¹ Munu ana kwelekiwa kwa mukati upilo wae niwa kwiiniba. Kame wiiyalile amaziezi. ² Kame ana kwiiya kwanyi palisa kame naukuyunda; kame una kubwa kwanyi mwiinda ka wikala sibaka. ³ Kame o munu ana kutendiwa ngeso niyonyene uta kulondela? kame tukutula ku kuta. ⁴ Kame kuta kukonahala nji kutunde munu no kukena kwa munu no litilo? kakukonahala! ⁵ Mukumona nji a maywaa ae kama ana kusumwa ni tikweti tae ni weene uyaamba, ni nji nau kumubekela esifunda esi katwese kusimatuka. ⁶ Mulibaka lya eyo, ube munu e sibaka a pumule, kwanyi mubeleki a twese ku wabelwa mamaneneno no liywa lyae. ⁷ E sitondo simba sitemwa, koili e sepo no nji mba sita kumena kame, ni nji kasita kuulwa e lituhela. ⁸ Mibisi yaso simba ikulubalela mu mumbu kame ni lisina lyaso kame liolela mu likungu. ⁹ Simbangeso aba siyupa a meyi kame sishomena, kame simena mitai ibya kwanyi e sitondo si sikalile sinyonyo. ¹⁰ Kono munu aba afa, kwayonyene na kubu; Ee kama mina o moyo, kame cwale o kwaali? ¹¹ A meyi no mu masa a bwa, a meyi no mu lueti kame abwela kame ku kukuta. ¹² Mo kwikalele ni kwa munu, niyonyene kame alangana kame kataa kwinguka, kubitela e liwilu kalisaka, munu alese kumona kame, kamba kwingulwa mu tulo twae. ¹³ Mawe! konishweka mu libita! ko ni yatilela mo, kutweba kowe mane kubwe, unisumene e liywaa elyo utaa kuni puluka kalyo. ¹⁴ Munu aba afa, ko ayoya kame! Abo, kame nita ku kumalela e ndwa yange, mu maywaa ashe, kubitela kwiiya oyu so ni lukulula mu sibaka sange. ¹⁵ Abo weene abo uta kwisaana, kame nita ku kutumbula, kame uta kushekwela ku mona kame o musebezi no makaa owe. ¹⁶ Kono cwale kame uta kubala a matengo ange, kame ulondela e tifoso tange. ¹⁷ Mibonda yange nai kunungiwa e nata, kame nau kubeka eliswayo lyowe ba kwiiba kwange. ¹⁸ Ni saambo no niti. Lilundu na li bulumuka mane ni kubwa, e liwe nati ku shenyiswa mu sibaka salyo. ¹⁹ Meyi bilu abulumuna a mawe, meya a lungwangwa na kuta ni mununo no mumbu. mo sinyeza esi asepile munu. ²⁰ Kame uta ku mukoma nako yoshe, mane afe; kame usinya o lubala lwae, ni kumulesa nji akutele. ²¹ Anae oko anomiwa, yonyene kayii, kame simba ashubulwa kakata na kulimuka. ²² Kutoma no mwiili wae, ni kwayonyene feela yofoci, kame o kweena no mu mucima wae, ni kwae feela yofoci.