Kono esi ni saela mene, ni kumonana ni Oyu-no maata-oshe; esi nisinga ni kuwaneka esaambo ni Mulimu. ⁴ Kono anyi kame muyambutuka eyi yakwite niti, moshe kame muli anganga na kwa kwata tuso. ⁵ Komuna kuondoka, abohe, kame muta kumonahala nji kame mwikalile ni unungu. ⁶ Cwale muyupe amabaka ange, kame mutetete eyaambo itunda mu kanwa kange eyi ni zeka, ⁷ Nji kame muta kwimanena Mulimu mu ku kopamisa e yaambo? mwaambe eyae kwa eyi ya kwite niti? ⁸ Mwikale ni saluluti libaka lyae? Mane mu zekele Mulimu? ⁹ Nji kame muta okuketa aba ata kwiiya ku mi tatuba? nji mutwese ku muonga omo kuongelwa munu? ¹⁰ Luli kame uta ku ninyaza, aba ukwite ketululo mu mucima. ¹¹ Oumbumu wae kauta ku micilisa? mulese kwiingeniwa kwa musunga wae? ¹² Tikelezo-tuna ta anyi ni tikelezo no mufuse, tikelezo no kuongola taanyi kame tifekile kwanyi ndowa no lizupa feela. ¹³ Ko muondoke! Mu nilesele ni aambe! Esi sita kuni iyela sini iyele! ¹⁴ Sikene abani londa e nyama yange ni maeo? Ni beke o upilo wange mu likaa lyange? ¹⁵ Ko mumone! Simba ani baa, kame nita ku mwaliketa, kanyi aba nita kwaamba myaambo yange balubala lwae. ¹⁶ Mwendi kame nita kuyoyiswa kwa saamba eso, eyi nonji kakwisa oyu so kana Mulimu ni kutwesa kwiiya balubala lwae. ¹⁷ Mutetete nawino amaywi ange, eyino muzeko wange tingene mu matwi enu. ¹⁸ Mumone! Cwale kame sina kusumahanya yaambo yange; nilimukile nji kame nita kutundiswa o mubonda. ¹⁹ Nji kwaali oyu so zekisana nange? simbangeso kame nita kwibanguta nji nife! ²⁰ Umiyupe feela mu mu yiili, abo kame, ka nita okusweeka kwa wene. ²¹ Tundisa e likaa lyowe kwa mene, kame eyi icilisa yowe ilese ku ni ngangamisa. ²² Kame he uni isaane ni tambaa ku kutambula; kwaambe meene, ween uni tambule. ²³ Mibonda ni tifoso tange niti njinga? Unisumwete mibonda ni tifoso tange. ²⁴ Sikene ushwekela o lubala lowe? kame nisike makiketa ngeeso kwanyi kame ni kalile sila sowe? ²⁵ Kakuli kame uta kutundamena elimuna litukiswa ni mebo? kamba kame ushenja o muuku no kukukuta? ²⁶ Niwene uta kunola eyi ilula ita kumi iyela, kame unitenekisa mibonda no ku undumbana wange. ²⁷ Weene ununga amakondo ange mumasokisi, oyu alondela myeendelo yange yoshe, kame ubeka endinda ku makondo ange. ²⁸ Kame o mwiili wange naukuola nau kupwacauka, kwanyi esito sina kuliwa ni mafele.