¹ Mwashama imwe mwebaikala mu Sioni ubwanalale, naimwe mwebaikalia kumatwi tondolo palupili lwa Samaria, naimwe mweba cindami, mwebo babutukilako abantu bauno mushobo uukalamba uwabiwna Israeli. ² Kabiyeni, muyetamba umusumba wa Kalini, elyo muyetamba Hamati ulya musumba walulumbi. Kabili mutentemuke, muyetamba na Gati, ulya musumba waba Filisiti. Ifyalo fyalimo iyo misumba, bushe fyawamisha ukucila ubufumu bwenu? Bushe icalo cabo calicila icalo cenu ubukulu? ³ Imwe mwebatalushisha ukutali ubushiku mukayakandwa, elyo ulubali lumo mulapalamika inshita yakwikalilapo kukalili. ⁴ Mukacimona imwe mwebasendama pamasanshi ayabikwako ameno ya nsofu, mwebayolwela apanaka lukutu, mwebalya abana ba mpanga bakumukuni nabana ba ng'ombe aba kwitanga. ⁵ Imwe mwalitemwa ukushika inyimbo, nga filya fyalecita imfumu Davidi, elyo nokulashimba pamasese. ⁶ Imwe munwa umwangashi inkombo paa, kabili musuba namafuta ayacena cawamisha, ukwabula nokulalanguluka palwa konaika kwa calo cakwa Yosefu. ⁷ Eico imwe nimwe mukabalilapo ukuswendwa bu nkole, namalila yamunshiku nkulu shenu nokwangala kwenu konse kukapwa. ⁸ Imfumu Yawe nalapa ati, ''Napali ine wine ne Yawe, Lesa umwine wafita, nalapa ukuti nintendwa icilumba cabena Yakobo, kabili nimpata namalinga yabo ayacindama. Ine nkaleka abalwani bakapoke umusumba wabo, bakasende na fyonsefye ifyabo.'' ⁹ Mu ng'anda imo nga mushalamo abaume ikumi limo, ala nabobene bakafwa bonse. ¹⁰ Umuntu wamulupwa lwa bantu abafwile, akalati nga aisa mu ng'anda kukubula icitumbi ca muntu wakwe uufwile, pakuti aye acoce, elyo akalaipusha onsefye uukabelamamo ati, ''Bushe kucili nabambi abalimo?'' Uyo muntu uubelememo nga yasuka, ''Awe.'' Elyo kabili akatila, ''Iwe talalafye tondolo. Ala twilalumbula ishina lyakwa Yawe.'' ¹¹ Apo Yawe napela icipope, lyena akabongolola amayanda ayakulu, nokushonaula ayanono. ¹² Bushe bakabalwe kuti babutuka ulubilo pa fimabwe? Bushe abantu kuti balima bemba kuli pulao? Ngefyo imwe umulinganya muusangwile ubusungu, imilandu iyalungama imwe muisangwile iyabufi. ¹³ Imwe mulaitakisha pamulandu wakupoka umusha wa Lodeba. Mulasosa amuti, ''Twakwete ubulamba pakupoka umushi wa Kanaimu ukuti ube uwesu.'' ¹⁴ Yawe, Lesa umwine wafita, umwine nasosa ati, ''Cisuma, imwe mweba ng'anda yakwa Israeli ine nalaswa mukutilile ifita fyabena fyalo ifyakwisapoka cino calo. Eee, fikalamuteka kukalili, ukutampila ku Lebo Hamati ukuya shintafye nakwishika lya Araba.''