Sesebungen eng kalima
1
O laa si malaikat eng kalima si simengo en sesebungenna, wo niaku ku limoo’ siesa sumesena’ si rima’araghi waki langit mineiy wia natas em bumi, wo nisia si wineeanla eng kekusi’ e ruragh temping maut.
2
Takar e winuka’nala em pepalen ruragh temping maut i ti’i, laa o matasouw e nawun waki ruragh i ti’i tanu mokan e nawun palewes wangko’, wo si endo wo en songkouw eng kaoatan e minareiydem kaa e nawunna e ruragh i ti’i.
3
Wo witu e nawun i ti’i se mangarerou’ momi se kompo’-kompo’ mineiy wia natas em bumi wo wia nisea se wineeanla eng kuasa tanu eng kuasa ne kalajengking-kalajengking wia em bumi.
4
Wo wia nisea neiy i owerla, rio sea te’a meteterila e rukut-rukut wia em bumi ka’apa en tumetou-tumetou ka’apa tu’u e nakana-nakana, ta’an i te sitou si reiy’ minake e wa’il ni Empung witu en tuintungna.
5
Wo nisea se ni’iyonala reiy’ kaa laa munu’ sitou, ta’an i te kaa laa sumiksa nisea lima nga sumedot eng keurena, wo en siksa’an i ti’i tanu en siksa’an ni kalajengking, sakawisa sia kumiki sitou.
6
Wo witu e masa ni’itu se tou-tou se laa sumero e maut, ta’an nisea se reiy’ laa matola nyi’a, wo nisea se laa mepa’ar mate, ta’an e maut en timingkasla wia nisea.
7
Ta’an e rupa ne kompo’-kompo’ i ti’i masuat tanu si kawalo tiniro’la i wee em paseke’an, wo witu natas eng kokong nea wawean wo’o sapa minasarla e mahkota mas, wo eng gio nea masuat tanu eng gio ni tou,
8
wo em bu’uk nea masuat tanu em bu’uk ni wewene wo em ba’ang nea masuat tanu em ba’ang ni singa,
9
wo em be’ewer nea masuat tanu e labung zirah, wo e legu’an eng kale’ekeuw nea en tanu mokan e legu’an eng kareta-kareta pakeongen ne kawalo kelaker, kasuatan matingkas waki tampa paseke’an.
10
Wo e nipus nea masuat tanu si kalajengking wo wawean tetunena, wo witu eng gorem e nipus nea i ti’i wawean eng kuasa nea kaa laa mererarala sitou, lima nga sumedot eng keurena.
11
Wo si raja maperenta nisea nisia mouw si malaikat en temping maut; ngaranna witu em baasa Ibrani nyi’a mouw e Abadon wo witu em baasa Yunani nyi’a mouw e Apolion.
12
En cilaka kasa ketare e limangkoiy mouw. Teakan e laa tumodeiy e ruape’ cilaka kasi.
13
O laa si malaikat eng kaenem si simengo en sesebungenna, wo niaku ku liminga e nesa suara rimeu’mi witu e nepat en sunge mezbah mas witu en sinaru ni Empung,
14
wo lumila’ wia si malaikat eng kaenem si timiboiy en sesebungen i ti’i: “I waya mola se epat malaikat neiy i kewa’akes tawi en temberan wangko’ Efrat i ti’i.”
15
Takar i waya mola se epat malaikat se tiniro’ mola i wee en jam wo e nendo, en sumedot wo en te’un kaa laa mewewunu’ se esa nga patelu witu se umat ne tou.
16
Wo eng kelaker ne suraro i ti’i nyi’a mouw se rua nga pulu’ nga riwu laksa pasukan makakawalo; niaku ku liminga eng kelaker nea.
17
Takar tuana mouw niaku nu limoo’ witu em pineleloo’oku i yi’i se kawalo-kawalo wo se tou-tou mesake-sake nisea; nisea se minake labung zirah, e mea’ napi wo em belao wo eng kunir em balelang eng keliurna; eng kokong ne kawalo-kawalo i ti’i masuat tanu eng kokong ni singa, wo waki sumana mareu’mi api, wo e nawun wo em balelang.
18
Kaa en telu malapetaka i yi’i se winunu’ se esa nga patelu wia se umat ne tou, nyi’a i ti’i kaa e napi, wo e nawun, wo em balelang, e rimeu’mi waki sumana.
19
Karengan eng kuasa ne kawalo-kawalo i ti’i e niato witu eng gorem en sumana wo witu eng gorem e nipusna. Karengan e nipusna masuat tanu si leloiy’; nisea se maka kokong wo ampit eng kokong nea i ti’i nisea se minapa eiy eng katerian.
20
Ta’an se tou walina, se reiy’ minate kaa e malapetaka i ti’i, o reiy’ kangkasi makedo’la witu em pasiwo-siwon e lawas nea: nisea se reiy’ maena-ena’ masempe se roh-roh lewo’ wo em berhala-berhala waki e mas wo em perak, waki tambaga, watu wo eng kayu e reiy’ mete’u lumoo’ ka’apa luminga ka’apa kumelang,
21
wo nisea se reiy’ makedo’ witu em pawunu’an, sihir, pesa’amekan wo em parongkitan.