¹ Mwena bana bandi muleumfwa ifyo ine ne shinwe ndemifunda, mulebikako umutima lyena mwakulaishiba ifintu. ² Ifyo ndefunda ala fisuma, eico mwilafisula iyoo. ³ Ilyo nal;i umwana munono mu ng'anda ya batata, ninshi ncilifye umuteku, kabili umwanafye eka kuli bamayo, ⁴ batata balemfunda abati, ''Uleibukisha ifyo ine ndesosa no mutima obe onse, ulekonka ifyo ndekukonkomesha lyena wakulaenda umumi lyonse. ⁵ Tola amano, nokwiluka, wilaba ifyoi ndesosa, kabili wilafisula iyoo. ⁶ Wilasangukila amano, pantu eyakakusunga, uleyatemwa, nayo yakulakwensha umutende. ⁷ Amano ala cikankala, eico kwata amano, nangufye uposelepo ifyuma fyobe fyonse wakwata, temulandu iyoo. ⁸ Uletemwa amano, nayo yakakupalamika, uleyabika mu mutima, nayo yakukauletela ubucindami. ⁹ Yakakupela icakuyemfya ica ku mutwe obe, nokukupela imyala yobe iyabufumu.'' ¹⁰ We mwana wandi, umfwa kuno ulesekelela ifyo ndesosa, elyo ukakokola pano calo. ¹¹ Ine nakulanga inshila yamano, no kukutungulula mu nshila shabulungami. ¹² Nga walaenda namano, takwabe cakukucilikila inshila, tawakaipunune iyoo, ukalabutukafye ulubilo. ¹³ Lyonse uleibukisha amafunde yandi, wilayasula, uleyabaka bwino, pantu ebumi bobe. ¹⁴ Iwe wilaingila umwenda ababifi, nangu ukwenda mu misango ya bantu abacita ifyabipa. ¹⁵ Talukamo, wilaendamo nangu panono, ufumemo, na wemwine wende pa nshila yobe iyaibelako. ¹⁶ Pantu abantu ababi pakumona utulo kano babala bacitapo icibi cimo, bena tabamona tulo nga tabalapunishiwa bambi. ¹⁷ Bena balya umukate wabubifi, nokunwa umwangashi wacimfulunganya. ¹⁸ Imisango ikonka abalungami yena yaba ngo lubuto lwa pa macaca, kuya lulecililakofye mpaka akasuba kasansama. ¹⁹ Nomba inshila yababifi yaba nge mfifi ubushiku, tabeshiba necilenga ukuti baipunune. ²⁰ We mwana wandi uleumfwa ifyo ine ndesosa, uleposako amano kumashiwi yandi. ²¹ Wileka yafume ku cinso cobe, uleyasunga mumutima obe. ²² Pantu ku bantu bonse abayasunga baba nobumi ubusuma, baleikala umutende. ²³ Pali fyonsefye, ulesunga umutima obe, pantu emwaba akamfuku mfuku kabumi. ²⁴ Wilaesha nangu limo ukulanda icintu icishili cacine cine, wilalanda ifyabufi nangu ifyabucenjeshi. ²⁵ Uleloleshafye ku ntanshi, ukletonta amenso apo ulungemefye epela. ²⁶ Uleshininkisha ifyo ulecita, ninshi lyena nefyo wakulacita fyakulalungama. ²⁷ Wilalalukila ku kuso nangu ku kulyo. Taluka ku fibi.