¹ We mwana wandi umwaume, bika umutima ku mano ndekupandako, teya ukutwi kufyo ndekweba. ² Epakuti uleishiba umwakwendela bwino nefyo wakulalanda fyakulalanga ukuti iwe uli wa mano. ³ Pantu imilomo ya mwanakashi cilende, ala yalowa ngo buci, nemilandile yakwe intu yatelela ukucila amafuta. ⁴ Nomba pakulekelesha yalula nga malulu, kabili yatwa ngo lupanga ulwatwila konse konse. ⁵ Amakasa yakwe yakakutwala ku mfwa, ne ntampulo shakwe shalola no kutwala ku calo ca bafwa. ⁶ Ena tatontonkanya pa nshila iilola ku bumi, inshila endamo icende ende shintu shalubantika, lelo tasakama nakalya. ⁷ Nomba kanshi mwebana kutikeni kuli ine, mwisula ku mashiwi ndelanda. ⁸ Umwanakashi wa uyu musango wakutalukakofye, tecakwesha ku nyanta pa mwinshi wa ng'anda yakwe iyoo. ⁹ Epali wapela umucinshi obe kuli bambi, ne myaka yobe kubankalwe. ¹⁰ Epali na bantu bambi bambifye kuti balila ifyuma fyobe, kabili nefyo wacucutikile fyanonkesha aba mu ng'anda imbi imbi. ¹¹ Kabili na pampela ya bumi bobe walang'onta, ninshi walyonda washalafye imisakalala. ¹² Elyo ukatila ati, ''Mulandu nshi shaleumfwila kufyo balenjalulula? Cinshi ico no mutima wandi tewatemenwe ukusalapulwa? ¹³ Nakeene nokubela bakafundisha bandi, nangu ukuteya ukutwi kubalesambilisha. ¹⁴ Kwashele panono ukuiletela ububi no bonaushi mukati ka kulongana kwa lukuta.'' ¹⁵ Ulenwa amenshi ya muciba cobe wemwine, amenshi ayafukauka mukati ka cishima cobe. ¹⁶ Wileka insonsa shobe shifukauke pa mbilibili, utumilonga tobe wileka tusalanganine palwalala ifyoo. ¹⁷ Leka fibe fyobe we mwinefye weka, tafili fyabeni pamo na iwe iyoo. ¹⁸ Leka akamfuku mfuku kobe kabe akapalwa, na iwe wine ulesansamukafye pamo nomukashi obe uo waupile uciili umulumendo. ¹⁹ Ulya mwanakashi alepa umukoshi nge nkoba, ne citemwiko cakwe cilekusansamusha lyponse. ²⁰ We mwana wandi, nga cinshi ulefwaila ukusansamuka kobe kube ku mwanakashi cilende? Nga cinshi ico wingatonesha amabele ya mwanakashi mukamwine? ²¹ Pantu Yawe alishibifye bwino imyendele ya muntu, kabili eulonda no muntu monse umo alola. ²² Ifibi ificita umuntu umubi ala fiteyo umwine ekwata ne myando ya fyabubifi fyakwe. ²³ No kufwa kwine eko akafwila pa mulandu wakufilwa ukulaikanya, ukutumpa kwakwe ekukamutwala mu nindi.