¹ Ili efunde lya pa mutuulo wapa lubembu. Lyamushilo icine cine. ² Bafwile ukwipaya icabupe ca kushininwa pa lubembu pa ncende bepailapo, kabili mukasanse umulopa mu ncende yonse iya cibumbili ce lambo. ³ Amafuta yonse mukati ka iko ya katuulwe: Amafuta ya ku muciila, amafuta ayali mukati ka fipande fya iko, ⁴ imfyo shibili na mafuta yaliko yonse, ayali mupepi no musana, na mafuta yashinguluka ilibu, pamo nefyo-ifi fyonse kufifumyamo. ⁵ Shimapepo afwile ukoca ifi ifipande pa cibumbili celambo ngo mutuulo wa mulilo uupangilwe kuli Yawe. Ici ecabupe cakushininwa. ⁶ Umwaume onse uuli pakati kaba shimapepo akalyeko umutuulo. Ufwile ukalilwe mu ncende ya mushilo pantu wena wa mushilo sana ⁷ Umutuulo wapalubembu cimo no mutuulo wa kushininwa pa mulandu. Nefunde limo line pali ifi fyonse fibili. Fili nokuba fyakwashimapepo uulebapapatilako. ⁸ Shimapepo uwa tuliila umuntu onsne umutuulo wa koca akaibulile umwine umukupo waiyo inama ya mutuulo. ⁹ Naonse umutuulo wa bunga usalwilwe ku mulilo, naonse umutuulo uwipikwe pa cisalwilo nangu uo cewe pa cisalwilo ukabe wa kwa shimapepo. ¹⁰ Umutuulo onse uwa bunga bwa ngano, ubwauma nangu ubwasankanamo na mafuuta, ukabe wa bantu bonse aba mulupwa lwa kwa Aaroni. ¹¹ Ili efunde lya mutuulo wa kuitemenwa uwa pa mutende untu abantu benga tuula kuli Yawe. ¹² Ngo muntu atuula umutuulo wa kutolela, elyo afwile apeela no mukate uwakupangwa ukwabulamo icitutumushi, lelo uwa sankanamo amafuta, no mukate uwapangwa no buunga bwa peleka ubwa sankanamo amafuta. ¹³ Kabili pamulandu wakupela ukutasha akatule icabupe ca mutende imikate iya tutumuka. ¹⁴ Kabili akapele cimo na cimo pali fyonse nge cabupe cipelwe kuli Yawe. Kabili ukaba wakwa shimapepo uwasansa umulopa wa mutuulo wa mutende pa cibumbili celambo. ¹⁵ Kabili umuntu uuletele icabupe capa mutende pa mulandu wa kupela ukutasha afwile ukulyako inama isha cabupe bwakwe. Ekashapo nangu kamo ukufika no lucelo lukakonkapo. ¹⁶ Kabili ilambo lyakwe ilyo aletuula ngo mutuulo wa mulapo, nangu wakuitemenwa, Inama shifwile sha liwa muli ubo bwine bushiku bwe lambo, lelo conse icingashalapo kuti caliwa no bushiku bwa konkapo. ¹⁷ Eico, yonse, inama yonse iya pe lambo nga ya shalapo ukufika mu bushiku bwalenga shitatu shi kocewa. ¹⁸ Inga cakuti inama yapelambo ilya mutende ya liwa pa bushiku bwalenga shitatu, tacakasuminishiwe, kabili talyakapendelwe pamo nge lambo lyakwe. Cikaba icinangwa, no muntu ukalya akaba uwa shininwa no lubembu lwakwe. ¹⁹ Umunofu uwa kumya ku cakowela conse tekulya, mukaocefye. Lelo umunofu uwa shala, umuntu uwasanguluka kuti alyako. ²⁰ Eico, umuntu uushasanguluka ulya munofu wa pe lambo wa mutuulo wa mutende untu batuliler Yawe uyo muntu akaputulweko mu bantu bakwe. ²¹ Ngo muntu akumya kuli conse icakowela-uku kowela kwa muntu atemwa icanama icakowela atemwa conse ica kuselausha, ica kowela kabili alyako umunofu we lambo lya mutende ilya kwa Yawe, ulya muntu akaputulwe umunofu mu bantu bakwe.''' ²² Elyo Yawe alandile kuli Moses, atile, ²³ ''Landa kubana bakwa Israeli no kutila, 'Taufwile ukulya amafuta ya ng'ombe, na mafuta ya mpaanga, nangu mafuta ya mbushi. ²⁴ Amafuta yanama ifwile kale ukwabula ukupongololamo umulopa, nangu mafuta yanama iya lepaulwa ku nama shampanga, kuti shabomfiwa ku milimo imbi, leelo wikalya. ²⁵ Leelo uyo onse ulya amafuta yanama ayo abantu bengapela ngelambo lya mulilo kuli Yawe, uyo muntu akaputulweko ukufuma mu bantu bakwe. ²⁶ Mwilalya umulopa mumayanda yenu, nangu wa coni nangu wa nama. ²⁷ Uyo onse ulya umulopa uli onse, uyo muntu akaputulwe ukufuma ku bantu bakwe.'' ²⁸ Yawe alandile kuli Mose nokutila, ²⁹ ''Landa ku bantu bakwa Israeli nokutila, ulepeela ilambo lyakwe ilya mutende kuli Yawe afwile aleta fimo ifyape lambo lyakwe kuli Yawe. ³⁰ Umutuulo wakwa Yawe kupangwa ku mulilo, iminwe yakwe eyo ikalete. Akalete amafuta pamo na mabele, pakuti amabele yasunshiwe ngo mutuulo wakusunsha ku tanshi yakwa Yawe. ³¹ Shimapepo akoce amafuta pa cibumbili celambo leelo ibele likaba lyakwa Aaroni nolupwa lwakwe. ³² Mukapeele itanta lyaku kulyo kuli shimapepo ngo mutulo we lambo lyobe ilya mutende. ³³ Shimapepo, umo uwa mulupwa lwakwa Aaroni, uwa tuula umulopa wa malambo ya mutende na mafuta akapeelwe itanta lyaku kulyo nge cakaniko cakwe. ³⁴ Eico nimbula ukufuma mu bantu bakwa Israeli, ibele ngo mutuulo wakusunsha, elyo ne tanta nge ca musangulo, fikalepeelwa kuli shimapepo Aaroni nabana bakwe abaume nge cakaniko cabo lyonse. ³⁵ Ici ecakaniko cakwa Aaroni nolupwa lwakwe ukufuma pa mutuulo wakwa Yawe wa mulilo, mu bushiku Mose bali nabo mukubombela Yawe mu mulilo wabu shimapepo. ³⁶ Ici ecakaniko Yawe abakonkomeshe ukupelwa ukufuma ku bantu bakwa Israeli, mubushiku alesuba ba shimapepo. Kabili cikaba lyonse ecakaniko cabo ku nkulo ne nkulo. ³⁷ Ili efunde lya mutuulo wa koca, umutuulo wangano, nomutuulo wapa lubembu, nomutuulo wapamulandu, umutuulo wakulashikwa, elyo ne lambo lya mutende. ³⁸ Nge fyo Yawe akonkomeshe Mose pa lupili lwa Sinai mu bushiku akonkomeshe abantu bakwa Israeli ukupeela amalambo kuli Yawe mu matololo ya Sinai.'''