¹ Imwe mwe ba ng'anda yakwa Israel, umfweni luno lwimbo lwa malilo ulo ine ne Amosi nalamwimbila. ² Umukashana nacisungu Israel nawa panshi, takeme nakabili iyoo. Bamushile mu mpanga yakwe, ukwabula nelyo umo uwakumwimyako. ³ Imfumu Yawe aletila ati, ''Pabashilika ikana limo abema mu musumba umo, epela, napa bashilika umwanda umo abema mu musumba ubiye, pakabwelafye abashilika ikumi limo epela, ku ba ng'anda yakwa Israel.'' ⁴ Yawe aleeba aba ng'anda yakwa Israel ati, ''Imwe mulemfwaya epakuti muleenda abomi. ⁵ Mwilaesha kulamfwaila ku Betele, mwilaya ku Giligali, mwilaya kukumpepela ku Beresheba iyoo, pantu Giligali akasendwa bu nkole, na Betele akonaika.'' ⁶ Kanshi imwe mwebana Israel, mulefwaya Yawe, epakuti lyena muleenda abomi. Pantu nga tamucitile ifyo, ninshi akemina ing'anda yakwa Yosefu ngo lubingu lwa mulilo. Nao umulilo ukoca abena Betele, tapakamoneke nowakushimyqa nakalya. ⁷ Pantu umulinganya imwe mulawalulula icakukalifya, elyo kabili ubololoke ulabunyantilila!'' ⁸ Ni Yawe ewabumba intanda ishitwa Pileiyadesi ne shitwa Olioni; eusangula imfifi ukuba amacaca; esangula inshita yakasuba ukuba inshita yabushiku ewita amenshi ya muli bemba nokuyabula; alayasansa mpanga yonse pe sonde. Yawe eshina lyakwe! ⁹ Eonaula bonse abamaka mukwangufyanya ewishiba nemisumba yonse iya malinga. ¹⁰ Imwe mwe bantu mulapata umuntu onsefye uulanda bwino mu cilye, no muntu onsefye uusosamo ifacishinka. ¹¹ Imwe mulacusha abalanda nokubapoka inganu shabo, kanshi nomba tamwakekalemo mu mayanda yenu kabili tamwakanweko kufitwalo fya myangashi iyo mulelimba mu mabala yenu ayasuma. ¹² Ala ine nalishiba ifyo ulufyengo lwenu lwaba nefyo ifyabufifi fyenu fyafulisha. Mulapokelela namafisa kanwa, mulafyengelesha nabalanda mucilye ca milandu. ¹³ Eco uwamano ekala tondolo mu nshita yabubi. ¹⁴ Mulefwaya ukucita ifisuma, lekeni ukulacita ifibi, ninshi lyena mwakulaenda abomi. Ninshi ne Yawe Lesa umwine wa fita nakulaba nemwe icine cine ngomu mwine mulesosela. ¹⁵ Mulepata ifyabipa, mulefwayafye ifisuma, mulecita umulinganya pakupatulula imilandu mu filye. Nakalimo lyena Yawe Lesa umwine wafita akamilangulukilako imwe mwe bakwa Yosefi mwebashalapo. ¹⁶ Kanshi Yawe Lesa umwine wafita aletila ati, '''Mumisebo yonse iya mumisumba mukaba imisowa, namumansa shonse inkuta shakuililila ubulamda. Mukalainusha pakuti nabo bese mukulosha, mukalaitako nabalya mulipila abacenjela ukwimba ing'imbo sha malilo. ¹⁷ Mumabala yonse aya myangashi mukaba imisowa. Ifi fyonse fikacitika, pantu ine nalaswa injise kukumukanda. Nine Yawe nalanda.'' ¹⁸ Mwashama imwe mwebafuluka ubushiku Yawe ali nokufika. Pali ubo bushiku, bushe fisuma nshi imwe mukashukilapo? Pabushiku bwakwa Yawe, ala kukafitafye fititi, ¹⁹ cikaba ngo muntu uwakuti cilya afulumuka inkalamo, kabili akumana ne ciswango ca Bea. Atemwa ngo muntu uwakuti cilya abwelela mumwakwe, ati kashintilile ku cibumba, awe kabili emisuminwe ku nsoka. ²⁰ Ubushiku Yawe akesa kukaba imfifi, takwakabe ulubuto nakalya. Ubo bushiku kukaba imfifi iyine ine, takwakabute nangu panono nakalya. ²¹ Yawe aletila ati, ''Ala ine nimpata nokusula inshikunkulu shenu, nintendwa nefilonganino fyenu ifyamapepo. ²² Ilyo mwakulandetela amalambo yenu ayakoca, ne mitulo yenu iya cabunga, awe ine nomba nshalefisekelela, nshalefipokelela nomba ne nama shenu isho ishaina, isho muntula imitulo yakwampana. ²³ Lekeni nokulanjimbila inyimbo shenu ishacongo, ine nomba nshilefwaya ukumfwa kuciunda ca masese yenu. ²⁴ Lekeni umulinganya ulepo pe nga amenshi ya mulonga uupita, nobusuma bwenu bulebelela ngo mumana uushatala aukamapo. ²⁵ Imwe mweba ng'anda yakwa Israeli, ilyo mwali mumatololo pamyaka makumi yane, imwe tamwalentula amalambo nemitulo iyo. ²⁶ Lelo mwasenda Sakuti imfumu yenu na Kaiwani umulungu wenu, ifilubi fyenu fiyo mwapashanya ku ntanda, ifyo imwe mwebene mwaipangila. ²⁷ Eico naine nkamusende bunkole kufyalo fimbbi ukutali ukucila naku Damasiko. Nine Yawe nasosa, niwitwa Lesa umwine wafita.