¹ Jobo bilu atambula nji, ² ''Ni sinu silimukiwa nji, ni anyi anu luli, aba mutakufa, unungu ni onyene kame uta kubwa!'' ³ Kono nimene kame ni yupisisa wino-wino kwanyi anyi, kamunibiti kwa siciili; kono kwaali oyu walimukile eyi muna kwaamba? ⁴ Sina kubiluka omunu ashekiwa kwa alikani ae, munu ana kukumbelanga kwa Mulimu, kame na ku mutambulanga, munu no kuwaba nambulwa mubonda, na kubiluka sisomiso! ⁵ Oyu akuketile kaa likete munu ana kwiiyelwa ni umai, kama anu shwaula, munu aba telela. ⁶ Isinyi niyonyene iyoya mu wiiketo mu litende tayo, kame a ashomaeta Mulimu ni onyenye ayoya mu kozo, kwaamba nji ano kusepisa kwa maata aonyene, nji niyonyene Mulimu wao. ⁷ Cwale he wibangute iyamana, kame ita kuku eleza, wibangute ni iyunyi no kuwilu ikwaambele. ⁸ Kamba ukumbele o mumbu nji ukutalifise, wibangute tindi no muliwate kame tita kukwaambela. ⁹ Kwayonyene yoshe, kwali oyu wa limukile, nji mwatendela Minya-Upilo? ¹⁰ Yonyene alemine o moyo no iyoya yoshe, ni moyo anu oshe mu likaa lyae. ¹¹ Kokaa, okutwi kame ilimukile kutaluhanya a maywi, kwanyi a kanwa omo kalimukele kuhalihanya ilya ili mu kauwa? ¹² Anu akukula ni onyene aikalile ni unungu, kame mu myaka no kupula mo kwiikalile ezibo. ¹³ Mulimu niyonyene aikalile ni unungu ni maata, kwayonyene kame kuwaniwa tikelezo ni kuyupisisa. ¹⁴ Mu mone! aba kwisa esinu bashi, kakwisa oyuso siungula, aba ayatilela o munu, kakwisa oyuso muyatululela. ¹⁵ Mu mone! Aba sindela o mbula e litunga kame likukuta. Aba ata kwilokisa. litunga kame lisinyeha. ¹⁶ Ni yonyene akwite maata ni unungu, o muongi ni uyu a ongiwa mu siyiili sao, kama ali mu maata ae. ¹⁷ Kama atwala aelezi no ambumu mu ku hapiwa, kame azizibaza aatuli. ¹⁸ Kama sinya titukelo ta ambumu kama anunga mihala mu timbunda. ¹⁹ Kama twala maprisita ku kuhapiwa, kame akwisa ano maata. ²⁰ Aalimulikile kwaamba kama alwisa a maywi, akulu kama ayumena kuyupisisa e yaambo. ²¹ Kama sheulisa amanduna, kame anungutula a makaunda awo akwite maata. ²² Kama ayaneka eyi ina kushwekiwa mu uuwi lififi, kama lita mu liseli mwiinda no lifu. ²³ Kama kulisa a macaba kame wa amana; kama apulisa a macaba, ni kwa monisa mundila. ²⁴ Kama indisa ambumu no litunga kuyupisisa, kame apolyanisa mu lihalaupa omo kwaasa e ndila. ²⁵ Kama polyyana mu lififi nambulwa liseli, kame wa tantalikisa kwanyi anu ana kukolwa amalopu.