¹ Yawe alandile kuli Mose, ukutila, ² ''Landa kuli bonse abalongene abantu abena Israeli nokutila kuli bena, 'Mube abamushilo, pantu ine Yawe Lesa wenu ndiwamushilo. ³ Uuli onse afwile ukucindika nyina na wishi, elyo ufwile ukusunga na masabata yandi. Nine Yawe Lesa wenu. ⁴ Mwilayalukila ku milungu yafye, nangu ukuipangila mwebene ba lesa ukufuma kucela. Nine Yawe Lesa wenu. ⁵ Ilyo apela ilambo lyamutende kuli Yawe, iili no kupela pakutila lingasuminishiwa. Lifwile ukuliwa ubushiku bulyabwine wapela, nangu ubushiku bwakonkapo. ⁶ Ngacakuti fimo fyashalapo ukkufika kubushiku bwashitatu, fifwile ukocewa pamulilo. ⁷ Ngacakutila fyaliwa fyonse pabushiku bwa shitatu, ninshi yakowela inama; tayapokelelwe. ⁸ No uuli onse uwalya ali nokuisendela umulandu palwakwe pantu napepula ica mushilo kuli Yawe, elyo uyo muntu ali nokupotulwako ukufuma kubantu bakwe. ⁹ Ilyo wasombola ubusomboshi bwa mumpanga yobe, wikapwisha kusombola mufifutu fya mwibala lyobe, nangu kukolonganya fyonse ifyapelwa mubusomboshi bobe. ¹⁰ Taufwile kukolonganya yonse imyangashi ukufuma mwibala lyobe, nangu ukukolonganya imyangashi iilepona panshi mwibala lyenu. Mufwile ukusha kubalanda na kumutulatulafye. Ine nine Yawe Lesa wenu. ¹¹ Wilaiba. Wilaipaya. Mwilaibepa. ¹² Wilalapa ishina lyandi mubufi no kususha ishina lyakwa Lesa wenu. Nine Yawe. ¹³ Wilatipwila umwina mupalamano obe nangu ukumwibila. Necilambu ca mubomfi walembwa tacifwile caikala kuli iwe ubushiku bonse ukufika no lucelo. ¹⁴ Wilatuka nkoma matwi nangu ukubika icakucilinganya kuntanshi yampofu. Mucifulo caico, ufwile ukutina Lesa obe. Nine Yawe. ¹⁵ Wilacita ubupingushi ukuba ubwabufi. Taufwile kulanga ukuwila kuli umo pantufye mulanda, elyo kabili tamufwile kulanga ukuwila kuli umo pantufye alicindama, mucifulo caico, pangula umwina mupalamano obe mubulungami. ¹⁶ Wilaenda ukushinguluka ukwananya ulwambo kubantu bobe, leelo fwaya ukucingilila ubimi bwamupalamano obe. Nine Yawe. ¹⁷ Wilapata munonko mumutima obe. Ufwile mucishinkafye ukukalipila umwina mupalamano obe pakukana yampana mulubembu pamulandu wakwe. ¹⁸ Wilalandula nangu ukupata konse ku uli onse uwabantu bobe, leelo palico temwa umwina mupalamano obe nga wemwine. Nine Yawe. ¹⁹ Ufwile wasunga amakambisho yandi. Wilaesha inama shibili ishapusana umusango wakutamfyanya. Wilasankanya imisango ibili iyambuto lintu uletanda mwibala. Wilafwala cakufwala icapangwa nemisango ibili iyasankanapamo. ²⁰ Uuli onse uwalala nomusha mwanakashi uwakobekelwa kumulume, leelo uushalubulwa nangu ukupelwa ubuntungwa, bali nokupanikwa. Tabali nokupelwa kumfwa pamulandu wakuti tali muntungwa. ²¹ Umwaume akalete ilambo lyapalubembu kuli Yawe kumwinshi kwitenti lya kulongana - sukusuku ngelambo lyapalubembu. ²² Elyo shimapepo akapanga ukunkosolola pali ena na pamo na sukusuku pelambo lyapalubembu pantanshi yakwa Yawe, pabubi ubo acitile. Lyena nobubi ubo acitile bukelelwa. ²³ Ilyo mukesa mumpanga nokubyala imisango yonse iyamiti ya fyakulya, elyo mukamona ukuti ifitwalo ifyo ukakwata ukutila nafibindwa ukulya. Ifitwalo fifwile ukubindwa kuli imwe pa myaka itatu. tafifwile kuliwa. ²⁴ Leelo umwakawalenga bune ifitwalo fyonse fikaba ifyamushilo, elambo lya kutasha Yawe. ²⁵ Mumwaka wacisano kuti mwalya ifisabo, panuma yakulolela pakuti ifimuti fitwalishe. Nine Yawe Lesa obe. ²⁶ mwilalya inama nomulopa emo uli. Mwilaipusha kumipashi pafyakuntanshi, kabili mwilaesha ukutungulula bambi namaka yafinjelengwe. ²⁷ Mwilabeya ukushingulusha ififutu fya mishishi kumbali shonse ishamutwe obe nangu ukubeya pampela yamyefu. ²⁸ Mwilaiteta imibili yenu pabafwa nangu ukulemba inembo pamibili yenu . Nine Yawe. ²⁹ Wilasebanya umwana obe umwanakashi mukumupanga umutalangani, nangu uluko lukawa kubutalangani nempanga ikaba iyaisulamo ukuilekelesha. ³⁰ Muli nokusunga amasabata yandi nokucindika incende yamushilo iye Hema. Nine Yawe. ³¹ Wiyalukila kuli abo abalanda nabafwa nangu kumipashi. Wilabafwaya, limbi kuti bamilufya. Nine Yawe Lesa wenu. ³² Ufwile waima pantanshi yamuntu uwamfwi kumutwe nokucindika pacinso ca muntu umukote. Muletina lesa wenu. Nine Yawe. ³³ Nga cakuti umutulatulafye aikala naimwe mumpanga yenu, mwika mulufyanyapo nangu cimo. ³⁴ Umutulatula uwaikala naimwe afwile ukuba ngowafyalilwamo umwina Israeli uwikala naimwe, mufwile mwamutemwa nga mwebene, pantu naimwe mwali imitula tula mumpanga ya Egypito. Nine Yawe Lesa wenu. ³⁵ Mwilabomfya icipimo cabufi lintu mulepima ubutali, ukufina, nangu ubwingi. ³⁶ Uli nokubomfya fye icipimo, icipimo icalungama, efa uwalungama, na hini uwalungama. Nine Yawe Lesa wenu, uwamifumishe mumpanga ya Egypito. ³⁷ Mufwile ukunakila amafunde elyo nefipope fyonse, nokuyacita. Nine Yawe.